دبور و كاب و لنضه

http://i31.tinypic.com/35kk8qx.gif

دبور و كاب .. ولنضه !!!








من كام يوم كده كنت قاعد باشرب فيسكافيه في اوضتي وباتفسح عالنت وفاتح شباك الاوضه والحياة منجهه عالآخر .. واذ بي أُفاجأ .. بدبور راح داخل علي الاوضة .. واتجه فورا على اللنضه بتاعة الاوضه واللي كانت منوره .. وعمال يخبّط فيها
والحق اقول .. واقول الحق .. خفت شويه عشان احنا بنسمع ان الدبور لدغته والقبر .. قمت طافي شاشة الكومبوتر وفاصل الماوس عشان بينور .. ومشغل التكييف على اسقع درجة - وهقول ليه شغلّت التكييف على اسقع درجة - وغطيت نفسي بتيشيرت مرمي على الارض جنبي – وبرضك هقول ليه التيشيرت كان مرمي عالارض – ومسكت الماج بتاع الفيسكافيه في ايد .. واتجهت على باب الاوضه ورحت فاتح الباب ومطفّي النور بتاع الاوضه وخارج .. وقفلت الباب ورايا:-O









التوضيح :اللي جه في دماغي ان الدبور بما انه اتجه عاللنضه .. واللنضه سخنه .. يبقى بيحب الجو السخن .. وبناءا عليه رحت مشغل التكييف عشان الجو يبرّد والدبور يسقع ويسيب الاوضه .. ولأني فنان بوهيمي ومهندس لاوذعي .. فاللي يدخل اوضتي يلاقيني معتبر الدولاب ده شيء ثانوي .. وكل هدومي عالارض بتعمل لوحه سوريالية المعالم .. عشان كده التيشيرت اللي اتغطيت بيه كان مرمي عالارض جنب المكتب











لما خرجت بره الاوضه ومعايا الفيسكافيه .. قعدت أفكر شويه .. هو ايه اللي جاب الدبور للدور التاسع في العلالي .. أمّا دبور ناقص وعنده تطلع طبقي صحيح .. واساسا اساسا منطقتنا نضيفه .. الدبور ده جه ازاي .. هم مافيش غيرهم البوابين لما كترو في المنطقه وبقو بيزبّلو الدنيا .. قامت الدبابير كترت .. يلا انا مش هعمل عقلي بعقل بحتة دبور .. زمان الدبور خرج من الاوضة دلوقتي بعد مانا طفيت النور وشغلت التكييف .. انا هدخل الاوضه بقى واكمل فسحتي عالنت ومش هاسمح لحتة دبور انه يعكنن مزاجي .. بس قبل ما ادخل الاوضه .. هاجيب علبة مبيد حشرات عشان بعد مايخرج الدبور ارش الاوضه:D .. يقوم يحرّم أي دبور لطخ يمكن أن تسوّل له نفسه المريضه .. ان يدخل غرفتي السورياليه .. ويعمل راسه براس اسياده البني آدمين









جبت علبة مبيد الحشرات .. واتضح انها علبة مبيد حشرات زاحفه وصراصير .. لكن مش مشكله .. الدبور عباره عن صرصار بس طلعله جناحات ودهن نفسه اصفر في اسود .. وده تقريبا لأنه كان عايز يشتغل تاكس في اسكندريه:-P

دخلت الاوضه وكلّي حذر وحِيطه – يالهوي على كلمة حِيطه دي .. طب والله تعبت عشان اجيبها – وولعت اللنضه .. بصيت على الاوضة كويس .. مافيش أي حاجه والحمدلله .. رحت عالمكتب وقفلت التكييف اللي تلّج الاوضة وقلبها فريزر .. وشغلت شاشة الكومبوتر ووصلّت الماوس .. ولسه هكتب عالكيبورد .. لقيت الدبور راح خارج من تحت المكتب:(







يالهوي .. ده دبور غتت قوي .. يعني اضافة على انه ماعندوش أي احساس وشكله لاقط على حلاليفي وما حسش بالسقعه .. اتضح انه غتت وغبي كمان .. لكن لأ بقى
المره دي انا مش هخرج بره الاوضه واسبلو الجمل بما حمل .. دي أوضتي .. وهو اللي لازم يخرج منهاX-(

وعنها .. ورحت ماسك كاب كان مرمي عالارض – راجع التوضيح اللي بقول فيه ان هدومي مرميه عالارض وعامله لوحة سورياليه – وحادف الكاب على الدبور .. قام عمل زي الشبكه اللي بيرميها الصياد على القرد اللي بيتكلم .. لما بيصطادوه من أدغال شومبونجو .. وراح واقع على الارض .. والدبور محبوس ومزنوق بين ثنايا وطَيّات الكاب;;)





- علي النعمة أنا حلو قوي في اللغة العربية الفصحى .. ثنايا وطَيّات .. وحِيطه -
ورحت جايب علبة مبيد الصراصير وقاعد ارش عالكاب عشان الريحة تتغلل جوا الانسجه وتخنق الدبور .. وارش ارش ارش .. لغاية ما المبيد خلص خالص .. قمت شايل الكاب .. وبصيت عالدبور لقيته لسه في الرمق .. قمت جايب علبة بادي سبراي وقلت اهو كللو رش برضك .. وقعدت ارش ارش ارش .. لقيت الدبور بيرفعلي رجليه وجناحاته .. وتقريبا بيقولي حط شويه هنا كمان :-P.. قلت لأ بقى .. طب علبة المبيد وكده كده مالهاش لازمه قوي .. انما البادي سبراي لأ .. كللو إلا العطر يافتى:)








ورحت جايب علبة سجاير كولوباطرا بوكس كانت فاضيه (واحد صاحبى نسيها عندى ).. وبـ حتة ورقة شلت الدبور وحطيته جوا العلبه الفاضيه .. وقعدت أرج في العلبه .. واسمع الدبور بيتخبط وبيترزع جواها .. أرج وهو يتخبط ويرزع .. ويستغيث .. انا أرج وهو يستغيث .. أرج ويستغيث .. لكن أبدا .. أنا قاسي جدا .. ولا يونكن أبدا أرحمه .. فين وفين .. لغاية ما الدبور سكت .. والسر الإلهي طلع










طبعا بعد ما ريحة الكاب كلها بقى مبيد حشرات .. قررت إني أرميه في الزباله وقلت مش مشكله .. واساسا اساسا .. طلع ولا نزل .. حتة كاب .. يعني مش حاجه كبيره

وآدي صورة الدبور .. لكي يكون عبره لغيره من الدبابير التي تسوّل لهم أنفسهم المريضة على الدخول في أوضتي .. والتخبيط في لنضتيX-(




http://i32.tinypic.com/2mzjfhu.jpg

وبناءا عليه .. أحب أوجه نصيحة لكل شاب وكل فيتاء .. لو جالكم دبور وقعد في أوضتكم بالعافيه .. إياكم تسكتوله .. ادولو على نافوخه .. أوعو يصعب عليك .. مايصعبش عليكم كاب.. :-P






ملحوظه





بافكر اخد حد من صحابي ونروح ناكل في مكان حلو زي تِكّا مثلا .. وبعد مانخلص الاكل ونشبع والحياه تبقى فل .. أروح رامي جثة الدبور في وسط بواقي الأكل .. وأنادي صحاب المحل أقولهم ده اسمه كلام !!!؟؟؟
دبور في الأكل !!!!! .. ده إهمال .. ده تسيب
أنا عايز أقابل الأستاذ تِكّا حالا !!!!! :-P

و معاكو حوده من امام محل الكشرى اللى عالناصيه

هههههههههههههههههه كل دا علشان دبوووور كنت تفكك منو تتعب نفسك علي الفاضي ليه

هههههههههه بس جامده يا مان ;):D:)

علي فكرة شكلك كده كنت مش متغطي كويس عمري ماشوفت راجل يخاف من دبور :D

اقتباس:

---

المشاركة الأصلية كتبت بواسطة menna yahia

هههههههههههههههههه كل دا علشان دبوووور كنت تفكك منو تتعب نفسك علي الفاضي ليه

هههههههههه بس جامده يا مان ;):D:)

---

انا بخاف منهم مووووووووت على فكره :-/:-/:-/

اقتباس:

---

المشاركة الأصلية كتبت بواسطة mahmoud_sadik

علي فكرة شكلك كده كنت مش متغطي كويس عمري ماشوفت راجل يخاف من دبور :D

---

انا بخاف من الحشرات كلها مش من الدبابير بس

انا عندى فوبيا من الحشرات على فكره

مشكووووووووور جداجدا

:((:((:((:((:((

طيب يا شبح

عندك فوبيا هههههههههههههههههههههه

يبق اكيد معلمتش ولا حاجا من الحاجت دى :-P

نااااااااااااااااااااايس يا حوده

هههههههههههههـ

مطبعا معملتش حاجه

ده من من الخيال

انا هعمل كده برده

انا لو شوفت دبانه معديه بسيب الشقه و اخرج

اكيد كل اللى عملته فى الدبور ده من الرخامه
اللى مطلعها علينا طول اليوم فى المقالب بتاعتك
والله تلاقى الدبور ده غريب عن النطقه وميعرفشى محمود
واللى ما يعرفك يجهلك ويبقى مصيره مصير الدبور
:-P:-P:-P:-P:-P:-P:-P:-P:-P:-P
:-P:-P:-P:-P:-P:-P:-P:-P
:-P:-P:-P:-P:-P:-P
:-P:-P:-P
:-P

ولقيت الدبور بيرفعلي رجليه وجناحاته .. وتقريبا بيقولي حط شويه هنا كمان

اجمل حته فى القصه
توبك رائع لازم الواحد يبقى عامل حسابه بعد كده

=)) =)) =))

والحكايه دي حقيقي ولا ايه :-B

اقتباس:

---

المشاركة الأصلية كتبت بواسطة sunlight

اكيد كل اللى عملته فى الدبور ده من الرخامه
اللى مطلعها علينا طول اليوم فى المقالب بتاعتك
والله تلاقى الدبور ده غريب عن النطقه وميعرفشى محمود
واللى ما يعرفك يجهلك ويبقى مصيره مصير الدبور
:-P:-P:-P:-P:-P:-P:-P:-P:-P:-P
:-P:-P:-P:-P:-P:-P:-P:-P
:-P:-P:-P:-P:-P:-P
:-P:-P:-P
:-P

---

هههههههههههههـ


عندك حق والله :-P:-P:-P

اقتباس:

---

المشاركة الأصلية كتبت بواسطة متعب

ولقيت الدبور بيرفعلي رجليه وجناحاته .. وتقريبا بيقولي حط شويه هنا كمان

اجمل حته فى القصه
توبك رائع لازم الواحد يبقى عامل حسابه بعد كده

---

تسم لردك الكبير ده يا متعب :-*:-*:-*

اقتباس:

---

المشاركة الأصلية كتبت بواسطة cenrila

=)) =)) =))

والحكايه دي حقيقي ولا ايه :-B

---

لآ طبعا مش حقيقى

دى من الخيااااااااااااااااااااا اااااااال العلمى المتحندث

يسلام على كلامى اللى مش مفهوم :-P:-P:-P

ههههههههههههههه تسلم يا حوده يا عسل موضوع مؤثر اوى اوى والله وانا منهاره علشان الدبور صعبان عليا اوى :((:((:((:((:((:((



بس اقول عليك ايه يا قاتل :)):)):)):)):)):))


تسلم يا حوده :-P

ههههههههههههههههههه
والله ما قدرة ابطل دحك
=))=))=))=))=))=))

اقتباس:

---

المشاركة الأصلية كتبت بواسطة سمسمه النونه العسوله

ههههههههههههههه تسلم يا حوده يا عسل موضوع مؤثر اوى اوى والله وانا منهاره علشان الدبور صعبان عليا اوى :((:((:((:((:((:((



بس اقول عليك ايه يا قاتل :)):)):)):)):)):))


تسلم يا حوده :-P

---

هههههههههههههههههههههه

سبحان الله :-P:-P

اقتباس:

---

المشاركة الأصلية كتبت بواسطة قمر الليالى

ههههههههههههههههههه
والله ما قدرة ابطل دحك
=))=))=))=))=))=))

---

ليه طيب نعمل ايه دلوقتى :-P:-P