طهقـــــــانه و طهقــــــــان حب إلي الأبد

حدث في مثل هذا اليوم

من: طهقانة
الى: طهقان
*******


في مثل هذا اليوم.. من خمستاشر سنة واحنا لسة طهقانين جداد كانت الحياة جميلة رغم انها كانت صعبة
فاكر يا طهقان لما اتجوزنا في الشقة الصغيرة اللي في الدور الثامن واللي كانت من غير اسانسير وكنا نشتري بجنيه لب ونقعد نقزقز على السلم لحد ما نوصل ونترمي على الكنبة من التعب
و لاّ يوم الفرح لما اصريت انك تشيلني قلتلي حشيلك من السادس وعلى ما وصلنا الدور السادس جبت زيت
*******
ولاّ فاكر الاوضة المثلثة اللي كانت محندقة ويادوب حاطين فيها كنبة نونو وأوضة النوم اللي اضطرينا نهد بلكونتها علشان توسع شوية وتكفي الدولاب البلاكار، ولا المطبخ كان اتجاه واحد يا رايح يا جاي مينفعش اتنين يدخلوا سوا
والحمام بقى كان فضيحة لا ممكن ابدا تدخل الا وتسيب الباب مفتوح واي حد معدي يمسي عليك وانت تقوله: اتفضااااال
بس تصدق كان حمام ونس ومسلي وكنا بنعرف نتفرج على التليفزيون الاربعتاشر بوصة واحنا بنعزف احلى السمفوكيات
فاكرين نورا في فيلم جري الوحوش.. لما كانت بتقول: قطعت ياختي كُتر الاوض كنا ملمومين في اوضة واحدة دلوقت كل واحد مننا في اوضة ومبنكلمش بعض

فعلا عندها حق
*******

القصد يا اعزائي اننا بدانا حياتنا ببساطة شديدة كأي اتنين خريجين جداد معندهمش امكانيات.. لأ.. كان عندنا اشتراك ابونية في مترو الانفاق وكنت اركب انا عربية الستات وهو العربية اللي قبلي ونقعد نبص لبعض من الشباك اللي بين العربيتين قال يعني الشوق مقطع بعضه بقى لحد ما نوصل
و كانت كل فسحنا تمشية ولا نجرؤ نفكر نتعشى ولا نتغدى بره.. طبعا ماهي عشوة برة يعني غذا عيش حاف خمس ست ايام أو نروح بقى نتسحتج عند حماتي أو عند امي علشان نتغدى ونتحجج انهم وحشونا واننا منقدرش نغيب عنهم وانت القلب الكبير وحاجات من دي
فاكر يا طهقان لما عييت مرة ومكنش معانا فلوس نروح لدكتور واضطرينا نبيع انسيالي الدهب علشان نشتري مضاد حيوي... لا استنى انا مش بسيّحلك واللهي.. انا بس بافتكر احلى ايام كنا بنميّل فيها على بعض في أزمتنا.. وصدقني مفيش حد في الدنيا مامرش بفترات جفاف وامساك زي دي
*******
طيب فاكر عم فرج بتاع الادوات الكهربائية اللي كنا بنشتري منه الحاجات بالقسط؟ كان راجل طيب.. انا فاكره مرة اشترينا منه مضرب بيض تمنة حاجة واربعين جنيه وكنا بندفع قسط 13 جنيه كل شهر.. الغريبة اننا مستخدمناش مضرب البيض الا مرة او مرتين بس كان عندنا رغبة اننا نشتري كل كماليات البيت، وكنا بنفرح جدا لما نجيب حاجة جديدة زي السجادة اللي اشتريناها من اوكازيون النساجون الشرقيون.. فاكر؟
ولا الستارة البلاك اوت اللي جبناها من وكالة البلح بعد طول صبر ونوم في عز الشمس.. ما هو اصل لما هدينا البلاكونة عملنا شباك الوميتال وحطينا عليه ستارة عادية ماكنتش بتحجب ضوء الشمس
فاكر ياطوطو لما انا دخلت اوضة النوم وقفلت الباب ومعرفتش افتح الاوكرة الا لما رجعت انت من الشغل وفتحتلي من برة!! قعدنا وقتها نعيط ونضحك.. قال يعني اخدت افراج من الحبس الاحتياطي وانت جبت ابو الغيط وجيت تستقبلني
و لا لما كانت الكهربا تقطع كانت المية كمان تقطع وكنا بنعيش العصر الحجري في القرن العشرين فاكر لما كنت تقولي: كوزيه مواه سيلفوبليه.. علشان اجيب لك كوز المية تتوضى.. ههههههه
و لما جاتلك الوظيفة اللي في الشركة الاستثمارية واشترينا شقة جديدة وجينا نعزل.. كنا بنودع الشقة بالدموع لانها رغم ايامنا الصعبة فيها الا انها كانت اجمل ايام
*******
في عيد جوازنا يا طهقونتي بقولك الحب الحقيقي مواقف وتشابك مش كلام
باهديك احلى هدية ممكن حبيبة تهديها لحبيبها
http://t.farok.6.googlepages.com/T456.jpg
تعبيرا عن مدى الدفا والود اللي بينا
ربنا يخليك ليا وتفضل طهقان على طول
*******
إمضـاء: طهقـانـة

منقووووووول

شكرا كتير سارة على موضوع
حلو كتير

ميرسى يا ساره على التوبيك الجامد
تسلم ايدك يا قمر:-*

فعلا ذكريات جميله رغم صعوبة العيش ولكن تبقى ذكريات جمعت طهقان وطهقانة بحب ودفئ
واللي بيصبر اكيد بتتغير بيوم حياته للافضل
تسلمى سارة
حقيقي استمتعت وانا بقرأ ذكرياتهم الطريفه بالشقه القديمة والقطار والاكل عند اهلهم
كلها مواقف طريفه وحلوة
شكرا كتير سارة

ميرسى لمروركم نورتو الموضوع

الله انا عرفت مين طهقانه اسيح ولا اسكت احسن؟؟؟؟؟؟؟؟؟؟؟؟؟؟

عموما انا هسكت لمنع الاحراج تسلم ايدك يا سرسورتي

ملحوظه:- ((ياريت لما تقري الرد دا ملاقيكيش جايباني من قفايه في نص الشارع))

وأنا كمان عارف مين طهقان وطهقانه دول ....
لا واللي اكتر من كده أنا عارف الموضوع ده أصله جاى منين ....

يلا ربنا أمر بالستر .....وخلونا ناكل عيش في المنتدي

إيه دة
فيه ناس عارفة مين طهقان وطهقانة
طب ياريت يايونج تقوليلى مين هما دول
:D
بس بصراحة موضوع جميل وانا عجبنى فيه الإفيه دة

اقتباس:

---

كوزيه مواه سيلفوبليه

---

تسلم ايديك ياسارة
=D>=D>

=D>موضوع جميل مشكوره عليه بجد عسل طهقان وطهقانه=D>=D>=D>

اقتباس:

---

المشاركة الأصلية كتبت بواسطة Hooba

وأنا كمان عارف مين طهقان وطهقانه دول ....

لا واللي اكتر من كده أنا عارف الموضوع ده أصله جاى منين ....

يلا ربنا أمر بالستر .....وخلونا ناكل عيش في المنتدي

---

ليه ياهوبا كده محنا كنا كويسين ربنا أمر بالستر

ميرسى لمرورك ياجميل

اقتباس:

---

المشاركة الأصلية كتبت بواسطة YOUNG DEVIL

الله انا عرفت مين طهقانه اسيح ولا اسكت احسن؟؟؟؟؟؟؟؟؟؟؟؟؟؟

عموما انا هسكت لمنع الاحراج تسلم ايدك يا سرسورتي

ملحوظه:- ((ياريت لما تقري الرد دا ملاقيكيش جايباني من قفايه في نص الشارع))

---

ماشى ياشيطانة لما اشوفك وبلاش نسيح لبعض
ميرسى لمرورك ياشيطانة

جااااااااااااامده اووووى ..

بجد جامده اوووى


كمليها بقى

اقتباس:

---

المشاركة الأصلية كتبت بواسطة ورقه

جااااااااااااامده اووووى ..

بجد جامده اوووى

كمليها بقى

---

بجد نورتى الموضوع ياجميل ميرسى لمرورك

موضوع جميل طهقان وطهقانه بس نفسى اعرف دول من اى دوله على العموم تسلم اديكى يا سارة=D>=D>=D>=D>=D>=D>

اقتباس:

---

المشاركة الأصلية كتبت بواسطة gf.gp

موضوع جميل طهقان وطهقانه بس نفسى اعرف دول من اى دوله على العموم تسلم اديكى يا سارة=D>=D>=D>=D>=D>=D>

---

من مصر ياجميل ميرسى لمرورك

مشكوووووووووووره ساره على الموضوع الجااااااااااامد فحت ده

مشكووووووووورة سارو علي التوبك الجامد

تسلم ايديك

يا جماعه انا مش هقولكم مين طهقان وطهقانه بس هقولكم حاجه حلوه( لا مش بسبوسه لا دي حاجه تاني) هوريلكم طهقان وطهقانه عملو ايه بعد الجواز بس خبوني من ساره ماشي؟

خليكو شاهدين يا ناس على سي طهقاااااااااان


يوم الخميس اتفقنا نخرج نفسح الاولاد في الميريلاند بعد المغرب وهو اتغدى و نام شوية

و صحي قبل المغرب لا بيه و لا عليه وشه مقلوب و حواجبه تمنيات(^^)عملت له الشاي و لبست الاولاد و لبست

و هو قاعد في الريسبشن مطفي النور و عايش في فيلم الشموع السوداء و فاضل يجيبلي( روي)0




أنا: مش يلا تلبس يا طوطو

هو:ايوة(بسئالة)0

أنا: طيب يلا علشان نروح بدري(بدلال)0

هو:مستعجلة على اية هو الميريلاند حيدوّر و يطلع(بغتاتة)0

أنا:لا بس علشان الاولاد متعودين يناموا بدري و ساعتين و حيقفّلوا ،يلا قوم بقى(بدلع)0





اما اشوف اخرتها معاك يا سي يوسف وهبي القرن الواحد و عشرين(في سري طبعا)0

قام دخل الحمام نص ساعة قلت يا بت و ماله تلاقيه بيحلق دقنه و طلع من الحمام دخل يلبس نص ساعه تانية

،في الوقت ده الولد الصغير كان اكل كريم كراميل و بهدل هدومه و دخلت اغيرله

نسيت اقولكم الشغالة اجازة خميس و جمعة و انا باخد لقب اوشين لحد ما ترجع

و لما استغيبته دخلت لقيته لابس اقدم بنطلون جينز عنده و تيشرت كانت عنده من سنتين و بيلبسها لما يروح يغير زيت العربية او يشحم





قلتله :خير مكجول ليه؟

قالي :عادي

قلتله: ليه ملبستش حاجة شيك؟

قالي :العيال حيبهدلوني انسب حاجة لهم الجينز

طيب انا ذنب مامتي اية؟ تخرج معايا كده و بعدين محلقتش ليه؟

قال: بريح دقني في الويك اند

قلت : يعني طول الاسبوع تحلق الصبح و انت رايح تقابل المهندس فخري و الاستاذ لمعي

و يوم ما تيجي تخرج مع مراتك تنزل بعبلك ده انت فاضل تعلق فوطة صفرا





دي كانت استفتاحية الخناقة اللي انتهت بفصل القوات و لم بطانيته و مخدته و راح نام في المغضبة اقصد في اوضة الصالون





نصيحة::: لكل حديثي الزواج يجيبوا كنبة الصالون مريحة علشان في الغالب حيناموا عليها كل ويك اند





و هكذااااا يا اساتذاااااا


اكتبوا عندكم القاعدة الفيزيائية دي




مودي كويس =مودك طهقان

مودي طهقان= مودك كويس

مودي+مودك=ليلة كحلي




ليه كده ؟باستمرار لما انا اكون مفرفشة و فاني و عايزة اضحك و اهزر الاقيك انت معكنن و ملكش مزاج و منزل ودانك لتحت

و لما تنكد عليا و توصلني لمود الطهق تبتدي انت تفرفش و تروق و كانه واجب

قومي بتحاول تؤديه باستماته كل مرة

و الغريبة انك بتستغرب قوي و تقول: الست دي منكده ليه؟

ما هو انت لو تراجع تصرفاتك الخمس ست ايام اللي فاتوا حتعرف انا اية وصلني للهم ده

و على فكرة الست مننا لما بتدخل في مود نكد بيبقى صعب تطلع منه بنكتة بايخة و كانك بتغير محطة التليفزيون بالريموت

كده تسليك كده توليع

كده تنكيد كده تهريج

لا لا و الف لا دي حاجة تطهق;;)

وفي حاجه كمان حصلت انا فتانه بقي وهقولكم اهو اتفرجو اتفرجو ولو ساره جت ابقو شيلوني تحت اي صفحه في الموضوع دا وخلاص خبوني المهم يعني



من فترة طويلة ، انتهزت جلسة صفا بيني وبين طهقانة ، وقعدنا نتناقش في شوية أمور ، وتطرقنا إلى مسألة جواز المسيار والجواز العرفي والجواز فريند ، والتعدد ، وبعد فترة تمهيد ليست بالقصيرة دخلت في الموضوع مباشرة:


أنا : أنت طبعا عارفة أن الشرع بيسمح للراجل بالتعدد ودي لحكمة من عند الله سبحانه ، لمحاربة العنوسة وتشرد اليتامى والمنكسرين واشياء كتيرة
طهقانة : طبعا ، وماحدش يقدر يعترض على تشريع ربنا .
: أكيد ، وزي ما الشرع بيبيح لك اني بعد ما اموت لك الحق تتجوزي واحد تاني، مع اني كنفس بشرية مش قادر أستوعب الفكرة دي أو أقبلها ، انما ..ضروري أطوع اهوائي الشخصية لشرع الله واقبل الفكرة واسلم بها .
: قصدك أيه ؟؟
: يعني انا عارف انها مش سهلة عليك اني اتجوز تاني...بسبب الغيرة الفطرية عند المراة، بس لازم تقبلي بشرع الله .....يعني ...بصراحة .... أنا عايز اتجوز .
: بقا اللف والدوران دا كلوا علشان تقولي انك عايز تتجوز...طيب ما كنت تقول كدا من الأول..انا في ديك الساعة لما تطلب مني انك تتجوز ..



: هـــا ه !!!!

شوف بقا . انا ماعنديش اي مانع ، هو في حد يقدر يعارض في شرع ربنا ، طالما انك هاتقدر تعدل بيننا ..زي ما ربنا بيقول يبقا ليه لأ.

: طهقانة ..اسمحي لي اعتذرلك ، انا ما كنتش عارف انك قلبك كبير قوي كدا ، ومخك كمان كبير .وانت عارفة طبعا أن مش شرط يعني الزواج من تانية أن يكون هناك عيب في الاولانية ... بالعكس.. انت الاصل ، وعلى العين والراس.... وربنا يقدرني واعدل بينكم.

· انا عارفة انك قدها وقدود يا عمري ... وجوازك هايكون على ايدي انا ..انا اللي هأختار لك ...
· نعاااام ؟ قصدي يعني ...تختاري لي دا ايه .... !! ما تتعبيش نفسك ..أنا هأعرف أختار لنفسي .لازمته ايه ادوخك معايا
· لا يمكن .. مش انت عايز تتجوز علشان تطبق حكمة ربنا في التعدد ..يبقا ماحدش هايجوزك غيري... على الاقل علشان أشاركك الثواب
.................................................. ....

وبعد ردح من الزمن عادت طهقانة وفتحت الموضوع من جديد ...



: طوطو يا حبيبي..انا عندي ليك مفاجأة حلوة... انا خلاص أخترت لك عروسة ..إنما أيه...! بنت منكسرة وغلبانة ، وتتحط على الجرح يبرد.... ومن قرايبنا... اللي في البلد ... الصعيد .. أبوها مات وسابها لوحدها... ودي أنسب واحدة علشان تحارب بيها العنوسة والتشرد الأطفالي. ..ايه رأيك في هنية ...
: هنية مين ....! بنت عم عبد القادر الله يرحمه .! (المفاجأة ألجمت لساني)
: هي بعينها... يعني البنت في بالك اهيه !! أخ منك أنت أخ ، والمفأجأة بقا أنها جاية بكرة من البلد ...
انا عزمتها عندنا كام يوم علشان تتعرفوا على بعض عن قرب ، ونفاتحها في الموضوع .

· ومالك مستعجلة على ايه ... !
· خير البر عاجله...

................................

:إزيك يا هنية ... البقاء لله ، في وفاة الوالد.
: الله يسلمك يا طهجان بيه ، مانجلكمش في حاجة وحشة ، جدر ومكتوب يا بيه ، ابويا عبد الجادر كان زينة الرجال ، ما عيتخيرش عنيك واصل .

: شوفي يا هنية ، انت زي أختي وأنا مش هألاقي أحسن منك لجوزي..علشان أجوزهولك واطمن عليك معاه وعليه معاكي
: كلام أيه دا اللي عاتجوليه يا إست هانم ! أنا ماجدرش أتجوز جوزك، يا سنة سوخة يا ولاد ..وانت بنفسك اللي عاتجولي إكده يا إست طهجانة !!!



: اسمعي اللي بأقولك عليه يا بنتي..دا شرع ربنا..!
: جادر على كل شيء....حدانا في البلد كانوا بيجولو لي إني موسعدة ورزجي واسع ، وعلى كلن في الاخير. .الجرار جراركم .
:جلت إيه يا طهـ...قصدي ..قلت أيه يا طهقان !؟
:أنا أجدر أجول....حاجة بعد كلمتك يا روحي....خلاص الخيرة فيما اختاره الله .
طهقانة: الفرح الخميس الجاي..
هنية: لووووووولي

............................................




جهزت طهقانة العشاء بالكامل، وعملت العصير ، وقدمته لنا وأخلت لنا الجو ،

فيها الخير والله ..بنت حلال...(ناس طيبين قوووووي) ماكنتش عارف ان عقلها كبير للدرجة دي...
وبدأت مرحلة جديدة من حياتي..... تبدأ مباشرة بعد العشاء الفخم ، والعصير الطازج، وبعض الجمل الترحيبية الروتينية ، وبعض المقدمات التي لابد منها ،

* باقولك ايه يا هنية ،
* جول يا سيد الرجالة ، انا ملك إيديك ..!
* عايزك كده ترفعي التكليف وتاخدي راحتك على الاخر. .. ! انت هنا ست البيت .

وأطفأت النور
.....................

أشعلت النور
: الله.... هو اللي بنعمله في الناس هايطلع علينا والا ايه ؟؟؟؟
الواحد الظاهر أعصابه تعبانة شوية من السهر والفرح والدوشة

هنية: معلهش يا وِلد عمي .. تلاجيك تجلت في العشا ، استهدى بالله وكل شئ هاينصلح حاله.



:خلاص يا هنية ... الظاهر مافيش فايدة (عملتها طهقانة بالعشا المفخخ بتاعها ، والله أعلم حطت فيه أيه)



......................

يأتيني صوت طهقانة من خارج الغرفة ..

يا حبيبي...العبرة في الصلابة ...!

وزي ما ربيتك انت واخواتك ، لازم تبقى صلب على موقفك ، وتستمر ، طالما اتخذت قرار لازم تصمد وتصمم عليه ،
هانتكلم في الموضوع دا بعدين ، روح دلوقت صحي أبوك أحسن زودها النهاردة في النوم ، وهايتأخر على الشغل .
والا خليك ..هأصحيه أنا..

قوووم يا طهقان...
: صباح الخير يا حياتي...
خير اللهم اجعله خير.....تصدقي يا طهقانة أني حلمت اني بأتجوز... !
* نعم يأخوووويا ...... نهارك مش فايت ، تتـ إيه ...تتجوز.....تتجوز عليا ... يا نهارك الاسود يا طهقاااانة

جميلة ياشيطانة لو تقدرى تكمليها كملى بجد تسلم ايديكى وعلشان هى حلوة انا مش هتكلم معاكى على طهقانة ديه خالص الى طلعتى سرها برة ديه مستنيه منك الباقى