عشان انت مصري لازم تعاني هيعجبكم
أنت مصري لازم تعاني
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الأغانى
بتاع الحضارة وكانى ومانى
ده كله هجايص مايدخل ودانى
عشان أنت مصري العذاب بيناديك
بتبدأ فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونة فى إيديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصلة
ادى المترو واقف وكهربته فاصلة
وفى الميكروباص خناقة وحاصلة
اوتوبيس فرامله عايزالها وصلة
وتوك توك ده تايه ومحتاج لبوصلة
بتوصل لشغلك بدم إتحرق
فى زحمه وكتمه وحر وعرق
رئيسك سايبلك كومة ورق
ده غير دمغة ضايعة وملف إتسرق
وفى كام مواطن عاملك قلق
بيشكى تقول له روح إندعق
وعركة وهوجة وشاى إندلق
ومخك خلاص من الصداع إتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص إستويت
عيالك بتطلب وهات كيت وكيت
تزعق تهاتى ياناس إتهريت
ولا حد سامعك مهما هاتيت
عشان أنت مصري وده للأسف
فلازم تأسى تعيش تتقرف
وكل الأساسى فى حياتك ترف
فتنسى الكرامة وتنسى الشرف
وتسرق وتنصب أو تنحرف
ودمعك بيجرى وجرحك نزف
مش إنت اللى مصري؟؟؟جتك الــــــ !!!!
هذه الكلمات للشاعر الرائع أحمدفؤاد نجم
وهى بالطبع تعبير واقعى لما يعيشه معظم الشعب المصري المغلوب على أمره
وحسبنا الله ونعم الوكيل
تحياتي فاطيما
