جوابات حراجى القط..عبد الرحمن الأبنودى

رائعة عبد الرحمن الأبنودى عن الزوجين..حراجى القط العامل فى السد العالى فى ذلك الوقت ابن جبلاية الفار..وزوجته فاطمة أحمد عبد الغفار..

الرسالة-1

الجوهرة المصونة
والدرة المكنونة
زوجتنا فاطنة أحمد عبد الغفار
يوصل ويسلم ليها
فى منزلنا الكائن فى جبلاية الفار


أما بعد..

لذا كنت هاودت فى كسوفى ع التاخير..
واللهى ما كنت حاخط بيدى حرف.
سامحينى يا فاطنة فى طولة الغيبة عليكم.
وانا خجلان ..خجلان..
وأقولك يا زوجتنا..انا خجلان منكم..
من هنا للصبح.
شهرين دلوقت..
من يوم ما عنيكى يا فاطنة..
بلت شباك القطر..
لسوعتى بدمعك شهر يدى.
لحظتها قلت لك:
"قبل ما عوصل عتلاقى جوابى جى.."
نهنهتى..وقلتى لى بعتاب:
"النبى عارفاك كداب..
نساى..
وعتنسى أول ما عتنزل فى اسوان.."
ما عرفت ساعتها يا مرتى أضحك ولا أبكى..
ما عرفت ساعتها إذا كنت باعوز يقف القطر والا
يولى..
حسيت بعينكيى الحيرانة يا فاطنة بتقوللى..
وتسكت..
وتقولل..
حسيت -واليد بتخطفها يد الجدعان.
بالقلب فى جوفى ما عارف ان كان بردان دفيان..
والبت عزيزة والواد عيد..
قناديل فى الجوف .. زى ما بتضوى بتقيد..
. . . . . والقطر اتحرك..
وقليبى بيتنقل من يد ..لإيد..
والقطر بيصرخ ويدودو
اتدلدت بوسطى من الشباك..
(خدى بالك م الولد..
راعى عزيزة ..وعيد)
والقطر صرخ ورمح لكإنه داس على بصة نار..
ولقطت الحس قريب..قد ما كنتى بعيد:
(قلبى معاك يا حراجى هناك فى أسوان..)
............................
ورميت نفسى وسط الجدعان..
وبكيت..
وبلدنا اللى كنا بنمشيها فى نص نهار..
كان القطر فى لحظة..فاتها بمشوار..
سامحينى يا فاطنة ع التأخير..
ولو الورقة يا بت الخال تكفىّ..
لأعبى لك بحر النيل والله بكفى..
كلام.

وختاما ليس ختام..
بابعت لك
ليكى ولناس الجبلاية ولبتى عزيزة والواد عيد..
ألف سلام.

زوجك
لوسطى حراجى

ملحوظة:
إكتبى ع المظروف..
أسوان..
زوجى الغالى..
لوسطى حراجى القط..
العامل فى السد العالى..

الرسالة2

اسوان*
زوجى الغالى**
لاوسطى حراجى القط
العامل فى
السد العالى

زوجى حراجى..
فوصلنا خطابك..
شمينا فيه ريحة الأحباب.
ربنا ما يورى حد غياب.
مش أول مرة البسطاوى يخطى عتبة الدار؟؟
عمرنا يا حراجى ..ما جالنا جواب.
النبى ساعة مرزوق البسطاوى ..ما نده..
كدة زى ما كون ..دقت فى حشايا النار.
وكإن العمر بيصدق....بعد ماكان كداب..
اتأخرت مسافة كبيرة كبيرة علىّ
عارف فاطنة يا حراجى لاليها عايل ولا خىّ.
ليه تتأخر كدة يا حراجى..؟
طب والنبى وكإن ورقتك دى
أول قنديل يتهز فى جوف الدار.
أول ندعة ضو.
الدار من غيرك يا بوعزيزة..هو.
وعزيزة وعيد..
من غيرك يا حرجاى
زى اليتما فى العيد.
الواد على صغره حاسس بالغربة والعبد.
ولا عاد حتى بيطلع يلعب فى القمارى مع الولد.
اطلع واخش..اطلع واخش القاه..غيمان.
وكإنه محروق له دكان.
ويقوللى:
"فين يامه أسوان..؟
وابا..سابنا ليه يامه؟ما يمكن زعلان..؟"
شهرين يا بخيل..؟
ستين شمس وستين ليل.؟
النبى يا حراجى ما اطول قلبك
لاقطع بسناى الحتة القاسية فيه.
..............................
كل الجبلاية تسلم فردا فرد..
م الحاج"طلب حامد"لعيلة بيت على سعد"
وانشالله تكون اتعلمت ترد قوام.
وما دمنا احنا راسيين ع العنونا
والله ما ح نبطل بعتان..د
مفهوم..

اسوان
زوجى الغالى
لاوسطى حراجى القط..
العامل فى السد العالى

زوجتك
فاطنة أحمد عبد الغفار
جبلاية الفار

الرسالة 3

الجوهرة المصونة
والدرة المكنونة
زوجتنا فاطنة أحمد عبد الغفار
يوصل ويسلم ليها
فى منزلنا الكائن فى جبلاية الفار

أما بعد..

فهذا تانى خطاب ..
باعتين طيه ما قدرنا المولى عليه..
وعنبعتلك فى ظرف الجمعة .. طرد
الطرحة والجزمة بتوعك..
وكساوى عزيزة وعيد.
دورت الحسبة ف راسى وقلت يا واد يا حراجى ..
هوه يعنى قانون العيل مايدوقشى الكسوة..
غير فى العيد؟
أمال كيف العيل حيحس بابوه جنبه
إذا كان الأب ..بعيد..؟؟
بقى أول ما دلقنا يا فاطنة بابور السد على محطة إسوان
أنا والجدعان
حسيت بالدوخة
مش أول مرة بسيب جبلاية الفار..؟
رحنا المكتب..
طلعنا البطاقات..
ومضينا على الورقات
آه يا "فطانى" لو شفتى الرجالة هنه..
قولى ميات..ألوفات..
بحر من ولاد الناس..
إللى من "درجا" واللى من "البتانون"
واللى من " أصفون" و"التل"
جدعان..زى عيدان الزان..سايبين الأهل.
وتطلى فى عين الواحد يا ولداه ع الغربة.
عارفة يا مرتى الراجل فى الغربة يشبه ايه..؟
عود درة وحدانى..ف غيط كمون.
حسيت بالخوف ناشع فى عروقى زى البرد.
قضينا الليلة الأولانية فى أى مكان.
العين مشقوقة..
والبال..
زى الغلة اللى بتسرسب من يد الكيال.
وندهت عليكم قلت :يا فاطنه أنا بانده
سامعانى؟
سامعينى يا عيال؟
النبى لولا الخوف واللومة من الرجالة..
لا ركبت القطر وعدت
قبل ما اروح لموظف
قبل ما ارد سؤال.
وقعدت أعقل نفسى وأقول: يا حراجى يا بوى
أمال جيت ليه؟
الخايف م الغربة مايجيش
اتحمل علشان كسوة عيد..ورغيف العيش
لكإنك ياخى رحت "الديش"
من خوفى يا مرتى
قعدت أهدى الرجالة.
فاطنة..
أول ما تفكى الخمسة جنيه
اطلعى ع الفور..
وادى حساب "عمران" وجنيه "بمبة الصباغ"
بلا كتر كلام
سلمى ع الولد..وع "الحاج التايب"..
بلا كتر كلام
سلمى على كل اللى لينا فيهم نايب..
واوعى يا فاطنة لما ارجع وأبص ف وش اللولاد..
أعرف إن أبوهم كان غايب.

واحنا هنا بنستنى الجوابات بفروغ صبر
طولل ما الجوابات رايحه وجايه..
اعتبرى كإنى باجى اشوفك..
واجى


زوجك

لاوسطى حراجى

الرسالة4

اسوان*
زوجى الغالى**
لاوسطى حراجى القط
العامل فى
السد العالى

وصلنا الطرد وجانا المبلغ يا حراجى..
أحياك الرب وأبقال ألفين عام..
ولا عاد يقطعلك عادة ولا حس..
ولا يقفل لك كف..
ولا يطوى من قدامك سجادة الخير والسعد..
أما بعد..
فاحنا وزعنا المبلغ زى ما قلت..
ولعلك ماتشغلشى نفسك بينا وابقى ف راحة البال..
إحنا يا حراجى - بعد الشر- غن ضاقت بينا الحال.
يكفينا ريال..
كفاية علينا البسطاوى الضهر يخطى عتبة الدار
امبارح ..جانا "الشيخ قرشى " ..وخبط ع الباب..
جه ساعة المغرب
قاللى لا بدن ما نبص لعيد..
قاللى :" يا بت المرحوم..
الواد لازمه الكتاب
يوم السوق..
إتدلى هاتى له قلمين بوص..ودواية..ولوح"..
وانا بينى وبينك يا حراجى عاوزاه يكبر
ويعوضنا ن الأهل ويعمل لنا قيمة ..
عاوزة تكون قيمته ف جبلاية الفار قيمته القيمة..
اللى بتقوله عن أسوان يابو عيد..
حكاية ولا حكايات أبو زيد..
هيا يعنى..مش زى بلدنا..؟
أمال ناسها بيسووا ايه..؟
مابيشتغلوش ليه؟
وانت ..طول عمرك راجل صاحب فاس
فاهمهانى دى
لاحسن عاملة فى راسى زى الخبطة..
كيف صاحب الفاس يصبح أوسطى..؟
صاحبك "تكرونى"لما أتى بالطرد..
شيعنا معاه الموجود..
..........

فى الليل يا حراجى تهف عليا ماعرف كيف..
هفقان القهوة..على صاحب الكيف..
وبامد إيديا فى الضلمة ألقاك جنبى.
طب والنبى صح ومش باكدب يا حراجى.
وباحس معاك ان الدنيا لذيذة.
كيف حال "عبد العال التايه" و"على اب عباس"؟..
وقوللى يا حراجى.
بتاكل كيف.؟ وبتلبس إيه؟وبتقلع إيه؟
بتنام فين؟
قاعد فى المطرح مع مين؟
مين اللى بيغسلك توبك
وبتتسبح فين..؟
.........

فى نهاية القول..
انا راح أشيع عيد ع الكتاب.
فابعت له ووصيه على شد الحيل..
وجميع الناس فى الجبلاية
عايزين لك كل سعادة وخير.
وبيتمنولك تانى ترجع فى سلامه..
تعمر مصطبتك..
وتقيد اللنضه فى الدار.

زوجتك

فاطنة أحمد عبد الغفار
جبلاية الفار

الرسالة 5

الجوهرة المصونة
والدرة المكنونة
زوجتنا فاطنة أحمد عبد الغفار
يوصل ويسلم ليها
فى منزلنا الكاين فى جبلاية الفارمشتاق ليكى شوق الأرض لبل الريق..
شوق الزعلان ..للنسمة ..لما الصدر يضيق
مشتاق ..وامبارح..
قاعد..قدامى عرق حديد..وف يد الفحار..
غابت عن عينى الحتة اللى انا فيها ..وغابوا الأنفار
تحت الأنفاق.
الضلمة يا فاطنة
بتساعد على سحب الفكر..
تلاقيكى ولا عارفة الانفاق.
ولقيت نفسى يا فاطنة طيرة مهاجرة
والطيرة جناحها محتار
ولقيت نفسى على بوابة جبلاية الفار..
باخد الأحباب بالحضن
كانس كل دروب الجلاية بديل توبى
طاوى كفوفى وباخبط بيهم على صدر الدار
قلتى لى مين؟
مسيت الدمعة فى حزنك بايدى.
ما عرفت خدتك فى حضانى ولا انتى خدتينى فى حضنك
وعزيزة وعيد حواليا يشدوا الجلابية
ويشموا ف غيبتى وفى ايديا..
وقعدت بيناتكم ..وبكيت..وضحكت
لما لمحت عصايتى وتوبى..وفاسى..ومداسى
يمكن ساعة ..وقف اللمهندس على راسى..
ولمس كتافى بصباعه..قمت لفوق..
طبطب عل كتفى..
وخدنى من يدى بره النفقات فى النور.
ضيعنا نص نهار.
وسألنى ..قلت الشوق
قاللى اسمع يا حراجى أقوللك..
ويا فاطنة قعد يحكى ويتكلم..
ألقط كلمة ومية تروح..
وكلام..م اللى يرد الروح..
وحكى لى عن أسوان والسد..
وحكى لى عن اللفرنج وعن حرب المينا..
فى الجوابات الجاية يافاطنة عاقوللك واحكى للك
أما عن نفسى..فانا لا بخيل ولا شى
كيف اللى ف قلبى بس يا ناس ..أوريه ف جواب..؟
أما عن عيد..
فأنا من بدرى يا فاطنة قلت يروح الكتاب..
واقل ما فيها..
عيفك الخط ويحفظ له كام سورة
والامر ده بس يا فاطنة يعوز شورة..؟
على خيرة الله.
ووصلنا فطيرك..
قمعزت ما بين الرجالة وكلناه..
يعنى انا دقته..؟
والنبى بعينيا قعدت اتفرج ع الرجال بياكلوه
كنا طالعين م الشغل نشر عرق..
بت يا فاطنة..
النبى فى الدنيا ..ما فيه واحدة تسوى فطير زيك..
شفت ده فى عينين الرجالة.
سلاماتى لكل اللى يقولك شحوال حراجى
وسلامى لعزيزة وعيد..
أمانة عليكى لحين ما جى.

زوجك
لوسطى حراجى

الرسالة 6

اسوان*
زوجى الغالى**
لاوسطى حراجى القط
العامل فى
السد العالى

أما بعد..
فنعرفكم ..إحنا بخير..
ولا يلزمنا إلا رؤية وجه الغايبين.
"مرزوق البسطاوى "..مرته وضعت..حدفت ولدين
و جوابك وصل الجبلاية امبارح..
لكن مرزوق ..ماسرحشى غير اليوم.
ومادنتو ف صحة وعال..
احنا مايلزمناش ..أكتر من ورقة ف ظرف.
ناس الجبلاية كبيرا وصغيرا عاوزين رؤياك.
قوللى يا حراجى بحق..
عامل كيف بس ف ليل الفرقة..؟
واللهى ما خش دناغى حاجة م اللى كاتيه فى الوقة..
وياخوفى عليك..
بيقولوا فيه ناس..ماتوا فى اللى اسمه السد..
طمنا عليك يا حراجى.
.............
قسمنا مع بيت العطار..بلح النخلة الشرك..
إذا كان لازمك منه يا حراجى..ابعت قول..
مش راح تاجى..؟
طالقالك فى البيت فروج..
علشان لما تعود م الأسوان دى..تلاقى لك حتة لحم.
وام"على اب عباس" مشغولة عليه.
بدرى ماراسلهاش ليه..؟
أهى طول اليوم..قاعدة ع العتبة إيد على خد..
وماسكة عود قش بتبكى وتخطط فى تراب الدرب..
طمنا عليه يا حراجى يرضيك المولى.
وإذا كان عال وف خير..
الضحك مع الجدعان ..ولا رسالة لأمه المشغولة أولى..؟
قلب الأم اسخن من رمل القيالة لما يقيد.
يبقى عش خراب بيسرخ على طيره.
وعلى اب عباس عارف ان امه..
مالهاش فى الدنيا غيره.
وامبارح كانت وسط الحريمات..
قاعدة تمسح دمعتها .. ف طرحتها وتقول:
اللى مانعنى من الموت..
اليوم اللى أشوف "على " فيه متهنى وفاتح بيت..
يومها أقول للدنيا ضحكت عليكى
خلاص غورى.
................
قولله يشيع يا حراجى..الناس زعلانه..
كل الجبالاية واخده فى خاطرها منه..
وامه عنيها كستها الدخانه
أختك "نظله"
رجعت بيت الحاج ركابى امبارح من (درجا)
قالت جاية تريح عن خالاتها وحتولد فى اللى يهل.
يا حرجى..جوابك بيرد المية للزور الناشف ويبل.
ده احنا عايشين هنا ع السيرة..
و زادنا الأخبار.

زوجتك

فاطنة أحمد عبد الغفار
جبلاية الفار

الرسالة 7

الجوهرة المصونة
والدرة المكنونة
زوجتنا فاطنة أحمد عبد الغفار
يوصل ويسلم ليها
فى منزلنا الكاين فى جبلاية الفار

قولى يا فاطنة للى بنقولله وللى مابنقللوش..
الدنيا مش عيش بس ولا قروش
ولا غطيان وفروش.
قولى يا فاطنة للكل..
ان احنا كنا هبل..
وضيعنا العمر فاشوش.
حتقولى عليا اتجنيت والا عييت
وياريتنى ما رحت الداهية اللى مسمينها اسوان..
ولا كنت طلعت من البيت.
لا يا فاطنة اللى بيقول القول ده..
هو حراجى اياه..
بس اللى قلب راسى يا فاطنة مش سهل.
طب وحياة اولادى ساعات اصحى فى الليل..
عينى تتمط يا فاطنة واراقبكم بينالنجم..
واعرف إن احنا ماكناش أهل..
طيب كيف أهل يا فاطنة!!
وحياة أولادى يا بت الخال حاتجن.
قال أهل.."ونبيهه بت المنزوع.."
مرة اتشاكلت قدامك مع "ام الملوى".
واتفتح الموضوع.
وتقوللها يا حزينة
ياللى ابوكى مات م الجوع
والدنيا يا فاطنه فى البر التانى..
قالبه الدنيا؟
ماهو ده اللى معرفتلى كيانى..
ومدور لى راحة راسى
ومخلينى زى ما اكون واحد تانى.
"نبيهة المنزوع" فى البر التانى من الدنيا..
لبست بدلة يا فاطنة سامعانى؟لبست بدلة
ونزلت وسط المكن المتخبل تربط وتحل.
احنا يا فاطنة فين م الدنيا..؟
فين مخ الدنيا الجبار..
ماعرفشى كيف جبلاية الفار..؟
ليه ام على أب عباس ملحوده حداكى فى الدرب..
وقاعدة تخطط فى ترابه وتعدد.؟
يا أهل الدنيا..ام على أب عباس بتعدد وبتبكى..
لإن على قاعد وسطينا.
طب تاجى تبص فى وشه
والنبى بقى زى اللى بيسرقوا مراكب شحن ف بحر
المينا يا ناس.
ينعل ام على اب عباس واللى جاب ام على اب عباس.
ده الراجل من كتر اللى شافه بقى شعره أبيض.
وقال..يكتب جوابات..؟
خليها هيه ف حالها هناك وسط الحريمات
دلوقت يا فاطنه..مش قرشينها بيجوها..؟
خلاص
دلوقتى على اب عباس سكرى؟..حشاش؟
م الصنف اللى بيغوى النسوان؟
ده حتى بطل دلوقتى كرسى الدخان.
وحكاية الشوق الزايد ع الحد ده.ممنوع.
سيبك من غربة جوزك واستنبهى للموضوع
ده انتى يا فاطنة نبيهه.
وان عيد اتعلم بكره..
وقرا حكايتى فى الجرانين..
يبقى عندك علم.
طب والنبى من جهة الهده..هده..
لكن راس الواحد زى ماكون بتلف ف حلم.
أما حكاية كيف صاحب الفاس يصبح أوسطى..
مبسوط أنا ع اللى عامله ف راسك زى الخبطة.
يبقى برضه رجايا منصان..
وضرورى ماشية يا فاطنة ف سكة فهم.
لفى العياييل فى الليل م البرد..
ويقدرنى على ماتخش الشتوية
انقى لى حرام صوف.
شدى حيللك مع نفسك وولادك إعملى معروف..
واما يعدلها المولى حناجى

زوجك
لوسطى حراجى

الرسالة 8

فاطنة احمد عبد الغفار
جبلاية الفار

أما عن ان احنا بنتشوق لك فاحنا بنتشوق..
والشوق فى قلوبنا ناسِس نسسان.
ولا يمنعناش من شوقنا ليكم حتى قطع الخطابات.
هيه اللى حبلت بالواد..
تقدر برضه جوزها يغيب والا ولدها..وما تتشوقش..؟
ده يبقى قليبها اسود من قلب قزازة الكحل.
يا سلام والله يا حراجى يا سلام..
ليه غايب ليك يوم ولا ست تيام..؟
ده احنا دخلنا ف رابع شهر
والايام تقلانة عليا يا بوعيد.
وحكاية الشوق دى لا فى الإيد
ولا ليها مواعيد.
وماله طب لما انتو تشتغلوا هناك
واحنا هنا نشتاق؟
إحنا عاجينا شوقنا ليكم أحسن م الأنفاق.
وقوللى قال:
تلاقيكى ولا عارفة الانفاق..
طب مش عارفاها . وأدينى قلت.
يعنى معرفتى ليها حتزودنى دراع؟
وكلامك فى ام على اب عباس صعب
لكن لما قالوا امبارح إن البسطاوى فى الدرب..
طلعت اجرى قلت حراجى بعت لى جواب..
وطلع من "على "قلت ياما انت كريم يارب.
بصيت لك فى السر ولولوت ودانك.
ودعتلك ام على اب عباس..
قالت دلوقتى لولا حراجى كان حيرد يا ناس..؟
وقعد مؤزوق يقرالها ودمعتها تخر.
تكلمها النسوان تضحك..لكن تقعد تبكى ؟
وتقول مالكم بيا بس يا خلق..؟
سيبونى ابكى.
أهى دمعه تطفى القلب المحروق.
وانت باعتلى جواب تمنعنى عن الشوق؟؟
.........................
اتغير قولك يا حراجى..اتغير صح.
وحديتك بقى زى حديت الرادو.
زى كلام الأساتيذ.
طب اقولك قوله وماتقطعشى الورق بسن الريشه
وانت بتشتمنى؟
النبى نفسى أشوفك اسوان..
أشوف المكنة والمواسير والانفاق..
وأقول ما تغفلقهاش.؟
نفسى اشوف صاحبك لمهندس ده..
متهيألى كمان يمكن وشك دلوقت اتغير
يمكن صوتك برضه
يمكن شبت..؟
........................
عيد راح الكتاب واهو ماشى زى القكر..
وعزيزه امبارح سخنت لكن قايمه الصبح مليحه..
يمكن حتحصّب.
خلصوا القريشات.
دلوقت اختك "نظله"حتولد بكره ولا بعد يومين
مش برضه حنديها قرشين..
وشوية قمح وسمن؟
دى "نظله " يا حراجى خيرها علينا.
......................
بتوِجّ النار فى الجوف يابو عيد
وماغير إلا جوابك وبس
اللى ف مقدرته يهدينا
ويبرد فينا النار.

زوجتك
فاطنة أحمد عبد الغفار
جبلاية الفار

الرسالة 9

الجوهرة المصونه
والدرة المكنونه
زوجتنا فاطنه احمد عبد الغفار
يوصل ويسلم ليها
فى منزلنا الكاين فى جبلابه الفار


"زوجتى ..
أم أولادى .. وتوبى.. ولحم رقابتى..
فاطنه احمد عبد الغفار


زوجتى وأختى
سترى ..وغطايا .. والكتف إللى تملى شايلنى ..
وشيلتى.

فاطنة يا لنضة ليلى ومصطبتى..
وباب بيتى وعيلتى ..

فاطنة يا ست الناس.
والله ما ضيعنا يا فاطنه غير..الفاس.
وتارينى يا فاطنه عرفت الهم ف يوم ما عرفت الفاس
أدعى على ابويا اللى علمنى أغوى كلمة أنفار.؟
فى الجبلاية يا فاطنه
الواحد يغوى الكلمة دهى من غير ما يحس.
ما يعرف فين غووهاله وف أى مكان..
زى تمام شرب الدخان.
أنفار أفنار..
ونعاود آخر الليل زى الحيطة المايله ع الدار..
ماليين الدرب غبار وهزار..
وأتارى طيلة العمر الواحد فينا يا فاطنه
ماشى المشوار بالمندار
نفرح بالعشرين قرش..
ويوم السوق نتباهى برطل اللحم
نمشى بيه قدام الناس
شايفه يا فاطنه..؟
يقطع ده اليوم الطين اللى اتعلمنا فاس.
كان يبقى صح الفاس لولينا أرض..
أهى بس ف دى
يبقى الفاس فاس
لكن ما خيبها شغله يا فاطنه
إن كانت فى أراضى الناس.
حتقولى عليا اتغربت واتغيرت..
ابدا وحياة النعمه يا فاطنه..وحاحكى لك:
............................
طبعا.
إحنا قعدنا كتير ساكتين قبل ما ياخدونا الشغل
وولنا هناك كان يوم إربع.
طبعا أسوان دى جبل.
هيه صح يا فاطنه فيها سرايات ودروب إسفلت..
لكن ده فى الشقه التانية.
إتسلمنا لواحد ريس تخنان وبكرش
إسمه "الحاج بخيت.."
شوفى احنا بردنا كيف؟
لكن برضه مارحناش فى الأول..
وقعدنا نعبى بالفاس والزنبيل..
حجارة صغيره الواحد قد المليم..
ونحولها يا فاطنه فى طرمبيل ما عرفش بيروح
فين..
بس طرمبيل عالى
يمكن عالى قد القطر.
طب عارفة
يقدر واحد من دول على ضهره يشيل ميت نخله.
وف يوم ..نقانى "الحاج بخيت".
أنا وتلاته معايا عشان نزرع "دلاميت"
أصعب ما يكون فى اسوان ..هيه حكاية الدلاميت.
صوابع طولانه كده..ننكتها فى اللجبال..
ونقيد السلك يا فاطنه ورمح..
بيفرقع ..نجرى ونتكفى..
صدقى لما يا فاطنه يقولوا قدامك
شفنا خلق ..بتتوفى.
أصعب ما يكون اى اسوان هو الدلاميت..
تتشال الدنيا وتقعد أى جبل ينزل فرافيت.
يقعد مدة فى وادننا الزن.
تقولى يا فاطنه لو شفتى الدلاميت..
الجبل اتجن.
وقعدت اقول ليه يا حراجى..
شيلوا ويعافروا فى الجبل اللمعافرة دى..؟
يكونوش ناويين ع الزرع يا جدعان؟؟
وطب دى حتت زرع..؟
يعنى ضايقه الدنيا معاهم مش لاقيين
غير الأرض الطوب..؟
هيه الناس دى يا ولاد بتفكر بالمقلوب..؟
وبقينا آخر الليل نفرش على حته فى الشغل
واقعد أتكلم واتحدت طول الليل أنا "والملوى"
"وعلى اب عباس"
هوه صح الدلاميت
أسهل من شيلة الفاس..
لكن بيقلعوا فى الجبل العالى ده ليه؟
مالقينا جواب..
أصلى اللى معانا يا فاطنه مش من أهل اسوان
علشان يقولولنا.
جايين زيينا من ميت جبلاية فار..
ماهو كانوا هناك زيينا بيشتغلوا أنفار..
يخرب بيت اللى ضيع عمرنا هفت وطلعنا وشيب
راسنا فى حكاية الانفار.
طب عمرك سمعانة بالدلاميت .؟
صوبعين لما يطرشقوا تحت البيت..
عايجيبوا عاليه فى واطيه.
وانا حتى كنت حاقرب كيف م الدلاميت..
ولولا ما اختارنى يا فاطنه "الحاج بخيت"
إن كان على اسمه أهى كل الناس بتقول
دلاميت دلاميت..
أصله هوه اسمه حلو
دلاميت.
لكن فيه واحد قرب وشه فيه شافه..؟
ده حتى فيه شغاله فى الدلاميت ويانا..
من غير ما يحققوا فيه
ولا يعرفوا ده اللى فى العلبه وبيفرقع لما يحطوه..
كونته إيه؟
لكن جوزك صدق ما لقيها.
عرفونى قوام..
وغويت الشغله يا فاطنه..
تفكرنى بأيام العوم..
مش فاكره اتعلمت العوم قبل بقية الولد..؟
بقى ده يقول يا حارجى
وده يقول يا حراجى.
اهو من تحت الشغله دهى
إتعلمت الإخير فى الجوابات
كنت أنام واصحى أفكر واحلم فى الدلاميت
لا يعال ولا مرة ولا بيت.
"وعلى اب عباس " مارضيش..
قاللى "سيبنى فى الفحت..
اللى عارفه احسن م اللى ماتعرفهوش.."
قاللى "سيبنى فى الكحت..
شغلانه عارفها وعارفانى..وارتحت
مالى.؟تاجينى خبطة ..وارمى وراى..
خلينى قاعد عايش لما تقضى يومينها".
قلته له"يعنى أنا اللى ماليش ناس يا على..؟"
قاللى : لأ ..بس انت معافر..
والدلاميت اعمى وكافر.."
وحاقولك إيه ولا ايه..؟
جرن حديت ما يفض .. يا فاطنه..
وانا لولا عارفك جدعة وعارفانى عاقل
أبعتلك.؟
لأ..أنا عارف القصة تخض.
سلمى على عيد..
وقولى له الرب يقرب فى المواعيد..
ده نهار لقياكم هوه الفرحة يا فاطنه.
وهوه العيد.

زوجك
لوسطى حراجى

الرسالة 10

اسوان*
زوجى الغالى**

لاوسطى حراجى القط
العامل فى
السد العالى

أما بعد..
قاللى قولى لابويا كمان جوابين.
وأكون اتعلمت اقرا الورقة وأفك الخط.
قاللى على طول م البسطاوى بيقرا الجوابات..
سرنا مكشوف..
واللى جوانا يامه يكون معروف.
رديت ع الواد عيد يا حراجى
قلتله ما تخافش
ولو انى معاه فى القول..
قلت: أبوك بيقول انقلوا قولى للناس..
هو أبوك بيقول مشتاق اتمد معاكى فوق الفرش..؟
ده بيتكلم ع الفاس والناس.
ولو انه لو قال..
لكن آدى القسمه
بلانا براجل يغوى الشمش
اكتر من سهر الليل
كمل يا حراجى..قول.
واللهى طول حسك ما بيطلع م الورقة..
وانا زى ما كون شايفة الأسوان بالعين
والنبى يبقى انت صح بقيت اوسطى..
بيقولوا قال..لابس..
أقول ايه بس النبى مكسوفه يا زوجى..
قلعت التوب قال..؟
بيقولوا بقيت مهندس يا حراجى وبيقولوا انك
مستوظف صح.
كمل يا حراجى..حكاية السغل..
بس اوعى برضه تنسى تقوللى ساكن فى المطرح مع مين..
وبتاكل ايه؟وبتلبس إيه؟وبتقلع فين.؟
مع إنى خابره انك واللهى ما حترد
عزيزة دلوقتى بتنطق..
بتقول امبوه..
فيه عيل يقول امبوه قبل ما ينده على ابوه..؟
اهى هيه البت عزيزه
مانت غايب عاد.
..........................
فى المغرب رحت قعدت ف عتبة بيت "طلب الحداد"..
هتقول اتباهت..
ابدا والله يا حراجى..
ما هم اللى فتحوا السيرة عاد.
وأقول الحق..
انا صدقت لقيت ناس بتفتح لى السيره..
وحكيت للحريمات كل اللى قلته فى الجوابات..
اعمل لك ايه..
مانت بتكتب لى كلام
يكسر صندوق القلب ويطلع وحده..
وفيه فى الجبلاية حريم
خايفة يا حراجى ما تبعت رجالها لإسوان
"عيشة اب عفون" قالت فيه ناس بتموت.
قالوا الجبل بيتهز وبتطوطح ويقع الولد.
وقالوا ساعات الولد يدق فى توبها الكبريت.
أقول الحق انا فى الأول قلبى اتمرجح
واتهزيت..
لكن اتفكرت كلامك ع الدلاميت..
وفتحت القول ..قلت..وحكيت..
النبى يا حراجى فاطنه كانت زى قناية مطلوقه..
لاهم قاموا يسدونى ولا انا اتسديت.
واما رجعت البيت..
حسيت انى حراجى..
حسيت انى زيك واجعص منك.
ايه يعنى لما الواحد يزرع ورده يا حراجى
والناس ماتشوفهاش..ولا تتنشقهاش..
إنتو زرعتوا الورده..واحنا نشممها للناس..
مش لازم نعمل حاجه زييكم..؟
إبعت يا حراجى وقول:
إحكى لى حكاية الأنفار
ملعون خاش اللى يكتب ورقه لمرته..يا راجل..
ويدكن له فيها شوية أسرارا.

زوجتك
فاطنه احمد عبد الغفار
جبلاية الفار

الرسالة 11

الجوهرة المصونه
والدره المكنون
زوجتنا فاطنه احمد عبد الغفار
يوصل ويسلم ليها
فى منزلنا الكاين فى جبلاية الفار

احنا يا فاطنه اللى لا عرفنا قرايه ولا كتابه
غلابه.
لما عرفت كده يا فاطانى زعلت الزعل الواعر..
عمر يا فاطنه ما فكرنا فى الدنيا..
ولا قلنا جايه منين رايحى على فين..؟
غير كلمة ربنا يسترها معانا دنيا وآخره..
والآخره.؟
آدى العمر اللى دبل على عوده فى تراب الجبلايه.
ياما لولا حسين العكرش قاللى السد..
كنت زمان باتعتر وأقف واتنفض وامشى تانى
فى طريقى المتسد.
السد يا فاطنه..
فتح عينى ع الدنيا زى ما كون
طلعنى للنور من بير.
علمنى كتير..
ويوماتى بيعلمنى كتير.
"والباشلمهندس طلعت" دوما يحكى لى حديته
المسحور.
دايما يملى الدنيا ف عينى نور
ويخلينى أشوف الحاجة من تانى.
يعرف جبلاية الفار..وكإنه عايش فيها..
يعرفها أكتر منى.
طول ماحنا فى الشغل يكلمنى
واد عال وأمير..من أصل..
وليه ناس..
ولو انه قاللى ف مرة:
"يا حراجى..
سيبك م البدلة
انا ابوى زيك راجل صاحب فاس.
من تحت عرق رجله اتعلمت.."
وحكاية الأستاذ طلعت دى يا فاطنه حكايه..
طبعا شافنى هوه مرة ف مرة ف زرع الدلاميت..
باشتغل الشغلانه غاويها
اجرى من حرصى على عمرى..
مش خوف
ولا عمرى اتكفيت.
واصله جات مده هناك بقى كل الخلق تقول يا
حراجى..
وانا كنت كمان عاجب نفسى.
أمشى مفروط إذا رحت أو لما اجى.
وانا نازل مرة من فوق التبه .جرى ومسكنى
قاللى عاوزك يا حراجى.
سيب الشغل اللى وراك وتعال.
رحت له فى المكتب..مكتبه فى الخيكه..بره..
فى الشمش
خدنى من يدى وقعدنى وسقانى الشاى..
(طلعت افندى) أول افندى فى الدنيا يا فاطنه يطلب
لى واحد شاى.
وشربت وهوه بيتكلم.
طبعا هو قال..
بس انا فى الوقت ده كنت ضلال فى ضلا
قاللى فى الآخر كيف الحال..؟
أنا قلت له مبسوط..
وانتى عارفانى مؤدب ولما أرد سؤال.
هوه كان مبسوط منى انا مش عارف ليه
خدنى..ومررنى فى منطقته
لسه يا فانه ساعتها لا كان سلك ولا انفاق..
كنا يادوبك بنكسر صخر ونشيله.
هوه كان عنده عدد.
وكمان كان فيه حواليه عمال
لابسين لبس افندى وحاطين..برانيط..
كنت أنا لسة بشاشتى وطاقيتى.
قاللى إيه رأيك يا حراجى..؟
قلت له شغلك صعب وعاوز فهم.
قاللى تيجى معايا.؟
إتخبلت يا فاطنه ..قلت له لا..
قال ليه يا حراجى..؟
قلت يا طلعت افندى انا راجل صاحب فاس..
أنقل حصى معقول.
أزرع دلاميت واجرى معقول.
لكن أبقى وسط أفندياتك دول مش معقول.
مش حافهم حاجة..
وتانى ما منه يمكن ناوى تشغلنى..
أجيب الشاى للرجال.
قاللى يا حراجى دول عمال.
عاوزك تبقى واحد من دول..وحتبقى..
وحتبقى واحد عال.
إتبرجلت يا فاطنه عين فى الجنه وعين فى النار
قلت لنفس:
وماله لما تعافر ياخى..
وافرض ماتعلمتش..
مش عار.
أنت لازم تعرف إنك جيت اسوان..
مش قاعد فى الدرا.
وماتتعلمشى ليه؟..ده انت تتعلم تبقى سيد الكل.
بس حكاية فرى المواسير دى.
كل يومين حتبوظ منى المواسير وحتتنى المسامير.
قاللى الاستاذ طلعت.. الله يخليه لشبابه يارب
إدعى له يا فاطنه كتير..
قاللى بس انتت انوى وانا عارفك يا حراجى نبيه
قلت ايه؟
قلت له بلا حاج بخيت..بلا دلاميت..
حاجى معاك.
وده برضه اللى خلى يا فاطنه جواباتى تتاخر.
لسه يا فاطنه الرحلة طويله
والأيام جايه..
بس حراجى خلاص
بقى يغوى الإيام..
بيخاف على عمره زى النسوان لما تعجز..
أصل يا فاطنه يا مرتى فى إيديا مسكت الخيط.
وانتى عارفه..
النور فى الضلمه ليه قيمه..
حتى لو كان جاى من خرم صغير فى الحيط.
الورقه خلصت يام عزيزه..
وقلبى مليان.
ومع الظرف حتستلمى فلوس.
......................
بخصوص "نظله"كتر خيرك.
وهو يا فاطنه فيه فى الدنيا واحده بتفهم رد جميل الناس..
غيرك؟
وسلامى لكل الجبلاية واحدا..واحده

زوجك
لوسطى حراجى

الرسالة 12

اسوان*
زوجى الغالى**
لاوسطى حراجى القط
العامل
فى السد العالى


حراجى القط..
يا اغلى من قشرة عينى وحيطان بيتى وولدى..
ربنا يتاقى لك فى عيالك وف مالك..
ولا يقفل قدامك سكة
ولا يقطع لك مشوار.
جانى جوابك.
ما بتسألنيش ليه ع اللى بيجرى لما يجينى الجوابات؟
كيف جسمى يسخن ويبرد .
وقليبى يرقص تحت التوب..؟
النسمة تهل عليا أول ما يخش جوابك.
باعمل ولا كنه هامممنى قدام الناس..
أقلب واعدل ف ايدى الظرف.
بعدين اتطلع للبسطاوى..
وأقولله ..طيب خش اقراه.
يتملوا عليا الحريمات..
يقعدوا من جوه الباب..
مرزوق وسطيهم بالجوابات..
وأقول طب مش تستنوا لما مرزوق يشرب كباية
الشاى..؟
وأقيد النار وأعلق فوقها المية وجوابك على حجرى..
ان قمت أروح واخداه..
وإن جيت أقعد على حيلى تانى..
أقوم تانى فى حجرى ..حاطاه.
وأسوى الشاى وانا سانعاهم ورا ضهرى بيتغاظوا..
وأصب الشاى وأقعد وسطيهم..
واما أسلمهم واحد واحد كبايته..
أنا اللى أقص الظرف..
وادى له الورقة بيدى عشان يقرا..
الله يسترها معاك ويخليك ويحبب خلقه فيك يا رب
من يوم ما خدتنى يا حرجى وانت مكبرنى ف عين
الناس..
ومحسسنى انى ست الكل.
الناس تتلم علينا وتقعد حوالينا كإننا عيلة..
يا ما نفسى صح يا ناس..
أحس انى ولو حتى لحظه..
قدرت أخفف يا حراجى عنك شيلة الشيلة.
النبى جواباتك بتنور ضلمة مخى صح..
وضلمة مخ الحريمات.
كل ده يا حراجى جرى لك فى اسوان؟
ده انت بقيت عفريت..
امال ده ما كانش باين ليه يا حرجى هنا فى البيت؟؟
كنا حابسينك فى البيت.؟
وساعات لما أكون قاعدة لوحدى بانقى الغلة..
والا باعبى الجرة.
أقول وحياة الرب حرجى حرام فيكى يا فاطنة..
برضه كان لازمه بت اجدع منك..
مش يعنى تخن وطول..
حراجى عمره ما شافنى كده..
حراجى ..الكلمة ساعات تغنيه..
وتخليه ينعس ليلته مطمن البال
وساعات برضه أقول:
مانا برضه مليحة..
يعنى هيه الغيرى دى
برضه حتشيل فى عينيها اللى انا شايلاه لحراجى..؟
له..
أنا أكتر واحدة فى الدنيا تعز حرجى..
هوه حراجى عاوز ايه م الدنيا
غير ان الضحكة لما تطلع من قلبه تطلع مرتاحة..؟
وانا على قد ما اقدر ..بادعى لك.
..باكشف شعرى للنجم وبادعيلك يا حراجى..
..وأقول ..ميتى حتاجى..؟
وأشوفك بعينيا..
وانت بتخطى عتبة الدار.؟

زوجتك
فاطنة أحمد عبد الغفار
جبلاية الفار

الكتاب فيه 24 رسالة ..وبإذن الله أكمل نقلهم بعدين :)

تقبلوا تحياتي وإحترامي :)

وانا تعبت صراحه
شويه وارجع اكمل:(

جميل جدا

الابنودي كم احب ان اقرأ له خاصة وانه يتغنى باللهجة المصريه البسيطة المحببة للقلوب

مشكورة جدا عزيزتي سما واتمنى ان تكملي هذه الجواهر لتزيني بها ركننا الادبي

شكرا ليكم ..وبإذن الله هنقلها كلها إن شاء الله :)