اولا ربنا يخليك ياهشام ويخليلك الوالد والوالدة
تسلم يا محمود ربنا يحفظك
ثانيا لا الكلام ده من قلبى والله
ماشي ياحاج ولا يهمك
ثالثا اْكيد هينفع ياهشام لاْن مصر مش تركة والرئيس ورثها هو وعائلته لا طبعا بس هينفع فى حالة واحدة لو قدرت الاحزاب تقوى نفسيها تعال شوف النهارده كم عدد الاحزاب اللى موجوده فى مصر اعتقد 24 حزب وطبعا ده كم كبير جدا وبعدين سيبك من الكم خلينا فى مضمون الاحزاب دى ايه اللى بتقدمه للشعب مش بتقدم غير حاجه واحدة وهى تكملة الجزء الخاص فى الدستور بوجوب وجود احزاب بس كده غير كده انا اتحدى وحتى لو فى بس مبنحسش بيها يعنى حاجه غير ملموسة بالمرة وسيبك ياسيدى من عدد الاحزاب وكميتها وكيفيتها وتعال شوف المشاكل اللى موجوده فى كل حزب ومتقوليش الحزب الوطنى هو اللى خلق المشاكل دى لا انا متابع كويس مشاكل الاحزاب دى بس عايزك تلقى نظره على رئيس كل حزب من هؤلاء الاحزاب وقارنه بمبارك من كذا ناحية وانتى فاهم كويس ايه وجه المقارنه
كلامك مظبوط بس مش في كل الحالات واعطيك مثال
(((انا علي فكره مش اخواني اولا بس يعني ايه يطلع واحد زي احمد عز ولاغيره من الحزب الوطني ويقولك الحزب او الجماعه المحظوره يعني بيشوة الحزب الاخواني
وانا دايرتنا اللي ماسكه 2 اخوان مسلمين وقارنت بينهما وبين اللي قبلهم واللي قبلهم كانوا حزب وطني والفرق بينهما كبير قووووووووووووي الاخوان ناس بتشتغل كويس وبتعمل بما يرضي الله
ويعني ايه كل يوم ينزلوا يقبضوا علي اي حد ملتحي وانا ليه ناس اعرفها كتير قوووووووووي اتقبض عليها بسبب تربيه الذقن ذور وحاجات كتير قووي يعني من الاخر بيحاربوا الاخوان باي طريقه مشروعه او غير مشروعه )))
وفي احزاب ومستقلين كتير كويسين بس للاسف الاعلام والحكومه بتحاربهم وكل حاجه واضحه زي عين الشمس
رابعا ياراجل قول كلام غير ده يعنى عايز تقنعنى ان ايام عبد الناصر مكنش فى اهانه ينهار ابيض ياهشام مسمعتش عن الاهانة والتعذيب فى ايام عبد الناصر سيبك من كده هقولك حاجه تانية السد العالى اللى احنا بنتعظم فيه وبدعي لجمال عبد الناصر عشان عمل السد دى خيبة والله خيبة تعرف ليه ده خله كل مصر رهينة تحت السد العالى فاهم انا بقولك ايه وغير كده ده ايه ورط مصر في 3 حروب خاسرة كلهم واليهود كمان فى عهده احتلوا المسجد الاقصى وكمان ياعم خله مصر مديونه للبنك الدولى كل ده مش اهانة انت تعرف يعنى ايه معنى ثورة اللى عبد الناصر عملها وبنحتفل بيها هقولك هى خروج عن وضع راهن الى وضع اخر مختلف سواء كان وضع افضل او وضع اسواْ بس مين اللى يقوم بالثورة الشعب مش مجموعه ضباط الشعب هو اللى يقوم بيها لتغير نظام الحكم فى البلد يعنى بلبلدى كده مجموعه من الشعب هى اللى تقوم بالثورة مش شوية ظباط فى الجيش هما اللى يقوموا بيها ومين اداهم الحق فى كده ده بالنسبة لعبد الناصر اما السادات انا شخصيا بحبه على المستوى الشخصى لكن لو على المستوى العملى والرئاسى مش هيكفينى سنه ماعلينا خلاصه القول انه كل رئيس وليه سلبياته
كلامك زي الفل يامحمود
هختصر معاك مقارنه حسني بجمال في جملتين
لما حصلت النكسه في ايام عبد الناصر الراجل من نفسه اعلن التنحي عن المنصب والناس طلعت في مظاهرات وطالبوا بتكمله المسيره والغاء الاعلان
((( الشعب في حب جمال )))
واللي احنا فيه ده دلوقتي والله العظيم مش نكسه بس ده نكسه ووكسه واهانه وفساد وبلاوي انا لو قعدت اكتبه يبقي اخد اجازة من الشغل يومين علشان تخلص
والشعب بكل فئاته يعمل مظاهرات ويقولوا لحسني كفايه كفايه انت كبرت وعجزت كفايه ياريس البلد خربت علي الاخر وللاسف مش بيفكر انه يسيب الكرسي ماسك فيه بايده واسنانه
(( الشعب كله بكل فئاته والمظاهرات هي اللي بتتكلم بيكره حسني ))
خامسا هقولك بعض الايجابيات وبعض السلبيات لانى انا طولت عليك بس صدقنى الموضوع كان مهم جدا
ولا طولت ولا حاجه خد راحتك
السلبيات غلاء الاسعار ودى حاجة واضحة جداااا - الفساد وده طبعا من زمان وطبعا تراكم- حكومة المستثمرين بمعنى ياهشام ان الحكومة الموجوده دى هى الحكومة الوحيدة اللى من اولوياتها المسثمر الاجنبى ويليه المواطن المصرى - طبعا انت هتقولى بس كده وفين البطاله وتوشكى وفين وفين اه انا معاك بس صدقنى فى سلبيات ممكن متتشفش او بمعنى تانى ممكن متكونش سلبيات يعنى الشباب دلوقتى عمال يقول البطاله البطاله ياسيدى سيبها على الله وانزل انت دور على شغل الحكومه دلوقتى خلاص مبتشغلش حد هعد بقى اقول البطاله.
وهو يا محمود الشباب بيكره الشغل وبيحب قعده القهوة وياخذ المصروف من باباه ياراجل مش للدرجادي
الايجابيات طبعا انا مش من النوع اللى هيكتب شعر فى شخص بيحبه لا والله بس هقولك حاجه واحده بس كفايه انه قائد الضربة الجويه الاولى بس مش هقولك اكتر من كده طبعا هتقولى مهى مش فى حكمه اه معاك حق بس الايجابيات واضحه جدااا فى عصره وفى ناس معينه بتتكلم فى الايجابيات دى انا مش منهم
طبعا انا اقدم لها الانحناء كقائد الضربه الجويه
بس برده الحرب مش بتنتسب لشخص بعينه
كم اسره او عائله في مصر كان فيه شهيد او معاق بسبب حرب اكتوبر
بس كان نفسي اسمع منك ايجايباته ((واجاباته نحو شعبه بس مش الانجازات وبلاش نتكلم عن الانجازات))
سادسا الله يسلمك ويخليك ياهشام بس انا لسه رايح من يومين يعنى ملحقتش ارجع لسه ياعم بدرى
تروح وترجع بالسلامه واتمني لك رحله سعيده وتستمع به انا شاء الله
سابعا اتمنى تكون مزعلتش منى وياريت نكون اصدقاء فى الكافيه طبعا ليه الشرف......نورتنى ياجميل ودمت بخير وعقل دائما متفتح
انا اللي يزدني شرف طبعا يامحمود وانت اخ طبعا
انا اسف علي الاطاله
والاختلاف لا يفسد للود قضيه
دمت بخير وسعاده وصحه وراحه بال وود
