ستة اسباب عبيطة تخليك تتجوز عرفى
بسم الله الرحمن الرحيم
ستــة أسباب عبيطة تخليك تتجوز عرفــى
!!!!!!!!
دلوقتى وفى الزمن دا أى واحد وواحدة الحب مشعشع بينهم بيقولولك
الجـــواز العرفى هو الحل
ولو على التكلفة محدودة جداً
ورقة مقطوعه من كشكول المحاضرات اللى مليان
بالحب والهيام ومفيهوش ولا كلمة الدكتور قالها
.....
+
علبتين كانز لتامر وهيثم اللى هيشهدوا طبعاً
( والورقة إنضربت يا باشا)
بس إحنا يا باشا ماشيين قانونــى
كيس شيتوس لنهى اللى هتطرقع زغروتة فى الجامعة تسمع اكبر مدرج
عشان كدا نبقى عملنا الإشهاااااار
دا طبعا + 30 جنيه إيجار للأوضة الرايقــة
اللى هيأجروها فى أنضف فنادق العتبــة
عشان شهر العسل
اللى هو يوم واحد بس
....
بعدها البنت هتكتشف إن اللى عملته دا شنيع وفظيع
وهتصوت وهتلم عليك الدنيا
والنهاية هتبقى ف القسم إن شاء الله
السطور الجاية دية
الاسباب العبيطة ولا مؤاخدة
بعضهم بيخدها ذريعة للجواز العرفى
وعشان هى أسباب عبيطة
فهى طبعا عبيطة
ولا إيه رأيكم
الإستعجــال
مفيش وقت خالص الحياة دى قصيرة أوى يا جدعان
هعيش حياتى إمتى بقى؟؟؟؟؟
(أكثر الاسباب العبيطة شيوعاً)
نيجى نسأل البنت والواد ليه عملو كدا
البنت بكل بجاحة::إحنا عارفين إن احنا هنتجوز بعد ما نخلص..
بس انا مش بقدر اعيش ولا يوم من غير ما اشوف سيد!!!!
وفى نفس الوقت هتلاقى سيد بيقولك بكل تناحة::أنا عارف ان ممكن اتجوز حلاوتهم خلال سنتين.. بس مش حرام السنتين دول يضيعوا كدا؟؟؟؟ من عمرنا هوا
يرضى مين دا؟؟؟؟
دا طبعا يرضينى لسبب بسيط مش عبيط
أن العلاقة بين البنت والولد لو منضجتش على نار هادية هتبقى نيــة..
ليه بقى؟؟؟
لإن فى اول قطمة منها هتبقى لذيذة وحلوة
لكن بعد كدا هتحس إنك بتاكل ف رحم رخيص
مش بتاع ايناس الدغيدى
هيبقى مالوش طعم
هتلاقى نفسك بتدور على طعم تانى جديد
نفهم من دا إيه بقــى
؟؟؟؟؟؟؟
إن اللى بيجى بسرعة ..بيضيع بسرعة
ودا على الفلوس
فمابالك لو على البنى آدم
؟؟؟؟؟؟؟؟
الأهل رافضيــن
بابا حالف يطلق ماما لو إتجوزت سيــد
ولو كنت اخصائى اجتماعى هتلاقى حلاوتهم بتعيط اوى وبتقولك:
والله يا استاذ حسونة مكنتش عايزة أعمل كدا
إهئ إهئ إهئ
بس سيد جه وإتقدمــلى وبابا رفض
وكمان راسه وألف سيف إنى متجوزوش
ماله سيد؟؟؟
وحش سيد؟؟؟
دا حتى درفة وملو هدومــه
بابا طرده من البيت ومسابوش حتى يكمل كلامه
وحلف بالطلاق إنه ميدخلش سيد بيتنا تانى
ليه وعشان ايه كل دا؟؟؟
ماله سيــد؟؟
وحش سيد؟؟
دا حتى كسيب وبيتاجر فى الـ ...
فى الـ.. يعنى بيتاجــر وخلاص
طبعا استاذ حسونة بيحن وقلبه يرق ويقتنع بالكلام
بس لو فعلا بابا حلاوتهم عنده اسباب ترفض سيد
ولو كان سيد فعلا غير مناسب ليها؟؟
ولو باباها يعرف عنه اللى هى متعرفوش؟؟
هنفهم إيه بقى من كدآ
إن رأى الاهل فى الاغلب_ إن لم يكن دائماً_
بيكون على صواب ..
حتى إسألو حلاوتهم...
الظروف الإقتصــادية
مفيش فلوس..حتى إسألو نجلا !!!
كان سيد بيقعد على قهوة احلى من الشرف مفيش مع صديقه اللدود عبده توكل
كح كح كح كح
تعرف ياد يا عبده انا اتجوزت البت حلاوتهم ليه؟؟
ماتقولى ليه؟؟
ماتقول ياجدع؟؟
آه نسيت إنك اخرس
أقولك انا ليه
هو إحنا لاقيين ناكل
هو إحنا لاقيين نشرب الشيشة
كح كح كح كح
لما نلاقى نجيب عفش وشقة وشبكة
ومش انا بقول كدا لوحدى
حتى الست المحترمة نجلا قالت
خلاص .. بح .. مفيش ..شطبــنا
أيوة هى كانت قصدها على الفلوس
مش مصدقنى؟؟؟
لأ هى قصدها على الفلوس مش اى حاجة تانية
إحنا ممكن نتعاطف مع سيد لو حاول يعمل حاجة وفشل..
لو دققنا النظر هنلاقى إن سيد جته وملو هدومه
ودا مش كلامنا دا زى ما قالت حلاوتهم
يعنى لو سند على الحيط هيهده( صحة يعنى)
طب ليه يا سيد مدورتش على شغل؟؟
ليه اكتفيت تشرب شيشة وتتفرج على نجلا؟؟
نفهم إيه من كدآ
إن الشيشة مضرة بالصحـــة
ههههههههههه
التقليـــــد
إمممم...!!!!
سبب عبيط فعلاً
هتلاقى داليا سعيدة جدا وهى ماسكة ايد أحمد
بعد ما اتجوزا عرفى وبتقوله
كنا بنحب بعض..
ومكناش عارفين هنتجوز إمتى..
لغاية ماعرفنا سيد وحلاوتهم
وعرفونا الطريقة المفتكسة دى
ومتكلفناش حاجة..!!!
ممكن نبقى نقول لاهلنا بعدين
نحطهم قدام الامر الواقع
لما اكون خلفت ياسمين وشادى
أنا ناوية اسميهم كدا..
يعنى دا اشبه بتقليد الملابس
اللى بنقتبسها من الغرب والعادات والتقاليد بردو
من غير اى فهم والرجوع لعادتنا وتقاليدنا الاصلية...
(ما يصلح لزيد ..لا يصلح لعبيد)
يعنى لو اللى بيعمله زيد غلط.. هتقلده؟؟؟
ياريت عبيد يفهم!!!!
التجـــربــة
الواحد لما بيروح يشترى قميص جديد بيعمل إيه
؟؟؟؟؟؟
بيجربــه
زى سيد وحلاوتهم بيعانو من البلاهة منقطعة النظير
لإنهم هيقولولك بكل ثقــة
إحنا قولنا نجرب بدل مانعمل حاجة فى الحرام
قولنا نتجوز عرفى
لو اكتشفنا إن الجواز بينا حلو
أكيد هنعلن جوازنا
( ودا لما تشوف قفاها طبعاً)
ياريت نفهمها وبلاش رجعية
أى حاجة اليومين دول قابله للتغير
زى ما قولت لو بتقيس القميص وقطعت كمه
مين هيدفع تمنه؟؟؟
إنت اللى هتدفع
يا جماعة من الآخر
منروحش محلات فيها ملابس مضروبة
هههههههههههههه
الحــــب
ربما يكون السبب دا اقل عبطا واكثر منطقيــة
من وجهة نظر المتقدمين على الجواز العرفى
هتلاقى سيد بيبصلك وبيبحلق ويقولك
بحبها ياااااااد
دا حتى خليتنى اكتب فيها كلام بالفصحى
فسح كدا ف القعدة
وإسمع
عندما اراها بعيدة عنى يذوب قلبى ويصبح كحبة الفيتامين سى
عندما تضعها هى بأناملها الرقيقة فى كوب من عصير القصب
آه من المااااء آه
شوفت ياد الحب عمل فيا إإيه
وهتلاقى حلاوتهم وهى واقفة مع اختها فى المطبخ بتقولها
تعرفى انا بحب سيد دا مووووووت ووت وووت
دا حتى خلانى اكتب عنه بالفصحى
حتى إسمعى احم احم...
عندما اراك يا سيد تتجمع ذرات قلبى التى ذابت
فى قرص فيتامين سى
عندما بعدت عنى ورجعت مرة اخرى تسكن فى قلبى ذكرتنى بعصير البرتقال الذى غاب عنى
وبمدا قرروا يتجوزا عرفى نظراً لإشتراك كوب الماء الذى جمع بين قرصى الفيتامين
( القلبين)
بس لو إنكسر الكوب دا؟؟
ولو حطينا قرصى الفيتامين فى كوب واحد بس فى ماية مالحة
هيكون فى طعم للبرتقال
؟؟؟؟؟؟؟؟؟
حسبى الله ونعم الوكيل فى الولاد والبنات اللى هتخلى البلد تتقدمّ!!!!!!
أيوة هتتقدم فعلاً
بس لورى فى الاتجاه الغلط
ربنا يهدى كل عـــاصى
