جواب من شاب مصري إلي أرض مصر
في يه يا مصر؟
أيه اللي بيحصل؟
*ليه كل حاجه فيكي إتغيرت للاسوأ؟
*ليه شاب زيي حاسس انه عنده تمانين سنه؟
*ليه شاب زيي بدال ما يفكر يبني نفسه بيفكر ازاي يرممها؟
*ليه في عز النور مش شايف؟
*ليه كل ما أحاول اعمل حاجه صح الاقي نفسي ماشي في سكة الغلط؟
*ليه أرضك بعد ما طلعت عظماء في كل المجالات بقت مش لاقيه المجالات دي اصلا؟
*ليه نيلك بعد ما كان بيروينا بقى بيسممنا؟
*ليه حاسس إني في بلدي غريب؟
*ليه رغم إن قوات الامن حوليا في كل حته ورغم كده حاسس إني هموت من الخوف؟
*ليه على رأي السيده الفاضله هند صبري _رضي الله عنها وأرضاها
مصر بقت آسيه أوي على اهلها؟
*ليه الجيل الوحيد اللي واخد حقه في البلد دي هو الجيل التالت للمحمول؟
ليه يا مصر؟
.......................................
وده كان رد مصر
جرى ايه يابني؟
إنت بتسألني أنا؟
لا حول ولا قوة الا بالله
أنا هجاوبك
*زمان كنا بنسند الامر لأهل الخبره أو أهل الثقه دلوقتي بنسند الأمر للأهل بس
من غير لا خبره ولا ثقه
*زمان كنا بنحلم بالاكتفاء الذاتي مع القمح
دلوقتي حققنا الاكتفاء الذاتي مع القمع
*زمان كنا بنرفع شعار صنع في مصر
دلوقتي بقينا بنرفع شعار صفع في مصر
*زمان مات الاف المصريين من اجدادكم عشان يحفروا قناه السويس
ودلوقتي اللي بتعدوا فيها سفن مسرطنه وسفن حربيه تضرب دول عربية
*الحاجه الوحيده اللي بتعملوها بنجاح هي لم الأجره
*كترت المساجد وقل اللي بيصلوا
*انتشر الحجاب وقلت العفه
*علقتوا في كل الشوارع صور لنصرة النبي _عليه الصلاه والسلام _
وانتوا اللي خاذلينه
*انتوا الشعب الوحيد في العالم اللي بيحط رغيف العيش على الرصيف
وبيحط الجزمه في البترينه
*بعد ما كنتوا بتتفرجوا على العلم والإيمان
بقيتوا تتفرجوا على هاله شو
*أي مصري بينجح في أي مجال
ياخد أي جنسيه تالنيه ويبقى نجاحه بره بلده
*حاربتوا البلهارسيا
بدال ما تقضوا عليها قضيتوا على النيل
*بعد ما كان القطن المصري طويل التيله بقى طويل الخيبه
*اهتميتوا بالسياحة والسياح ونسيتوا الغلابه اللي مش لاقيين ياكلوا
*ربنا خلقني جميله وانتو خليتوا الزباله اجمل مني شويه
وبعد ده كله بتجيبوا العيب عليا
قوم يبني الله يرضى عليك
قوم إعملك حاجه مفيده
بدال ما انت قاعد تندب حظك
وخليك فاكر
لو الدنيا كلها غلطانه
ده مش عذر
ومش شماعه تعلق عليها فشلك
