موضوع للنقاش من واحد مش فى بلده

السلام عليكم ورحمه الله وبركاته

اولا انا مصرى مقيم بالسعودية طبعا بعقد عمل
طبعا بحب بلدى مصر وبعشق ترابها وبحب شوارعها لكن مع الاسف متغرب بقى لى عشر سنوات ولانى فى بلدى مطحون من الغلا فى كل شئ اخترت الغربة ولكنى تعبت كل ما اقرر النزول وانزل الاقى الحال بقى انيل من قبل وارجع تانى لغربتى وللامانه هنا الحاله المادية كويسة والحمد لله ولكن لمتى ستظل غربة المصريين داخل الوطن وخارجها
خارجها ومعروفه وداخلها وهى بعدم الاهتمام بنا كشعب يستحق ذلك والاهتمام بالاجانب ونحن اولاد البلد لا
اخوانى نحن مظلومين داخل وطننا وخارجه لان فى كل دوله اهتمامهم الاول والاخير بابناء البلد مثال عند دخول مكان سياحى مثلا فطبعا اهم انسان عندهم الاجنبى مهما كان انجليزى
خليجى المهم انه مش مصرى وبذلك يكون له كامل الاحترام والتقدير
على العموم دى فضفضة من مصرى متغرب لاحبابه المصريين اهله اعذرونى وادعو معى بان الاحوال فى مصر تتغير للاحسن بامر الله واولاد البلد يفضلو فيها يعمروها
والسلام عليكم ورحمة الله وبركاتة

ربنا يرجعك بالف سلامة

أولا ربنا يجيبك بالسلامه
ثانيا كل اللى بتقولوا صح بس انتا اكتر واحد حاسس بكدا عشان عايش بره
لكن احنا عشان بقى شىء عادى بالنسبه لنا خلاص كبرنا دمغنا ...........
Dama

ربنا يوفقك وترجع مصر الحبيبه بخير وسلام ودا حال الدنيا احنا مش لا قيين رغيف العيش احنا اللى عايشين فى مصر مسبنهاش ورديين با الزل شوف سعر طن الحديد بقى تمنه كام يعنى مفيش شباب هيتجوز لانه هيسكن فين واحنا عايشين ولا رقابه على شىء كل اللى معاه مال حتى لو من الحرام بقى هو صاحب البلد واحنا العبيد فيها ومحدش يقدر يقوله او يحا سبه ويقوله بتزل عبيدك ليه واخيرا الله الواحد هو المنتقم الجبار ربنا ينتقم منهم

بيقولوا فيه واحد اسمه احمد عز انا ما اعرفشى هو بيشتغل ايه ولاكن على ما حا كولى قلولى ان خد فلوس كل المصريين الموجوده فى البنوك وراح اشترى مصنع الحديد بتاع الشعب المصرى بفلوسهم اشتراهم وبيزل فينا ولا حد يقدر يقوله انته بتعمل كده ليه خت فلوس الشعب واشتريت مصانع الشعب الله يرحمك يا عبد الناصرعندما قال ارفع راسك يا اخى فقد مضى عهد الاستبدادهو اللى رفع راس ابويا وابوك وبعده كمل المسيره الله يرحمه السادات اما اليوم مش لاقيين حد يسا ل عليناالاقطاع زمان كان ارحم من اقطاع اليوممتزعلشى منى انىزهقتك فى غربتك لانى اب مطحون ربنا يرعاك ويرجعك لام الدنيا وانت موفق وبخير وسلام

جزاكم الله خيرا
يعنى الحالة واحده ارجو من الله ان يرفع عن بلادنا الحبيبة الظلم والقهر اخوانى من زمن كان عندنا طبقة
الاغنياء والطبقة المتوسطة والطبقة الفقيرة الان يوجد طبقتين الغنية بهبل يعنى المليون عندهم مثل الجنية عندنا والطبقة مش الفقيرة لا المطحونه والطبقه دى عليها كل شى يعنى الضرائب وخلافة اما الطبقه الهاى مش مشكله لو دفعو رشوة المهم ان فلوسهم تفضل فى الحفظ اه
المهم ربنا موجود وقادر على كل شئ

السلام عليكم ورحمة الله

أتفق معاك في كل كلمة قلتها

فعلا الحال في بلدنا زفت

بس ياترى مرتاح في الغربة

ياترى المعاملة هناك كويسة

ماأظنش

مهما كان بلدك نعمة

على الأقل كلنا هنا زي بعض

لكن هناك احنا بنتعامل معاملة المحتاج

كفاية ان المصري في ايد الكفيل زي اليويو

ممكن في لحظة يرميه لأبعد مكان من غير حقوق ومن غير أي حاجة

بلاش كده

لامته متغرب وولادك ياترى ناوي يعيشوا في الغربة

طيب ياترى هيكون سهل عليك بعد سنين الغربة دي كلها

انك ترجه وتنحت في الصخر من جديد بعد ما العمر يعدي بيك

ساعتها مش هتقدر لا الزمن هو الزمن ولاالعمر ساعتها هيساعدك

كتير جدا أعرفهم الغربة كلت شبابهم وضيعت لمت العيلة منهم

ولما رجعوا بلدهم وحتى ومعاهم فلوس كتير ماادروش يعملوا بيها حاجة لأن ايديهم ناعمة

وهنا في مصر عايزين ايدين من حديد ومخ واعي بننطح في الصخر صحيح

لكن حفظنا الصخر وعارفين حواريه

لكن المسافر بينسى ولما بيرجع بيتوه

ربنا يرجعك بالسلامة

بس اوعي تاخدك الغربة

فعلا كلامك صحيح للعلم ان زوجتى وابنى معى هنا وعن الكفيل فعلا فى ناس وحشين وناس لا
والحمد لله انا هنا ماديا مرتاح وكمان الكفيل فى حالو وانا فى حالى انا صيدلى ولى الصيدله انا وعامل ومساعد وبصراحه كفيلى الجديد طيب والحمد لله وعن الغربة فعلا انا تعبان نفسى ارجع لبلدى ولكن انا فاتح بيتى وبيت ابى فطبعا لظروف المعيشة فى بلدى الصعبة اتغربت
ولكن ربنا هو المعين والفرج من عنده يفرج على جميع المسلمين اللهم امين

ربنا يعينك يارب ويوفقك
وربنا يرجعك لعائلتك و لبلدك بالسلامه ان شاء الله

اللهم امين وجزاكم الله خيرا

الموضوع اكبر من تدهور الاقتصاد يا جماعة
حد يصدق ان الاخلاق توصل للحالة دى فين امان مصر اللى كنا بنضرب بيه المثل
لازم نتغير علشان ربنا يكرمنا احنا باقينا و حشين ليه بنقلد باقى الدول فى اسوا ما عندها بس
ربنا يرحمنا

اللهم امين
وانا بتصفح النت وجدت عنوان باسم هل مصر دوله فقيره ولا معمولها عمل
وكان من الردود رد عجبنى وهو
هل هو ابتلاء بتسليط من لا يرحم على هذه البلد
ام هو من اعمالكم سلط عليكم حيث زادت نسبة المستهينين بالحرام من الناس فاستحقوا ان يولى امرهم مثل هؤلاء

حقا لست ادرى ايهم

من اعمالك سلط عليكم احنا اتهونا في حق ربنا وحق نفسنا يبقي نستحق اللي بيحصل

ربنا يستر
لكن ياجماعة فى ناس كتير كويسين
ارجو من الله ان ينجينا من كل شر ويرزقنا الاخلاص فى القول والعمل اللهم امين

ربنا يرجعك بالسلامه وانشاء الله الحال يتغير

عمي رياض
اولا ربنا يرجعك بالسلامة لبلدك واهلك وناسك
وربنا يرجع مصر لاهلها وناسها زي ما كانت
انما يا عم الحكاية مش كدة
الحكاية انه لو كل واحد يتقي ربنا في المكان اللي هو فيه ها يلاقي اكيد مقابل
انما الناس حالياً بتكسل تشتغل
من اول اجدعها وزير
لغاية اصغرها غفير
يبقي العيب مش في مصر
انت لو بصيت لنفسك
ها تلاقي نص عيلتك موظفين حكومة
وانا برده كدة
لو كل واحد راعي ربنا والله العيشة ها تبقي زي الفل
وربنا يرجعك بالسلامة


انما بقولك

ايه ملاقيش عقد عمل عندك؟:D:D:D

ههههههههههههههههههههههههه هه
ربنا يبارك لكم

http://www.al-afdal.com/up/uploads/e622ef4433.gif
شكرا على المرور

اولا ربنا يرجعك بالسلامة من غربتك و لو اظن ان وضعك الحالى كده احسنلك مهما كانت مساوئه
الموضوع مش موضوع ذمة فى العمل و بس المشكلة ان الفساد بيبدأ من فوق من رئيس الجمهورية و الوزراء و ماحدش فيهم بيتحاسب و اظن انت سمعت ابراهيم عيسى رئيس تحرير الدستور حصل له ايه لما سأل بس عن صحة الرئيس 6 شهور حبس و 200 جنيه كفالة لحد الاستئناف و غير بقى القضايا اللى لسه ما اتحكمش فيها و كذلك المشكلة مشكلة شعب الشعب مع كل الظروف الزفت دى مش عاوز يتحرك و عاوز غيره يدافع عنه انا كنت فى مظاهرة من اسبوعين تقريبا المهم كنا بنهتف لغزة فيه واحد جه قالنا اتكلموا عننا و عن الغلاء قلنا له طيب انضم لنا و اتكلم معانا عن الغلاء و احنا موافقين تعرف عمل ايه ؟؟؟ سابنا و مشى خاف من الامن ادى الشعب المصرى فى الوقت الحالى عاوز غيره يدافع عنه و هو يفضل جنب الحيط لا يمكن كمان يشمى جوه الحيط نفسه لو يقدر الوضع الحالى مش حايتصلح غير لما الشعب يفوق من الغيبوبة اللى هو فيها و اللى مش نافع فيها اى حاجة دى و يبدأ يغير وضعه الزفت دا لوضع احسن غير كده يبقى بصراحة الشعب يستاهل اللى بيجرا له

عايزة اقولك ان المصرين بجد غلابة وتعابنين اوى دة ممكن يكون بسببك حاجات كتير وليس الغلاء بس

والله مش عارف ايه هو الحل ولكن فعلا لو كل واحد فينا يتقى ربنا فى غيره وفى نفسه ممكن الحال يتغير وربنا قادر يشيل العلل

اهلا اهلا وسهلا عمو رياض

الحال من بعضه انا كمان متغربه وعايشه في السعوديه

مولودة فيها يعني بقالي 17 سنه في البلد الجميله ديه

بجد خلاص الواحد اتخنق بس هنعمل ايه الحياه كده محدش بياخد كل حاجه

بس للاسف انت تقدر انك تنزل وتعيش وتستقر في مصر اما انا لا لان بابايه مبينزلش مصر يقالو بتاع 20 سنه

مشفش بلده ولا شاف اهله

فاحمد ربنا انت في نعمه عظيمه

وبجد انا حسه بيك جدااااااااااا لاني في نفس الموقف

لا اهل ولا ناس ولا حد تعرفه عيشه كئيبه بس الحمد لله علي كل حال

بس انا انصحك نصيحه انك تنزل تعيش في مصر ولا تدفع تمن الغربه والبعد عن اهلك

صحيح مصر فيها حجات كتير مش ولا بد بس بلدك وفيها اهلك وناسك واصحابك وحبايبك كلهم

اما في السعوديه بيعملوا الاجانب علي انهم حاجه كده ملهاش لازمه

بجد متخليش ولادك يتربوا بعيد عن اهلهم ويعيشوا بعيد عن بلدهم

http://up.biloz.com/uploads/f96765cd62.gif

اقتباس:

---

المشاركة الأصلية كتبت بواسطة ryad666

فعلا كلامك صحيح للعلم ان زوجتى وابنى معى هنا وعن الكفيل فعلا فى ناس وحشين وناس لا
والحمد لله انا هنا ماديا مرتاح وكمان الكفيل فى حالو وانا فى حالى انا صيدلى ولى الصيدله انا وعامل ومساعد وبصراحه كفيلى الجديد طيب والحمد لله وعن الغربة فعلا انا تعبان نفسى ارجع لبلدى ولكن انا فاتح بيتى وبيت ابى فطبعا لظروف المعيشة فى بلدى الصعبة اتغربت
ولكن ربنا هو المعين والفرج من عنده يفرج على جميع المسلمين اللهم امين

---

بسم الله الرحمن الرحيم

ومن يتق الله يجعل له مخرجا ويرزقه من حيث لا يحتسب

الغربة جوه بلدنا صعبة وبره بلدنا أصعب

لكن لما الظروف بتكون أقوى بنقول يارب

والحمد لله الكفيل كويس زي مابتقول

لكن كل اللي لازم تفكر فيه وطبعا انته أدرى بظروفك

ازاي تعمل لنفسك في بلدك حاجة ترجع لها

سدأني مش كل الصورة سودا

فيها نقط بيضا بس محتاج أولا رحمة ربنا

ودي بتيجي بالقرب من ربنا

ثم تفكير سليم ومتأني وناس ثقة مية في المية في بلدك

عشان يساعدوك

واحدة واحدة هتلاقي حاجة ترجع لها عشان خاطر مستقبل ولادك

وبعدين حالك أحسن من ناس زمان فيه النهارده نت ممكن تكلم أهلك من مصر وتفضفض معاهم وتسمع حلاوة لهجتنا المصرية

وكلنا هنا أهلك

اختى اسيرة الغربه والله مش عارف اقولك ايه ربنا يرجعك انتى واهلك بلدك بالسلامة وكلامك بانى انزل لبلدى
ده لانك واعذرينى والدك مسئول عنك انما انا مسئول على كذا عيله والظروف فى مصر صعب الحمد لله على كل حال وجزاك الله خيرا
بدرابراهيم جزاك الله خيرا
شمس الأصيل ربنا يخليك ويبارك لك بس الوقت القليل اللى نزلت فى مصر حسيت ان كل شئ اتغير الله المستعان