بتحبها طيب عملت ايه علشان تقول لها
السلام عليكــــــم ورحمة الله وبركاته ...
كل عيد حب وانتم دائماً في سعاده
النهارده حبيت أقدم موضوع يمكن لو فكرتنا فيه مرتين
نلاقي سبب جديد لإسعاد كل بيت من بيوتنا
لان في ظل ظاهرة الطلاق المبكر مبقاش حد عنده أمل انه ممكن يعيش سعيد في يوم
علشان كده فكرت اننا ممكن ببعض اللمسات الجميله نقدر نحرك القلوب
ولو القلوب اتحركت يبقى هنعيش سعاده لا تنتهي
المعنى الجميل اختفى من حياتك ومن حياتها تفتكر ليه ..؟
هي
مش حاسه انها انسانه محتاجه طول الوقت تحس انها اميره في بينتها
متوجه على عرش قلبك حتى ولو بكلمه تقدير عن كل ما تفعله في حقك وحق أسرتك
انت
مبقاش عندك وقت تحسسها بالشعور ده وخلاص اتجوزتها وبعد كده خلتها ضمن مقتنياتك في البيت
انتم الإثنين اصابكم الملل ...
هي
لان مبقاش عندها تحفيز قوي منك يخليها تكمل مسيرتها في اسعادك
وانت
علشان مبقاش عندك وقت ولا سعة صدر علشان تعبر لها عن كيانها كامرأه
يمكن عيد الحب النهارده يكون بدايه جديه ليك وليه ... يمكن!
مش هقول لك هات هديه لاننا في منتصف الشهر وعارفه ان المرتب خلص
بس اعتقد لو جبت ورده وطبعت عليها روح محبتك لها هتفرق كتير
ازاي ده ..؟ هقولك
اي امرأه في الدنيا أسرع وسيله تجعلك تصل الى اختراق قلبها هي الكلمات الجميله
او نظرات بها محبه وشوق وخوف وإحتواء تحسسها بالأمان
لو جبت ورده وادتها لها بس بهدف الواجب وعلشان ماتقولش انك راجل مش رومانسي
تأكد ان هيكون لا قيمه لها عندها لانها ما حستكش فيها وحتى لو جبت لها
ماسه وانت مش حاسس انك حابب انك تهديها لها وبتتعامل بردو بهدف الواجب بردو مش هتعني عندها شئ
كده بقت الكوره في ملعبك ياعني الستات مش بتطمع في حاجات كبيره زي ما بتقول عنها
انما بتطمع في الإحساس بالشئ المقدم
تعالى بقى تخيل انك نفسك تهدي زوجتك النهارده أو خطبتك ورده وروحت محل الورد
واخترت بعنايه الورده اللي هتهديها لها طبعاً كله عند بياع الورد زي بعضه لكن انت عنيك هتقع على ورده معينه حابب انك تهديها لحبيبتك
جبت الورده وغلفتها وطول الطريق محافظ على أوراقها من التساقط
وانت ماشي عديت على مكتبه جبت كارت وكتبت فيه الكلام إللي قلبك عايز يقوله حتى لو كلمه واحده بس
وروحت البيت وحطيتها في مكان قريب انها تشوف الورده فيه فتحت الكارت وقرأت كلامك
تخيل إيه ممكن يحصل ........؟
هل هتطلب مصروف البيت
هل هتنكد عليك في اليوم المفترج ده
هل هتسمع صوت عالي منها ولا تريقه على الورده
اتحداك مش هتلاقي منها غير كل سعاده بـ إنها انسانه لها قلب يحترم
لانه وصل لها احساسك بيها حتى لو كنت كاتب في الكارت اعتذار لها
عن كل الأيام إللي انشغلت عنها فيها او كتبت فيه تقديرك لها
او حتى بتشكرها على كل شئ بتعمله من أجلك ومن أجل بيتك وأسرتك
أو حتى كل حاجه بتزعلك منها ونفسك انها تغيرها
تخيل ورده لا تؤثر في ميزانية البيت ولا تؤثر على مصروفاتك عملت فيها ايه
مش مصدق صح ..؟
طيب جرب كدا وشوف ايه هيحصل والمناقشه تخليها بعدين
المهم في اختيار الهديه مش سعرها المهم الإحساس إللي هتقدمه بيها يفرق كتير اوي واغلى بكتير اوي من ثمنها
خلصنا من أدم وطبعاً هيقول هو كل حاجه انا اللي ابدأ هقول لك
ان إللي بيبحث على السعاده مش بيفكر مين يبدأ المهم انه يعطي احساس علشان ياخد سعاده
بيزرع محبه علشان يحصد شوق ولهفه وإحتياج
اما انتـِ
فالسعاده لا تكتمل الا اذا جعلتي بيتك مملكه حتى تستحقي ان تكوني ملكه متوجه على عرشك
اجعلي هذه الليله تختلف عن باقي الأيام حتى تعيد السعاده لكل أسرتك بلمساتك الرقيقه
نتفق ان النهارده بلاش نتكلم عن مصروف البيت
ولا مشاكل العيال ولا تعبك في البيت ولا تقولي انك خدامه في البيت
لان مافيش ام تسمي عطائها لولادها ولبيتها خدمه لهم لكن ممكن نسميه
عطاء وافر لناس كلهم مسؤلين منك ولو مش هتلبي احتياجاتهم تأكدي ان مافيش ما يستطيع ان يأخذ دورك
ولو خطيبه بلاش تزهقي خطيبك النهارده بالشقه والتوضيب
وماما قالت وبابا قال وتنكدي عليه لدرجة انه يكره ان جالك النهارده
ممكن نتكلم في حاجه مفيد زي الحياه السعيده مستقبلاً
انكم تتفقوا ان بيتكم لازم يكون مميز عن بيوت أصحابكم من محبه وخوف واحتواء
طبعاً ماحدش هيوصل للمثاليه ولكن احنى بنحاول نلاقي مداخل جديده لحياتنا تجعلنا سعداء
حتى ولو للحظات قليله مش شرط يكون بس في عيد الحب
اجعلى ولو يوم كل شهر وسميه يوم حب بدون مشاكل ولا قلق
طيب اللي جوزها مسافر ولا خاطبها ولا العكس يعمل ايه
يرجع للطريقه القديمه يبعت جواب بالبريد
ويقول كل إللي عايز يقوله ويكون معاها الليله دي حتى لو بكلماته
الموضوع مش خيالي انما هو رحلة بحث عن السعاده
ومن ابسط الأشياء ان الإنسان يحس ان لسه عنده قلب مازال ينبض
برغم قسوة الحياه ومشاكل الأيام ممكن نخلي النهارده يوم مختلف ..؟
ومش بس النهارده ممكن نعمل كل يوم في الشهر او في الإسبوع أو كل يوم حسب ظروف كل واحد
يوم للقلوب فقط لكـِ نبحث عن سعاده جديده في بيوتنا
انت و انتـِ
أحترم أن تكون لها فارسها طول العمر حتى ولو بكلماتك الرقيقه التي تهمس لها بها
وانتـِ أحترم ان تجعلي ذكائك وقلبك يعملان معاً حتى تجدي ما يجعلك أميره متجدد في عيونه كل يوم
بكل حب
اتمنى لكم حياه سعيده ومتجدده كل يوم
بقلم
هايدى دياب
14 - 2 - 2010
