محتار و نفسي حد يجاوبني

السلام عليكم و رحمة الله و بركاته
انا طالب في صيدلة عين شمس الفرقة الثانية بصراحة انا دخلت الكلية دي عن اقتناع لاني كنت بحب مجال الادوية و الكيميا جدا
و لكن بعدما دخلت الكلية وقضيت فيها 3سنين اكتشفت حقيقة المستقبل اللي مستنيني ادرس 5سنين في كلية صعبة ومعقدة زي دي
عشان في الاخر اطلع اما مندوب مبيعات و اتمرمط في الشوارع طول النهار يااما اشتغل عند واحد في صيدلية ودي اي دبلوم تجارة ممكن يشتغلها
يااما اشتغل موظف عادي في وزارة الصحة لكن انا بصراحة كان نفسي اشتغل في شركة او مصنع ادوية كدكتور منتج لكن عرفت ان هذه الووظيفة بالواسطة فقط. ففكر احول طب اسنان على الاقل حبقى دكتور محترم و فعلا اسنان اسكندرية وافقت و ابقى في الفرقة الاولى .
فما رايكم ادام الله فضلكم و ارجو الرد ضروري لاني بجد محتار و ارجو مساعدتكم.
و اسف على الاطالة.

بالتوفيق ان شاء الله سيان في صيدلة او اسنان
لكن من كلامك انك مقتنع من البداية بالصيدلة
يا صديقي اكيد في حد ملء دماغك بعيوب لم تكن في اختيارك
من الاول صدقني كل المجالات بالصيدلة موجودة
منتج ادوية او صيدلي او صاحب صيدلية
والكثير او السفر بنفس المهنة
لا تدع الياس يتغلغل اليك بعد ما امضيت
ثلاث سنوات حرام يروحوا هدر
ومين عارف ممكن تروح اسنان
وتفاجيء بالاسوء امامك
ارضي بما قسم الله لك
واكمل الصيدلة
وبالتوفيق اخي الكريم
تحياتي لك

السلام عليكم و رحمة الله و بركاته....

انا ان شاء الله نهائى صيدلة فعلشان كده اسمحلى هرد عليك، انا مش موافق طبعا لانه غلط تسيب كلية زى كلية الصيدلة بعد تلات سنين كمان و بتقول ان الشغل مش هيكون كويس و انك حاسس انك مش هتحقق حاجة!!!!!

عموما هشرحلك الاسباب بإستفاضة بس فى المشاركة الجاية معلش علشان هكتب كلام كتير...

محمود...

السلام عليكم....

انا رجعت من تانى بس عشلان اناقش كلام سيادتك كلمة كلمة و ابينلك ان على خطأ و احاول اقنعك متتصرفش كده...

هنجيب كلامك اقتباس جزء بجزء و نناقشه...

اقتباس:

---

انا طالب في صيدلة عين شمس الفرقة الثانية بصراحة انا دخلت الكلية دي عن اقتناع لاني كنت بحب مجال الادوية و الكيميا جدا
و لكن بعدما دخلت الكلية وقضيت فيها 3سنين اكتشفت حقيقة المستقبل اللي مستنيني ادرس 5سنين في كلية صعبة ومعقدة زي دي

---

حضرتك بتقول انك دخلت الكلية عن اقتناع تام لانك بتحب مجال الادوية و الكيميا جدا .. طب ده شئ كويس، خصوصا ان الكلية بتاعتنا دى محتاجة واحد يعرف ازاى يعمل تركبية و ازاى يشتغل فى معمل و يعنى ايه تعقيم و يعنى ايه الحفاظ على الادوية و يعنى ايه التعامل مع البشرية اللى غالبا مبترحش لدكتور بسبب المستوى المادى و بتكتفى انها تروح لدكتور صيدلى علشان يديهم حاجة للسخونة او للاسهال او او او ... بمعنى اخر كليتك معتمدة على العقل فى المقام الاول و الاخير و الدراسة الجادة خلال سنين الكلية نفسها .. على عكس اسنان او طب بشرى اللى الدراسة بعد الكلية لازم و مستمرة طوال حياتهم و تقريبا بصفة شبة يومية، لكن انت كل فترة و فترة لان قليلين جدا اللى بيشتغلوا فى البحث العلمى او التطوير الدوائى .. فالدراسة عندك بعد التخرج بتكون كل فترة و فترة مش دائمة و بصفة شبة يومية زيهم بالاضافة لانك ممكن تشتغل بالبكاليورس على عكسهم لازم يعملوا ماجستير و دكتوراه علشان اسمهم يتعرف.

اقتباس:

---

عشان في الاخر اطلع اما مندوب مبيعات و اتمرمط في الشوارع طول النهار يااما اشتغل عند واحد في صيدلية ودي اي دبلوم تجارة ممكن يشتغلها
يااما اشتغل موظف عادي في وزارة الصحة لكن انا بصراحة كان نفسي اشتغل في شركة او مصنع ادوية كدكتور منتج لكن عرفت ان هذه الووظيفة بالواسطة فقط.

---

انا مستغرب كلامك ده بصراحة!!!!!

يعنى انت عاوز تطلع من الكلية و تشتغل شغلانة كبيرة و انت معندكش اى مجال و لا خبرة فى العمل؟!!! طب تيجى ازاى دى؟!!!

يا سيدى الفاضل صيدلى المستقبل المحترم ان شاء الله .. مش عيب انك تشتغل فى صيدلة بره عند حد و اتنين و تلاتة و تشتغل فى اى وظيفة او تشتغل حتى مندوب مبيعات فى اول حياتك علشان تكتسب خبرة فى التعامل و البيع و الشراء و بعدها انت بتتقدم من وقت للتانى و بتصبح افضل فى مجال عملك .. غير كده مجال مندوين المبيعات بيكسب كويس و اسالنى لانى على طول عند جوز عمتى فى الصيدلية و اعرف مندوبين مبيعات كتير بيجيوا عنده و هو عارف انهم بيكسبوا و يشتغلوا كوي سو من الحلال و مفيش مجال شبهة حرام واحدة فى شغلهم، غير كده انت هتحوشلك قرشين كويسين ينفعوك و تقدر تعمل صيدلة مع الوقت فى مكان مناسب و تبقى بتاعتك او تلاقى فرصة عمل فى مكان تانى بشرط انك تكون كفئ و بتشتغل بضمير فى المكان الاول .. و لا انا كلامى مش مضبوط؟!!!

غير كده فى الوقت اللى احنا فيه ده الفلوس مهمة علشان الواحد يعيش بس المهم ازاى تجيبها بالحلال و المندوب مهوش شغلانة حرام و لا عيب و بتكسب كويس جدا جدا زى ما قلتلك فوق.

اقتباس:

---

ففكر احول طب اسنان على الاقل حبقى دكتور محترم و فعلا اسنان اسكندرية وافقت و ابقى في الفرقة الاولى .

---

والله ما عارف اقولك ايه؟!!! احسبها انت كده بعقلك و زى ما اخونا المحترم محيى زقزوق قالك فوق...

اقتباس:

---

يا صديقي اكيد في حد ملء دماغك بعيوب لم تكن في اختيارك
من الاول صدقني كل المجالات بالصيدلة موجودة
منتج ادوية او صيدلي او صاحب صيدلية
والكثير او السفر بنفس المهنة
لا تدع الياس يتغلغل اليك بعد ما امضيت
ثلاث سنوات حرام يروحوا هدر
ومين عارف ممكن تروح اسنان
وتفاجيء بالاسوء امامك

---

انت بتتكلم عن نقطة العمل بعد انتهاء الدراسة، و هو كلمك على نقطة انت مش حاططها فى حسابك خالص .. هى ان دراسة اسنان صعبة جداااااااااا و لاقصى درجة ممكن تتخليها، كلها حفظ و صم بطريقة رهيبة بالاضافة للحالات اللى لازم تكشف عليها و تشتغل فيها زى طب بشرى كده و الانيل انها فيها سنة امتياز زى طب بشرى يعنى تقريبا هتقضى ست سنين .. ستة + تلاتة = تسع سنين من عمرك راحوا فى الدراسة و ممكن على ما تتخرج يكون زمايلك كلهم اشتغلوا شغل كويس و اتجوزوا و يمكن يكون منهم اللى خلف كمان و عايش مستقر و انت لسه مخلصتش!!!

غير كده هو انت بتقول هتبقى دكتور محترم لما تتخرج من اسنان؟!!! يعنى صيدلة لا و الناس هتشوفك فى الشارع تتدارى وشها و لا ايه بالضبط؟!!! حرام عليك متظلمش نفسك و تظلم دراستك و تقول كده .. كمان قولى هى مش اسنان دى لازمها عيادة و تجهيزات علشان تشتغل؟!! هتجيب فلوس منين ليها و هتجيب زباين منين اصلا علشان تشغلها؟!! يعنى اظن ان صيدلة ان اشتغلت فى صيدلة بعد ما اتخرجت هيكون ارحم لانك هتلاقى مرتب تقبضه بعد اما تخلص على عكس اسنان يا تلاقى يا زباين يا متلاقيش اى حاجة خالص.

على فكرة احب اقولك ان صيدلة اسهل من اسنان خصوصا و انت بتحبها زى ما بتقول يعنى يعنى ممكن تجيب تقدير عالى ان شاء الله .. انا و اخويا التوأم فيها و احنا الاتنين لسه الترم اللى فات جايبين تقدير امتياز فى كل مواد الترم التانى بتاعت السنة اللى فاتت و هو على طول تقديراته عالية و ممتازة لانه بيشتغل و بيتعب شوية.

اتمنى انك بعد الكلام ده كله تشيل فكرة التحويل من دماغك خااااالص و تلتفت لمستقبلك و تشوف اللى وراك فى صيدلة اهم و اتمنى الاقيك داخل كمان سنتين ان شاء الله فى المنتدى بتقول انا خلصت يا جماعة و جايب تقدير و الحمدلله...

اسف اذا كنت طولت عليك .. نسيت اقولك اهلا بيك معانا فى المنتدى و كلنا اخواتك و بنرحب بيك و بندعيلك ان ربنا يهديك لطريق الصواب و يكرمك ان شاء الله و يجعل والديك فخورين بيك على طول بإذن الله...

دمت بود...

اخوك/ محمود...

اولا احب اشكركم جدا على ردودكم و على مشاركتكم معي
بجد مش عارف اقول ايه انتوا حسستوني انكم اخواني فعلا جزاكم الله كل خير .,
انا على فكرة مش ضد اي شغلانة من دول لكن بصراحة مندو ب مبيعات محتاجة واحد لبق بيعرف يتكلم كويس عشان يعلن عن الدوا اللي معاه و انا بصراحه معنديش الموهبة دي و بصراحة كل كلامكم صحيح لكن ابي و امي و جميع اقاربي بيحاولوا يقنعوني بطب اسنان
اعمل ايه

بص ياسيدى انا مقتنعة جدا بكلام محمود وانا من رايى ان انت اللى بتقرر مش بابا وماما ومتحملش هم الشغل اكيد ربنا هيعدلهالك
وعلى فكرة مش سهل ان حد يخسر سنين عمرة بسهوله اوى كدة
وفى النهاية احب اقولك ان القرار قرارك بس بجد لازم تشوف اللى انت عاوزة وتعمله ومش علشان بابا وماما بيقنعوك بحاجة انت متردد فيها يبقى تعملها
حط فى بالك سنين عمرك وحبك واقتناعك للكلية وللى انت بتعمله وسيب حكاية الشغل دى لربنا ان شاء الله هيسهلهالك
ومعلش على الاطالة
اختك نيفين

نسيت اباركلك يامحمود انت واخوك على المتياز
الف مليار مبروك وتخلصوا على خير ان شاء الله
ودمت متميزا بردودك المقنعة

احب اقلك كل شئ نصيب كمل في الصيدله

لو تعبت بجد وعملت كل الي مطلوب منك في الكليه

وربنا معاك ويوفقق يارب وبعدين عين سمش يا راجل :x

كل واحد بياخد نصيبة والي ربنا كتبهولك هتلاقي ولو مش عاجبك ابقي سيب الصيدلة واطلع اشتغل في سوبر ماركت

السلام عليكم
على فكرة انا دكتور صيدلى دفعة 2008وسافرت بعد ماتخرجت على طول
وليا اصحابى فى بشرى واسنان يقولولى ياريتنا كنا دخلنا صيدلة وسافرنا معاك
عايزك ماتتهورش وتحول لاسنان انت خلاص سنتين وتخلص حرام عليك يادكتور
وهنا الصيدلى الحمد لله راتبه اكبر من طبيب الاسنان
ربنا يوفقك واتكل على الله وكمل
مش هتندم

اقتباس:

---

المشاركة الأصلية كتبت بواسطة mody pharma

اولا احب اشكركم جدا على ردودكم و على مشاركتكم معي
بجد مش عارف اقول ايه انتوا حسستوني انكم اخواني فعلا جزاكم الله كل خير .,
انا على فكرة مش ضد اي شغلانة من دول لكن بصراحة مندو ب مبيعات محتاجة واحد لبق بيعرف يتكلم كويس عشان يعلن عن الدوا اللي معاه و انا بصراحه معنديش الموهبة دي و بصراحة كل كلامكم صحيح لكن ابي و امي و جميع اقاربي بيحاولوا يقنعوني بطب اسنان
اعمل ايه

---

معلش يا مودى انا دخلت اعلق تانى بس كان ضرورى التعليق على كلامك .. هقولك بصراحة و متزعلش منى و مش تفهمنى غلط، انا مش مقتنع ان اهلك عاوزينك تسيب الكلية اصلا!!!! أكيد انت لما قعدت تتكلم قدتمهم هما اقتنعوا بكلامك و بيقولولك حول .. و لأن السنة بدات فعلا فهما بيضغطوا عليك على ما اظن علشان تاخد قرارك و تلحق نفسك السنة دى، لكن صدقنى انا واثق انهم عمرهم ما هيكونوا موافقين على قرار زى ده ابدا!!!!!

غير كده مين فينا لبق يعنى و لا شاطر قوى فى الكلام، و حتى ان كنت انت اكتر اهل الارض اجتماعية و ليك معارف .. فرق قوى ما بين انك تكون صداقة و ما بين انك تقنع واحد يشترى منك بضاعة، اصل دى حاجة و دى حاجة تانية بالاضافة لان وقفتك فى الصيدليات ساعة التدريب هتفيدك جدا تعرف الناس دى بتتعامل ازاى و تفهم اسلوبهم و طريقتهم لما يدخلوا عليك فى الصيدلية و كمان انت هتكتسب خبرة لانك مش من اول يوم هتعمل مبيعات بكام الف ده انت قدامك مشوار لانه مفيش ابدا حاجة بالساهل يا مودى.

عموما انا بتمنى ان ربنا يكرمك سوا هنا او هنا و هسالك سؤال اخير: هل انت جمسك كويس يعنى لياقتك كويسة؟ لانك ممكن تقدم فى الجيش كضابط بيتبع التخصصات و دول بيحتاجوهم قوى و بتبقى اسمك بعدها ضابط صيدلى .. يعنى علم و رتبة مع بعض:D ده انا هقر عليك قر:D....

يلا ربنا يوفقك و يحفظك من عنين الناس و عنيا يا عم و يهديك للصواب ان شاء الله...

و بنرحب بيك معانا مرة تانية يا مودى...

اخوك/ محمود...

اقتباس:

---

المشاركة الأصلية كتبت بواسطة ران

نسيت اباركلك يامحمود انت واخوك على المتياز

الف مليار مبروك وتخلصوا على خير ان شاء الله

ودمت متميزا بردودك المقنعة

---

متشكر جدا لاحترامك رايى و اقتناعك بيه و بشكرك على تهنئتك يا ران....

و اتمنى ان مودى ربنا يكرمه و يهديه للصواب ان شاء الله...

المستقبل بيد الله
اعمل اللي عليك وربنا انا شاء الله يكرمك