الأولانية و الأخرنية فى غرام طامية

اهداء الى اهلى واحبابى وبلدتى ومسقط رئسيى وعزوتى ( طامية )

يامتستته ... يامتربعة
فوق عرش قلبى المتعلق بيكى . . . ياشدانى نواحيكى
اشد م المشدود . لصبية خاطبها جديد
واشد من لهفة عيال الغلابة . . على طلة العيد
وأشد من لهفة عجوز .. لشدة حيل
واشد من لهفة وليد ع البزة
واشد من لهفة عبد للعزة
واشد من لهفة صبية مستوية ع الزفة وليلة الدخلة
واشد من لهفة الخريج على يوم سداد الدين
واشد من لهفة الصايم على سجارة فى رمضان
واشد من لهفة المرضان ع االشفاء م الداء
واشد من لهفة الشراق للرية
واشد من لهفة العطشان لكوز البكلة ملان مية

ياجامعة كل التناقض فى الشكل والمضمون
يا عفية ومستعفية . . . ياعقلة وشقية
يا حنية يا حنون يابيضة يا سوده
يا كل الوان الطيف
ياكريمة ويا الضيف .. وبخيلة على كتير منا
يا معرقبة يا حرمة
والعريش زى كوز سكر
يا صافية وبحر متعكر
يا حوض الخضرة ...
يا جبلاية
ويعيال لسة بريالة بتشرب بنجو ف الخن
يا عيال تانى بتبيعه وتلعب دومنو بفلوس
وناسه تلوص . . . يا حمل البوص
على ارض املاك فوق سطوح بيت ضايخ
بباب دايخ لونة بايخ

يا لبن مخيض وبصلاية يا جرجيرة وفجلايا
يافرن وعيش وبتاو
يا حلبة ف مرحرح
ومرصرصاها علينا كتير
يا سر ف بير
يا بواحة يا نواحة
ع الشهد من اولادك
محمود شلقانى صورته ع بابك
ومبسوطة ومرتاحة
يا اسم فى يفطة تتمحلس
لواحد غول ... ولا تقولى ولا تقول
يا جرس كنيسة واذان جامع
وحوش جامع
ياحن وسيع ةبيسيع
ياااه ... ياريحة الزمان اللى فاحت
وقوة موريس إللى راحت
با دايرة انيللى والزل ف المخاليق
والقهر والضيق
يا محلج القطن مدخنته بتصفر
دواليبة بتعفر



تابع

يا جامد يا شيخ ..

لك مني الف تحيه ..

واكله فول وطعميه ..

وكبايه شاي في المشربيه ..

ومتنساش تيجيلنا في ساحه طاميه ..
...............

ياشرق والتوربين
يا شربة مية م البطس ع الريق
يا مكنة طحين العمدة
يا بدارة النعمة
يا فراكة ولاد طيطا
يا كوليرا تصول وتجول
وجرن جاد السيد يلم الخلق يوم الهول
يا دفتر عم محمود ابو منعم القاضى
يلم الشمل ويكون النكاح رسمى
يا اسمى .. . يا رسمى . . يا نفسى ..
يا زحمة الكُتاب
والشيخ محمود مراد
يقرص ودان الولاد
مدنية ومكية حفظو كلام الكتاب
الفاتحة والبقرة لسورة الناس
يا ام التقا و الأتقياء والاولياء
بفتح الياء
ياشيخ حميد المدد
يا ملاذ والمقام والناس
يا دخلت مراتى على بنتى بسبت المولد
يا بدوى كراماتك . . . وغراماتك
يا ام الشباب
رجالة قبل الاوان
يا مغيب الشيطان

تابع

فالحة
وسارحة تجيب لك ضى
يا دكترة ودرس
فى جمعة ومدارس ضباط . . قضاه . . وحماه
حملين ميزان العل والحق
يا عاشقة الحق
للحق . . وبحق
عوض خليفة بيصرخ ف المحكمة
عشان حق كان ضايع
بالعاه ولية مفترية واللا جدع صايع
يا مدرسة الهدار
وصغارها صارو كبار
وعلام بجَد وبجد
مفيش هزار
والفاتحة للعطار
يافريد يا حمزاوى
وغاوى
يقول فيكى غنا واشعار
يالطفى عمدتنا
عامود بيتنا
يا رايه ع السارى
وبئر صالح
وبتداوى وبتدارى
يا على يا جميل
يا صامد
يا هيبة جبل
يا جرأة اسد
وتحت القبة تتلامض
يا حبة محمد جميل امير الطيبين
يا فطورة الصبحية من مطعم اسحاق
ياركنة الساعة وف ساعة
يمشيها الخواجة انيس
يا شعبان ابو سعيد يعالج الوابورات
ويصنع الفوانيس
يادقة عم بهلول على طبل مخبول
يا ابو عبدة بياع الجرايد
يا بلدية وضرايب وعوايد
يا كاملة والكمال لله
ونقصة العقل
يا معطية ع الفايت
يا عيش صابح يا عيش بايت
يا زحمة الطوابين
والوقفة ورا النساوين


تابع

هههههههههههههههه

ايه ده

اشجيني كمان وكمان................

اقتباس:

---

المشاركة الأصلية كتبت بواسطة شيخ البلد

اهداء الى اهلى واحبابى وبلدتى ومسقط رئسيى وعزوتى ( طامية )

ميرسى اوى يا حبيب قلبى - وانت فعلا اصيل وابن اصول
وجدع ومش بتنسى اهلك ومش بتنسى اصلك ومش بتنسى ناسك واحبابك واللى هما كمان بيحبوك اوى والله

يا عيال تانى بتبيعه وتلعب دومنو بفلوس

انت واثق انها دومنه مش شطرنج ؟؟:))

---

جامد يا مان يا غالى يا ابن خالى
ومنتظرين منك الكتير - ومتبخلش علينا من اللى فى الاجندة

يا عيل
من قلة المصروف مادد بوزه
وبكره هتفوزه بإزازة بيره
فى لحظة حيره
من دكانة عطا زوزو
يا كلام فى الفاضى وف المليان
يا مدغ اللبان
يا موقف طويل ... اللسان
يانظرة من جمع ع القهوة
يا قعدة مصاطب قدام البيبان
يا وشوشة النسوان ع النسوان
يا حريم فضية
يا مد ادين البصاصين
ع الساقطة واللقطة
يا هجانة تقفل بيبان رزقك
ف عز الضهر بشوية قهر
تحنى الضهر .. ونطاطى
واشوف فيكى كبير يعلى
مكان واطى
يا مستشفى منظر وبرواز
يا ساحة شعبية .. تعوز معدية
وتخلص من العكاز
يا بيت ثقافة
حيطان وبيبان وازاز
يا زمة بيرمح فيها خيل
يا ضلمة يالليل
يا وكلة السحت
يا بيعة كل الحجات والمحتاجات
بالقسط
يا سلفة الست الريفية
وسوء النية
يا مجننانى بأفاعيلك
يا طامية
داء الشيكات
بقى وشم فى جبينك
يا ايدين قصيرين مش طايلة
يا لمة الكوتشينة والطاولة
يا مزين .... وبيدين
وصاحب يلم النقطة فى الكيس
وقعدة خمرة وحشيش
وفرقة وغوازى
وقوة البيوت يروح بقشيش


تابع

ياشاى تقيييل
وشاى الضيوف تلات تدوار
فى غلاى فوق صفة ببربور
وصوت وابور
وسرير وطشت حموم
ف ئوضت النوم
يا حلت الغمزة يالمة النسوان
على بنت بكرية
يا محرمة عرضها متذوقة بدمها
يا ابو البنية جعان من عشيا
يا ام السبع عشيان
يا نقطة ومقابلة
يا سبلة
يا كوز درة شوية
طعم العسل فية
يا رغيف مقمر
يا عيش مبلول ف مشنه
يا صحن البيض وجبنة قديمة فى السمنة
بحبك شريفة
بحبك نضيفة
بحبك بعبلك
بحبك
شوارع حوارى دروب
وفيكى بادوب
يا شجرة توتة وعنباية
يا ضلايه
فى عز نار الشمساية
يا دفاية
فى عز شتويه
بحبك موت والله
بحبك موت يا طامية

انتهى
عزيزى القارء اذا كنت لم تحمل الجنسية الطمياوية فعذراً لن تفهم كلامى لما فية من شفرات لا يستطيع حلها غير اهالى هذه المدينة احسن ناس

شكراً جزيل لكم على ردك السريع واتمنى ان تنال اعجابكم
وان شاء الله هى دومنة على حسب التوقيت المحلى لمدينة المنصورة ولك بلد طريقة يا محمود يا صباغ وبلغ السيد الوالد تحياتى وانا فى انتظار رد حضرته

طيب شو رأيك انى فهمتها ؟؟
فعلا كلمات صادقه تحمل مشاعر الحب والانتماء
بارك الله فيك

اية الحلاوة دى يا ((قبانى)) بجد انا زعلت لما مشيت وانا مقعدش معاك

(MADMAN)

اقتباس:

---

المشاركة الأصلية كتبت بواسطة شيخ البلد

شكراً جزيل لكم على ردك السريع واتمنى ان تنال اعجابكم
وان شاء الله هى دومنة على حسب التوقيت المحلى لمدينة المنصورة ولك بلد طريقة يا محمود يا صباغ وبلغ السيد الوالد تحياتى وانا فى انتظار رد حضرته

---

اولا : انا مش عارف اقولك ايه على الابداع والكلام الجميل اللى مش قادر اوصفه بكلام والله ومش عارف اقولك غير متشكرين يا حبى - يا ابن بلدى يا ابن طامية الاصيل


ثانيا : انا عايز اتأكد انك لما كنت بتتكلم عن انك كنت بتلعب شطرنج - مع البنت اللى رصيت القطع غلط معاها وهى صدقت ( هو كان شطرنج ولا ضمنه؟؟ ) - انا خايف تكون اتأثرت بالكام الساعة اللى قضيتهم معانا وبقيت زينا :))

ثالثا : والدى بيسلم عليك كتير وهو مش فاضى النهاردة وناوى يدخل بكرة ومجهزلك رد جميل يليق بكلامك الجميل اللى قولته عن ام الدنيا طاميه

كلام عمر خلانى بفخر انى من طامية وحسسنى انها حاجة كبيرة اوى - مش بيحس بقيمتها غير اللى يسيبها

معلش انى طولت
بس عشان عايز اتكلم معاك كتير

(MADMAN) رغم انى خمنت ان سعتك احمد ابوالحج والله اعلم . إلا نى كان نفسى ما ارجعشى المنصورة تانى بس ما باليد حيل . وان شاء الله متعوضة

سيدتى العزيزة طيف مشكورة كل الشكر على مشاعرك الدافئة التى شاركتينا بها
ودائماً هكذا شيمة اللبيب بالاشارة يفهمو
بوركتى وجزاك الله خيراً

يا صباغ يا صغير
انا خايف تكون اتأثرت بالكام الساعة اللى قضيتهم معانا وبقيت زينا
اولاً : يعنى اية زيكم يا بين قوسين شويت نقط دحنا متربين مع بعض ياعنى سأظل ابداً زيكم ان شاء الله لان دا شرف لي وفخر .
مش بيحس بقيمتها غير اللى يسيبها
وبعدين الكلمتين بتوعك دول خلونى دمعة وفكرونى بحاجات كتتتتتتتتتتتتتتتتتتتير وزود فى الحنين

واخراً كلامك دا خلانى فى اسعد حالاتى لما تحس ان فية ناس لة بتحب وبتخلص ليك لانك عارف انا هنا عامل ازاى !!! ربنا ما يحرمنيش منكم جميعاً ويحميكم من كل سوء

هي دي طامية
تسلم يا معلم مع اني مش واخد بالي منك

ايون ايون تحيا الطمياويه وانا طبعا احمل الجنسيه مع انى مش اعرفك بس تحيا طاميه

استاذ سراج مجدى حمزاوى ابن عمدة بلدنا نورة الموضوع وشرفتة يا باشا
يا ترى اصبحت دكتور ولا لسة ؟؟؟
معلش يا سيدى مع انى كنت زميلك فى المدرسة بس انت كنت 1 /3 وانا كنت 1 / 1 دا طبعاً فى ابتدائى لا مأغزا مدرسة بنات طامة ولا مش واخد بالك منها هى كمان
وعلى العموم ولا يهمك محنا غلابة وانت ابن العمدة
تقبل تحياتى ويكفنى ويشرفنى ان انا اعرف شخصية فى مقام سعتك

ايوة تحيا
تحيا تحيا فى كل حتا وكل شارع
تحيا تحيا ام المدارس والكنايس والجوامع
تحيا تحيا فى كل ركن وكل بيت
تحيا تحيا فى كل شبر كل غيط
بس انت ابداء وخليها تحيا
وهى والله ها تحيا
ويشرفنى معرفت سعت ويثلج صدرى