مصر تفوز على البرازيل 3-4
بسم الله الرحمن الرحيم
بيان عاجل
طبقا للقانون الجديد الموضوع من قبل الاتحاد الدولى لكرة القدم fifa والموضوع خصيصا لمباراة مصر والبرازيل والذى ينص على
ان الفوز للفريق الذى يحرز اقل عدد من الاهداف وعليه "تقريبا والله اعلم" اعلن الاتحاد عن فوز المنتخب المصرى فى اللقاء الذى اقيم بينه وبين المنتخب البرازيلى
فى بطولة كأس العالم للقارات بنتيجة 3-4
ماهو مافيش حل غير كده عشان الواحد يبرر اللى الناس بتعمله .. بيباركوا لبعض
انا اول مرة اشوف اللى بيحصل ده .. ييجى الواحد وياخدك بالحضن والله .. ويقولك الف مبروك 4-3 ... بس .
ايه ده .. ايه يا عم انت انت خلاص ؟ قد كده احنا كنا فاقدين الأمل .. إحنا صحيح قبل الماتش كنا بنتخيل ونهزر
دا احنا ها يتعمل بينا رقم قياسى من الاجوان اللى ها تدخل فينا
والتوقعات ما قلتش عن 3-1 للبرازيل للمتفائلين .. غير بقى 7-0 وما فوق للمتشائمين ..
بس اكيد كلنا كنا بنتمنى ان احنا نفوز رغم انك ما كنتش بنقول ده قدام حد عشان ما يتريقش عليك ..
اتفرجنا على الماتش وفضل ف امل .. لحد ما كاكا جاب الجون الرابع قومنا وانا الوحيد اللى على الاقل مش فرحان
والشباب ناوى ينزل يحتفل فى شبرا .. اه والله .. وهايجيبوا كلب ويلبسوه لبس البرازيل ويمشوا يضربوه بالعصاية .. كنت ها اتشل
الاسخم ان انا لما فتحت الراديو على النت لقيتهم مشغلين نانسى عجرم " لو سألتك انت مصرى " والله كنت خلاص .. واللى زاد وغطى
الاغنية اللى بعديها .. حمادة هلال طبعا عارفينها " والله وعملوها الرجالة " ونفسى اعرف عملوا ايه ..؟ يا جماعه والمصحف احنا اتغلينا
اقسم بالله احنا اتغلينا ..
اه انا مش ها اقول احنا لعبنا وحش بس كان فى احلى وفى الاخر انا مش ها الوم برده على اللاعيبة ولا على شحاتة واقول الحمد لله
بس مش لدرجة ان اخويا يكلمنى يقولى مبروووك .. مبروك على ايه ..؟
والله انا خايف اكون اتفرجت على ماتش تانى .. وعلى العموم لو حد شاف الماتش مباشر وشاف النتيجة خلصت غير 4-3 للبرازيل .. يبقى يقولى ..
