انا ... والتهييس ... وهواك
انا و والتهييس وهوااك .. برنامج ..للتهيس .. و عن التهييس
مع لولى بوب
الحب
ذلك الشعور السهلبيسي الذي يزعزغ عقول البشر
و يهشك قلوبهم
مستمعينا لسه بنتكلم عن الحب وحلقتنا النهارده عن
الاستهبال في الحب
معاكم لولى بوب علي حموكة fm مزيكا علي كيف كيفك
في.. انا والتهييس و هواك
من دلوقتي ولمدة ساعتين
مستنين تليفوناتكم علي 6066
او علي 8555022
او علي ايميل البرنامج
علي هواك ات نيل راديو بروداكشن دوووت كوووم
برعاية ابليس كومباني و ان تاتش و كريمات زحلقها
دايما بتمر بينا اوقات بنحس فيها اننا مش قادرين نعيش من غير الحب و من غير الحبيب
و الشعور دا متولد و منبثق من الاحساس التواجدي الكوني في اللامركزيه العصبيه للقلب
و دايما بتقابلنا مواقف كلها استهبال في الحب
ياترى احنا بنعمل ايه و رد فعلنا بيكون ايه لما نقابل حد بيستهبل في الحب ..
وخصوصا اننا جيل موبايلات و انتوا عارفين ان انا عندي 160 سنة فحاسة بيكم و حاسة بمشاكل الجيل كلها ...
اولا الرصيد اللي بيخلص في يوم و انت لسه شاحن كارت ب 100 و تفضل تحرق في
دقايق علي حبيبتك و في الاخر لما الرصيد يقرب يخلص تقولها بحبك بحبك
امموووه
تقولك انت بتستهبل يا حبيبي اتلم حد من خدمه العملاء يشوفنا
او حبيبتك اللي تفضل تكنسل عليك تكنسل عليك عشان استخسرت فيها كوزين درا علي الكورنيش
و انت اصلا مفلس مش لاقي تاكل و لما تيجي تصالحها علي الموبايل تلاقيها بتكنسل ..
فتضطر تصالحها بكارت ب 5 و تستهبل .. تلاقيها بتصرخ في وشك و تقول
انت بتستهبل؟؟
اقل من 100 متورنيش وشك
و حبيبك اللي ييجي في اوقات يعمل فيها عالم فلك و يقولك انا بقرا الكف
و يفضل يفعص في كف ايدك ولا كأنه شاف ايدين قبل كدا
و في الاخر تقوليله
انت بتستهبل ؟؟ حد يشوفنا
و انتوا اساسا قاعدين في الشارع
مستمعينا الاستهبال في الحب حالة بتمر بكل المهاطيل و المهابيل من ابناء الجيل و لو مستخدمناش عقلنا في الاستهبال بيقلب عباطه
وممكن مغص كلوي
مستمعينا مستني تليفوناتكم علي 6066
او علي 8555022
او علي ايميل البرنامج
علي هواك ات نيل راديو بروداكشن دوووت كوووم
برعاية ابليس كومباني و ان تاتش و كريمات زحلقها ياما زحلقها
نستقبل اول اتصال تليفوني و نقول الوو
الوو
الووو
الوووو
- الوو ايوا يالولى بوب
اهلا نتعرف بيكي ..
- بثمه من بنــــــــــــــــها
اهلا بيكي يا بسمه ياريت تعلي صوتك شويه
- معلش يالولى اثل انا بتكلم من تحت البطنية ..
مفهوم طبعا عشان محدش يقفشك و انت بتتكلمي
بثمة بنتكلم النهارده عن الاستهبال في الحب .. تقدري تقوليلي يعني ايه الاستهبال في الحب و بيمثل لك ايه
- بصي يالولى اولا انا بموت موت موت جدا طحن في البرنامج بتاعك و والله مش بفوت ولا حلقة منه ابدا خالث
و ثلملي علي الشقي الحكروت موت موت حتومه و قوله انه لذيذ اووووي و بنحبه مووت موووت ..
هو بيضحك وفاتح بقه زي الحمار اهوه و بيقولك
مرسي ليكي يا بسمه
- يا لولى انا بكلمك عشان الحلقة بتاعتك النهارده مخثوث عشاني
انا كنت بحب واحد و انا في 2 ابتدائي و فضلنا نحب بعض للجامعة
جميل
- اهـء اهـء اهـء
لا اهدي يا بسمه و قوليلي ايه اللي حصل
- يالولى اخد كل حاجة كل حاجة
احـم
حتى الموبايل
يالولى بقولك كل حاجة
اهـء هـء هـء
طيب اهدي يا بسمه
بصي يا بسمه
الحب شعور متبادل بين اتنين
مينفعش طرف واحد من غير الطرف الاخر و لازم الاتنين يكونوا متفاهمين و متعاونين
هو دا الحب اللي هايدوم طول العمر و بكدا نحل كل المشاكل اللي تقابلنا حتى مشكلة غسيل الالوان مع الابيض .. لان تايد
بـــــــــــــ رغوته الجديدة حل المشكله
مستمعينا نسينا نقول ان تايد من رعاة البرنامج
مع تاااااايد في الغسيل مفيش مستحييل
بشكرك يا بسمه علي اتصالك و بهديلك اغنية السوبر ستار عمرو دياب ....
يا قاعدة علي الترعه و بتغسلي المواعين
جاتك ستين دا شرفك بقى في الطين
نص ساعة اعلانات ..
انا والتهييس و هواك برنامج للتهييس و عن التهييس ومعاكو بنت الايه
الحب
لحظات من الامل متولدة في وسط غابات الغضب البشري الجارف المتعارض مع احداث الحياة
فالحياة بدون حب
كالشجرة بدون موبايل ..
مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 6066 او علي 8555022
او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و
كريمات زحلقها و بيبسي و كوكا كولا و تايد و برسيل و اومو و اريال ..
الوقت بيمر معاكم بسرعة و حاتم بيضحك مش عارف علي ايه بس تقريبا عشان البت بتاعتة
اللي بتبيع ترمس علي كوبري ابو العلا حولت له 5 جنية رصيد ..
هاه ؟؟ عشره رصيد
طيب اشطه يا حتوم ..
نستقبل اتصال تليفوني و نقول الووو
الووو
الووو
الوووووو
الظاهر الخط قطع
الوو ايوا يا لولى
اهلا نتعرف بيكي
ياريت تعلي صوتك لان الصوت بعيد اوي
الوووو
انا اسماء من المنصورة
اهلا بيكي يا اسماء
سمر بتكلم النهادرة عن الاستهبال في الحب
انت ايه رأيك في الاتستهبال عامة و خصوصا في الحب
-انا قولت اسما مش سمر يا لولى
_لولى انا عاوزه اقولك في الاول انت انتي احلى و اجمل اعلامية و صوت سمعتة في حياتي و انا بسجل كل الحلقات بتاعتك و بحبك اوووي يا لولى ..
ربنا يخليكي يا سماح ..
اسماء ......... اسماء
انا كنت بحب واحد نجار مسلح و بعدين كنت في يوم ماشية في الشارع لابسه باضي جميل و ديق موووت و بعدين واحد عاكسني فحبيبي شلحف
مين يااسماء ؟؟
_شلحف هو اسمه شادي بس انا بدلعه شلحف
قام ضارب الواد اللي عاكسني بالعتله الحديد شاقق له دماغه
هو دلوقتي في السجن
و انا بحبه اوي يا بنت الايه و مش عارفه اعمل ايه
و اهلي بيضغطوا عليا مووووت مووووت عشان اتجوز واحد قد ابويا
لولى انا مش عارفه اعمل ايه
بصي يا عنايات
_اسماء
اه سوري
بصي يا اسماء
بنقابل ناس في حياتنا بنحبهم و بيحبونا و ديما كتير بنكون شبهمم و زيهم .. حتى الحب نفسه سعات بيحب انه يتكون على حبيب و حبيبه
و حبيبك بيحبك و ان شاء الله يطلع بالسلامة
شكرا يا ساره على اتصالك و بهديلك اغنية السوبر ستار تامر حسنى
يا مسجون في لومان طره
نفسي اكل معاك كوز دره
مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 6066 او علي 8555022
او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و
كريمات زحلقها و بيبسي و كوكا كولا و تايد و برسيل و اومو و اريال ..
نص ساعة اعلانات
