بسم الله الرحمن الرحيم
انا هحكي موقف حصل معايا انهاردة
ولاني كنت راجعة انا واخواتي متأخرين شوية كانت الساعة11
ركبنا المترو كالعادة
وطبعا عربية السيدات الدائمة
وعشان اللي ميعرفش نظام مترو الانفاق في عربيتين سيدات
واحدة منهم لحد الساعة 9 مساء بس وبعد كده مسموح للرجاله يركبو فيها
والتانية سيدات على طول اليوم
المهم ركبنا المترو ولقينا فيه رجاله كتير قلنا يا جماعة دي عربية سيدات بس قالو لحد الساعة 9
قلنا لا دي العربية التانية مش دي
محدش عبرنا ولا واحد من الرجاله اللي واقفين اتحرك بل بالعكس كانو بيتخانقو مع الستات اللي بتكلم وانا منهم طبعا وكمان كانو بيزقو وبيقعدو مكاننا وكأن ده حق مشروع ليهم
ولما تعنا من كتر الكلام قلنالهم كده هتدفعو غرامة
قالو امال ده واقف ليه لما هو ينزل او يدفع نبقا نعمل زيه
بصيت عليه اقيته وللاسف ظابط بالبدلة الميري
وفي لحظات سرحت وفضلت افكر
ليه كلمة راجل بمعناها الحقيقي اصبحت نادرة في البلد دي
او الاصح في اليومين دول
طول عمرنا عارفين ان الراجل قوة تظهر وقت الشدة قوة تظهر بالعقل الحكيم مش عمال على بطال
عارفين ان الراجل احترام
احترام لنفسه قبل ما يكون لغيره لانه لما هيحترم نفسه هيجبر الناس تحترمه
احترام لغيره احترام للقوانين
عارفين كمان ان الراجل قدوة الست سواء بنته او اخته او مراته
قدوة لابنائه
انا حزينة جدا على الي بيحصل دلوقتي لا وكمان رجال الامن والشرطة اول ناس بتغلط ومش بتحترم القوانين الي جطتها الحكومة
طب الناس الباقية ليهم حق يعملو اكتر من كده ليه حق الراجل دلوقتي يعاكس الست ويضايقها بدل ما كان بيحصل زمان ان الراجل يدافع عن الست حتى لو ميعرفهاش
في النهاية انا اسفة اني طولت عليكم بس ده موقف دايقني وحبيت اخد رأيكم فيه ياريت اسمع ردودكم
سماح
