يبقى انت أكيد .. أكيد في مصر

السلام عليكم وحمه الله وبركاته
بوصوا بقى يا جماعه
القسم ده المفروض انه بيتكلم عن مصر
كل حاجه في مصر
وده اللي مكتوب تحت قسم احسن ناس
مصر هي أمي .. كل شيء عن مصر
وانا شايف انه كله بيتكلم عن الحاجات الكويسه في مصر
وطبعا ده مينفعش:D
فإن شاء الله
الموضوع ده هيكون مخصص لكل حاجه مش كويسه في مصر:D
وطبعا كل واحد هيفتكرني بتكلم عن السياسه
لا انا اقصد كل حاجه وبما فيهم الساسه
فكرت كتير اعمله في الركن السياسي
بس قولت لا هنا هنتكلم في حاجات تانيه كتير غير السياسه
الحقيقه فكرت كتير في اسم الموضوع
وطرحت اسماء اكتر
من عمار يا مصر
لــ حلوه يا بلدي
او مصر هي امي وأن دق التعبير _مراةابويا_
بس استقريت في الاخر على الاسم ده
يبقي انت اكيد .. اكيد في مصر
مش عايز ارغي كتير في كلام مش مفيد
بس حبيت اعرفكم ايه هو الموضوع اصلا
ندخل في الجد؟
ندخل :D
اول حاجه بعترف انها مش صح
واكيد كلكم معترفين معايا
هو احنا
انا مش بتكلم كلام انشا
انا بقول اللي لازم يتقال
ومينفعش نبدأ نتكلم في اي حاجه غلط بنكون احنا اصلا السبب فيها
وزي ما هتشوفوا بعد كده
ان اي حاجه غلط هنعرف في الاخر اننا احنا السبب فيها
انا كده بتكلم عننا بشكل عام
عشان كده انتوا حاسين اني بقول كلام افلام
بس بعون الله بعد كده هتكلم على حاجات كلنا بنعيشها فعلا
وان حبيت اقول احنا غلط في ايه
بيتهيألي بوئي هيوجعني:D
عشان كده هسيب الموضوع مفتوح
من غير ما احدد احنا غلط في ايه وليه
لان هدفي من الموضوع مش اننا نعرف الغلط بس
اننا نحاول نعالجه
ومش في ايدينا اننا نعالج نفسنا_ اقصد المنتدي_
انما باقي الحاجات التانيه هتكون اصغر شويه
واحتمال نعرف نحلها

انتظرونا واول نصيبه
حصريا:D
على مصراوي كافيه

هههه حلو الموضوع ....

بس اتاكد انو مفيش دوريات ولا امن ولا صحة ولا اي حاجة جنب الكافيه ....

من غير كوارث ...

اقولك انا على حاجة جميلة .....

دلوقتي في الامارات مثلا الي عندهم 13 سنة دة يبقا في اولى ثانوي ...

والاخ او الاخت يخلص 20 سنة بالكتير اوي او اقل دراسته ...

وزي ما بيقولوا بيركب نفسه اقصد بيجهز نفسه علشان يتجوز .....

اما هنا فربنا يخليلنا كل من ساهم في تطوير التعليم للطالب لحد 26 سنة وعما يجهز نفسه بقا 31 ....

وعليك خير بقا الخ الخ الخ .....

بس يعني قلت اشارك بحاجة صغنونة ..

شكراً كارثه على الموضوع

كده انا ضمنت اكبر موضوع في المنتديات عموماً

لأن المشاكل كتير والحمد لله ان شاء الله راجع بمشكلة نتكلم فيها وربنا ما يجيب مشاكل :D

لا الكلام ده في كل حته

محنا عندنا ممكن الواحد يخلص تعليم وهو عنده 8 سنين:D

وبيروح يشتغل صبي ميكانيكي مثلا=))

المفروض اصلا ان التعليم ملهوش نهايه

يعني انا مثلا كطالب في كليه حقوق

المفروض

المفرووووووض .. ها؟:D

اني بعد ما بتنيل اخلص بفضل اقرأ في مراجع

ده غير لو الواحد حب يعمل دبلوما و ماجستير ودكتوراه

اللي عاوز اقوله

انه مش الدوله اللي بتحدد نهايه التعليم

لا اللي بيتعلم هو اللي بيحدد

بس طبعا اكيد ان في ناس يا حبة عيني بتتفرم

زي الاطباء

بيتفرموا في الثانويه

وبعديها 7 سنين غير التكليف والنيابه ولو حب الدكتور ياخد زماله او يعمل ماجستير او دكتوراه

يعني من الاخر بيتظبط ماديا_فلوس يعني_ ومعنويا وجسمانيا وعقليا

وفي الاخر ممكن نقول عليه ده انسان فاشل لمجرد انه فشل في عمليه او عامل احد المرضي بطريقه مش تمام

وساعتها نقدر نقول

يبى انت اكيد .. اكيد في مصر:D

متشنكر يا روزي على اول نصيبه

مهو لو مكملش تعليمو محدش يقبلوا

دة علشان محاسب يشتغل محتاج شهادة وتدريب وافلاااااااااااااااااام

يعني من الآخر هتتعلم للآخر رضيت او مرضتش

والا روح اعد في البيت كل واشرب ونام

بس كل الدنيا بيبقا سن التعليم بعد الكلية من المفترض انو قليل

علشان الناس تلاقي تاكل

وان شاء الله هنا هيلغوا حكاية الكلية بس دي ومش هنلاقي شغل

واهو كل حاجة بنقول عليها المفروض:|

علشان مفيش حاجة بتحصل :-$

يلا مستنين بقيت المصايب ....

اقتباس:

---

شكراً كارثه على الموضوع

---

العفو يا علي بيه:D

وعلى حد تعبيرك

اقتباس:

---

المشاكل كتير والحمد لله

---

فعلا المصايب مفيش اكتر منها:D

اقتباس:

---

ان شاء الله راجع بمشكلة نتكلم فيها وربنا ما يجيب مشاكل

---

مستنينك يا ريس :D

ولو مفيش مشامل احذف الموضوع احسن=))

:D:D:D:D:D


والله عيب يا كارثة اللى انت عامله ده


مشاكل ايه يا راجل اللى انت بتقول عليها


ما احنا حلوين أوى أهو ومفيش مشاكل ولا حاجة وزى الفل



ادينا شغالين والأسعار رخيصة أوى ومرتباتنا عالية جدا وعندنا شقق وعربيات والطرق فاضية وكل حاجة تمام



يبقى مشاكل ايه بقى اللى انت بتقول عليها



بس فى الأخر أحب أقلك حاجة صغيرة




اذا لاقيت نفسك مخنوق أو لاقيت نفسك عايز تنتحر


أو حتى لاقيت نفسك عندك 35 سنة ولسة بتدور على شغل علشان تبدأ تكون نفسك !!!



أو لاقيت نفسك خلصت تعيلم وبعد كده اكتشفت ان مفيش حاجة من اللى اتعلمتها صح !!




يبقى انت أكيد أكيد أكيد فى مصر

اقتباس:

---

المشاركة الأصلية كتبت بواسطة AnA

:D:D:D:D:D

والله عيب يا كارثة اللى انت عامله ده

مشاكل ايه يا راجل اللى انت بتقول عليها

ما احنا حلوين أوى أهو ومفيش مشاكل ولا حاجة وزى الفل

ادينا شغالين والأسعار رخيصة أوى ومرتباتنا عالية جدا وعندنا شقق وعربيات والطرق فاضية وكل حاجة تمام

يبقى مشاكل ايه بقى اللى انت بتقول عليها

بس فى الأخر أحب أقلك حاجة صغيرة

اذا لاقيت نفسك مخنوق أو لاقيت نفسك عايز تنتحر

أو حتى لاقيت نفسك عندك 35 سنة ولسة بتدور على شغل علشان تبدأ تكون نفسك !!!

أو لاقيت نفسك خلصت تعيلم وبعد كده اكتشفت ان مفيش حاجة من اللى اتعلمتها صح !!

يبقى انت أكيد أكيد أكيد فى مصر

---

والله نفس الرد اللى كنت هكتبه بالظبط

من كتر المواضيع والمشاكل التى مرت بخاطرى بخصوص هذا الموضوع لم استطع التركيز فى الكتابه
فانتظرونى لانى معبعب وعندى الكثير ويارب متزهقوا منى

ازيكو يا جماعه انا عضوه جديده معاكو..واللي جذبني اشترك هو المووضوع ده لاني كل حاجه بتحصل في بلدنا بتثبت كتير اننا في مصر....
وعلشان بنحب مصر وعشان هيه بلدنا لازم نخليها احسن واجمل..ولازم نعترض ونكتب ونقول
في الحقيقه..مشكلاتنا في البلد دي مش بتخلص ولا هتخلص
مش مشكله فرد او واحد عايش في مكان دي مشكله شعب كبيييييير ..
كل خطوه بنمشيها علي ارض مصر بتقابلنا مشكله مش في التعليم بس
كمان في الشوارع والتلوث والزحمه والنظام وارتفاع الاسعار والسياسه والاقتصاد......الخ
مجرد انك تخرج من بيتك بتواجهك مشاكل البلد..بتحتك بيها...
الغريب انك في مصر والاغرب هو شعب مصر
اللي مش بيتكلم او بيعترض
وبيتهيالي موضوع زي ده فتح طرق كتير للمناقشه... وكمان نعتبرها خطوه اولي عشان نحل مشاكلها..ونقول بقلب جامد وبفخر..اننا اكيد ..اكيد في مصر

اقتباس:

---

المشاركة الأصلية كتبت بواسطة Rosy magic

هههه حلو الموضوع ....

بس اتاكد انو مفيش دوريات ولا امن ولا صحة ولا اي حاجة جنب الكافيه ....

من غير كوارث ...

اقولك انا على حاجة جميلة .....

دلوقتي في الامارات مثلا الي عندهم 13 سنة دة يبقا في اولى ثانوي ...

والاخ او الاخت يخلص 20 سنة بالكتير اوي او اقل دراسته ...

وزي ما بيقولوا بيركب نفسه اقصد بيجهز نفسه علشان يتجوز .....

اما هنا فربنا يخليلنا كل من ساهم في تطوير التعليم للطالب لحد 26 سنة وعما يجهز نفسه بقا 31 ....

وعليك خير بقا الخ الخ الخ .....

بس يعني قلت اشارك بحاجة صغنونة ..

---

مين دة اللى يلحق يكون نفسة عند سن 31 سنة
ربنا معاكى ومعاهم

السلام عليكم ورحمة الله وبركاته
يأسفنى أن أتحدث عن موضوع الساعه

فى تصورى أن إنسان يحصل على سبعه مليون جنيه سنويا و يتحدث عن تأمين مستقيله

تعلمون جيدا أنه ك/عصام الحضرى
وهل الأن يوجد شباب من عمره يعملوا حتى بربع ربع هذا الأجر فى السنه
ومع ذلك أقول
تبأنت أكيد أكيد فى مصر

عذراااااااااااااااااااا

اخى الفاضل اسمح لى ان اقول لك اذا وجد موضوع مهم جدا مثل موضوعنا هذا

ووجدت عدم تباين بين لون خط الكتابة وبين لون الخلفية لكى يريح نظر القارىء
يبقى انت اكيد ..اكيد فى مصر

قبل ما أتكلم عايز تأكيد انه لا يوجد جواسيس فى الكافيه

اخوتي الاعزاء
احنا اكيد اكيد اكيد في مصر لاننا الشعب الوحيد الذي لا يبحث عن حقوقه ولا أحد في هذا الوطن ممكن ان يحافظ عن حقوق هذا الشعب احنا اكيد في مصر لاننا نتشاجر على رغيف العيش مع بعضنا البعض على الرغم انه من المفروض ان نتشاجر مع وزير التموين.
احنا اكيد في مصر لاننا ندفع مصروفات النظافة ونعيش في وطن من القاذورات ليست الزباله فقط في شوارعنا ولكن اصبحت في نفوسنا ؛ احنا اكيد في مصر لاننا ننتخب من يصفقون لمن يذبحون كرامتنا ؛ احنا اكيد في مصر لاننا نعيش في وطن بلا هويه نخاف ممن يفترض بهم حمايتنا ؛ احنا اكيد في مصرلاني اكيد اكيد اكيد احيا في حي داخل مصر.

السلام عليكم
اكيد كلنا بما اننا مصريين فاننا عايشين في ظل المشاكل المصريه اللي بتحصلنا وانا شخصيا من اكثر ما يؤرقني من هذه المشكلات هيه الازدحام وخصوصا مترو الانفاق..
الكثير مننا تعرض لزحام المواصلات ..والاحتكاك بين المواطنين والشد والجذب الذي يحدث في الموصلات عموما بين المواطنين مما يتنافي مع التحضر
مشكله الانتظار في محطات الاتوبيس.. لربما ينتهي بنا الوقت بالساعات قبل مرحله الركوب مما يضيع وقتنا..
وذلك لاننا لانعرف قيمه الوقت فاصبحنا من الدول الناميه..اصبحنا كدوله خارج دائره التحضر مقارنه بالدول الاخري
بيد ان الازدحام كمشكله قوميه..يعمل علي زياده المشاحنات والخلافات بين الافراد وكل منا يصبح علي شفا حفره من الشجار مع الاخر..
من منا لايتعرض للازدحام ومن منا لم يمر بمواقف صعبه داخل وسائل المواصلات
من منا لم يذهب للعمل او للمدرسه او الجامعه متاخرا واصبح مبرره الازدحام والمواصلات...
كذلك ما ينجم عن هذه المواصلات من العوادم الضاره والتي بالفعل لن تنجو منها وسوف تؤدي بنا للاضرار علي المدي الطويل من حياتنا
فكل دقيقه تمر بنا قد تنقلنا خطوه لاعلي وترفع بنا درجات الي مستقبل مشرق..وبالتالي ينعكس علي دولتنا ونتقدم كالدول الاخري
في كل دقيقه تمر بنا قد نتحسن ونبني انفسنا قد نخترع شيئا ولكننا لم نعرف قيمه الوقت فمازلنا بدون تقدم
ودولتنا بما انها مشهوره بالانجازات وبناء الكباري والطرق والشوارع فادي ذلك الي زياده المواصلات ولكنها لم تعرف انها تدفع ثمن كل ذلك ولم توازن بين انجازاتها وبين ما ينتج عنه من ازدحام ومشكلات
ومن اكثر الوسائل التي ارتفعت معدلاتها هيه سيارات الاجره التي ملئت الشوارع واحدثت تلك الضجه
فاذا وجدت نفسك تنتظر علي محطات الاتوبيس
او اذا اكتشفت انك وصلت الي عملك متاخرا او فاتتك احدي المحاضرات الهامه
اذا تعرضت الي الازدحام داخل المواصلات.. او تشاجرت مع احد المواطنين حينئذ
فيجب ان تثق جيدا ...انك اكيد في مصر

فعلا اخى كارثه فى حاجات كتيره اوى فى بلدنا مصر مش كويسه للاسف والمشكله الاكبر انه احنا مش عارفين نحلها ليه..........؟ علشان احنا رضينا بكده وسكتنا حطينا ايدينا على خدنا وقولنا ياعمى سيبها لله . ما هو طبعا احنا كلنا سايبينها لله هوه احنا لينا غيره .لكن ليه ما نحاولش ان احنا نصلح منها ونعالج المشاكل دى كلها .. لكن من راى انا انه اغلب المشاكل الى بتواجهنا مش بايدينا حلها ولو كل واحد فكر مع نفسه ازاى نحل المشاكل دى حيلاقى حاااااااااااجه واحده انه الحل فعلا مش بايديه ولكن بايد المسؤلين الى هما المفروض مسؤلين عن البلد لانه اغلب المشاكل فى اقتصاد البلد والرواتب الى ما بتكفيش اسره مكونه من فردين والزحام الى فى الشوارع والفلوس الى فى البلد كتيره بجد لكن السؤال بتروح فين ...........؟
طبعا كلنا عارفين بتروح فين انا مش هاتكلم ولا هاقول اكتر من كده غير .... (حسبنا الله ونعم الوكيل )
مشكور اخى كارثه بجد على طرح الموضوع ده لانه بجد فى حاجات كتيره اوى فى بلدنا مش كويسه ومشاكل اكبر من كلمه مشاكل نفسها وان شاء الله هاطرح مشكله فى القريب العاجل علشان نشوف ايه ممكن يكون حلها والسلام عليكم ورحمه الله وبركاته

سالخير يا كافيه:D

معلش بقالي كام يوم مشغول:D

واضح كده ان مصايبنا كتير;;)

اقتباس:

---

(حسبنا الله ونعم الوكيل )

---

والله احسن جمله قولتها يبني :))


بس خلونا نمسك مصيبه مصيبه

بوصي يا سيدني

انتي كده دخلتي مشكلتين في بعض

الازدحام والمواصلات

انا معاكي ان الاتنين مرتبطين ببعض بس الازدحام مش في المواصلات بس

يبقي نمسك مشكله الازدحام الاول;;)

المفروض يا جماعه كل واحد يتمسك بالمنطقه اللي اتولد وعاش فيها فتره طفولته

لكن اللي بيحصل للاسف _وده مجرد سبب من اسباب الازدحام_

اننا بنلاقي الواحد بيقول ياه امتا بقى الواحد يهج من البلد دي_القريه مثلا_

والطالب بيخلص مرحله الثانويه وعلى جامعه القاهره عدل

ولو حتي الكليه اللي دخلها ليها فرع في بلده

ليه؟

اصل الواد يا عيني كان مدفون ونفسه يتفك بقى ويشوف الدنا

على مايخلص الجامعه يكون بيفكر في الجواز

ياخد شقه في القاهره برده ويتجوز هناك وخلاص بقى من سكان القاهره

طبعا القاهره مجرد مثال للمدن المزدحمه

انا بتكلم بصفه عامه عن الزحف العمراني

يعني اللي في القريه عاوز يسكن في المركز

واللي في المركز عاوز يسكن في المحافظه

واللي في المحافظه نفسه يلاقي شقه في العاصمه او في اي مدينه جميله

وطبعا مفيش غير الوادي والدلتا

والباقي عباره عن صحره

حتي مشروع توشكى اللي كانوا واجعيين دماغنا بيه محدش عارف حاجه عنه دلوقتي;;)

وبالتالي لازم يكون في تكدس سكاني _وده سبب تاني للازدحام_


ولان الطب اتقدم نسبيا عدد الوفيات بيقل بمرور الزمن

ولان تنظيم الاسره مش بيتقدم نهائيا عدد المواليد بيزيد بطريقه غير عاديه

يعني الولد يتجوز وهو عنده 25 سنه وبيتجوز واحده عندها 20 سنه

طبعا ده ليه فوائد كتير يعني الشباب بيتلم والبنات بتتهد في بيوتها

بس ليه اضرار برضه لاننا للاسف مبنعرفش نعمل حاجه فيها افاده الا لو كان فيها ضرر

فلو الاتنين معندهمش وعي بيخلفوا 4 او 5 عيال الا من رحم ربي _وده كان سبب تالت_

وفي اسباب تانيه كتير

وبما اننا في مصر

فلازم نثق تمام الثقه ان مشكله الازدحام مش هتتحل

لاننا لا هنتمسك بالبلد اللي اتولدنا واتربينا فيها

ولا هنعمر الصحره سيبكم من صباح الخير يا مصر وعايزنها تبقى خضره والكلام ده:D

ولا هيكون عندنا وعي اجتماعي وخلف خلف وارمي في اي مدرسه=))

هل توافقونى على أن احنا نسمى الشعب العربى كله ب ...........

شعب بلااااااااا موقف ( مش موقف سيارات )

فى اى مشكله كانت صغيره أو كبيره عامل نفسه متوه ههههههه :)):)):))

بس مش عارفه بمزاجه ولا غصب عنه !!!:-$:-$:-$

كفايه كدا .:-&:-&:-&

Dama

هو تقدر تقول الاتنين احيانا في موقف بيكون بمزاجه ومواقف تانيه غصب عنه
لان للاسف الشعب خواف او اقدر اقول معظمنا او اننا عندنا قله تحمل المسؤليه وبردو مش كلنا
للاسف احنا اتعودنا... اتعودنا اننا مناخدش قرار
اتعودنا ان الحكومه هيه صاحبه القرار والشعب عليه تنفيذه
اتعودنا اننا نخلي المواقف هيه اللي تحكمنا وتضع الحكومه المواقف وتجعلنا ننصاع اليها
اتعودنا اننا نمشي في تيارها دون ان نعترض
فكما قلت شعب بلا موقف ربما يكن بمزاجه لانه لو مكنش بمزاجه هيكون غصب عنه ...ولا ايه؟؟...

عذراً اخى كارثة
فأنا لا اوفق على هذا الموضوع فى الشكل والمضون
وان كنت ناوى تغير فعلاً فمكنش المفروض تطرح موضوع زى دة لان الناس هتعتقد انة تاقة اتفتحة ليهم وكل واحد هيقول إللى فى نفسة وبعدين يهداء ويعتقد انه عمل حاجة صح . عشان كدة يا جماعة بقول عاوز تعمل حاجة ابداء بنفسك وبمن تعول ولا تستلم وتهدر حماسك وتضيع طاقتك وتسلم جديتك للشعارات الكاذبة و النوافذ الزائفة . غير بيدك يا اخى فلن يغير شيئ كتابة الاقلام ولا حرق الاعلام ولا نبح الاصوات فقد مضة وانتهى زمن الصياحات والثوات .
ولذلك اسجل عذرى عن عدم اشتراكى
وارى ايضاً انه ليس من الولاء ان نشكوى مصرنا لغيرنا ...
وتزعلشى من رئي فأنا اجهل قوة الكلام ...

اقتباس:

---

المشاركة الأصلية كتبت بواسطة شيخ البلد

عذراً اخى كارثة
فأنا لا اوفق على هذا الموضوع فى الشكل والمضون
وان كنت ناوى تغير فعلاً فمكنش المفروض تطرح موضوع زى دة لان الناس هتعتقد انة تاقة اتفتحة ليهم وكل واحد هيقول إللى فى نفسة وبعدين يهداء ويعتقد انه عمل حاجة صح . عشان كدة يا جماعة بقول عاوز تعمل حاجة ابداء بنفسك وبمن تعول ولا تستلم وتهدر حماسك وتضيع طاقتك وتسلم جديتك للشعارات الكاذبة و النوافذ الزائفة . غير بيدك يا اخى فلن يغير شيئ كتابة الاقلام ولا حرق الاعلام ولا نبح الاصوات فقد مضة وانتهى زمن الصياحات والثوات .
ولذلك اسجل عذرى عن عدم اشتراكى
وارى ايضاً انه ليس من الولاء ان نشكوى مصرنا لغيرنا ...
وتزعلشى من رئي فأنا اجهل قوة الكلام ...

---

لا لا اطلاقا مفيش زعل خالص

الاختلاف في الرأي لا يفسد للود قضية

بس انا هوريك الي انا قولته في الاول في اول صفحه في الموضوع

اقتباس:

---

لان هدفي من الموضوع مش اننا نعرف الغلط بس
اننا نحاول نعالجه
ومش في ايدينا اننا نعالج نفسنا_ اقصد المنتدي_

---

انا بعرض المشكله عشان نحلها في الحياة العملية

يعني زي منتا قولت كل واحد يبدأ بنفسه

وربنا يعلم اني مش عامل الموضوع عشان يبقى موضوع كبير ويلقى اهمية لا والله ابدا

انت فعلا كلامك مسبوط المشاكل دي بناقشها بس هنا لكن حلها علينا احنا في الحياة العملية

وانا مش بشكو مصر لغيرنا ولا حاجه انا بكلم المصريين اللي هنا معانا واللي عايشين اللي احنا عايشينه

فحبيت اعمل الموضوع بطريقه فيها شئ من الكوميديا الساخره

كتغيير يعني مش اكتر

بس انا بختلف معاك بصراحه في موضوع ان كتابة الاقلام مش بتغير لا بالعكس بتغير كتير

_ثم ان دي كتابة كيبورد مش قلم_:D

نورت الموضوع يا باشا ويا رب تكون فهمت اصدي

انت بتهددنى وبتقولى هوريك وانا هوريك بس اما اشوفك
ومشاء الله عليك نبية عرفت ازاى انه كيبور مش قلم
مشكور اخى كارثة على سعت صدرك ومشاء الله عليك كتير واعى وناضج ومفتح