قصيده00علشان انت مصري00للشاعر أحمد فؤاد نجم00
علشان انت مصري لازم تعاني
وتفقد كرمتك بكل المعاني
وتحرق في دمك سنين مش ثواني
واوعي تصدق كلام الاغاني
بتاع الحضاره وكاني وماني
ده كله هجايس مايدخل وداني
علشان انت مصري العذاب بيناديك
بتبدا في يومك حاجات بترازيك
في نومك في قومك تعكنن عليك
تضيقك ولسه العماص في عنيك
مافيش ميه تشطف صابونه في ايديك
وجسمك ملزق ورحتك عاديك
فتلبس وتنزل وفيك اللي فيك
ورايح لشغلك حتحتاج مواصله
ادي المترو واقف وكهربته فاصله
وفي الميكروباص خناقه وحاصله
واتوبيس فرامله عايزالها وصله
وتوك توك ده تايه ومحتاجل بوصله
بتوصل لشغلك بدم اتحرق
في زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفي كام مواطن عاملك قلق
بيشكي تقول روح اندعق
وعركه وهوجه وشاي اندلق
ومخك خلاص من الصداع اتفلق
هترجع لبيتك ده لو كان في بيت
هتوصل هتندم ياريت ما جيت
مراتك بتصرخ خلاص استويت
عيالك بتطلب وهات كيت وكيت
تزعق تهاتي ياناس اتهريت
ولاحد سامعك مهماهاتيت
عشان انت مصري وده للاسف
فلازم تاسي تعيش تتقرف
وكل الاساسي في حياتك ترف
فتنسي الكرامه وتنسي الشرف
وتسرق وتنصب او تنحرف
ودمعك بيجري وجرحك نزف
مش انت اللي مصري؟؟؟؟ جتك القرف
