التعصــب ضد التعصــب
سؤال سريع قبل بداية الموضوع، إيه هو التعصـب؟!!
التعصب حضرتك: لما تكون مقتنع مليون في المية إن رأيك هوا الصح، و عن رأي الناس التانية ولا حاجة. لأ و برضه ما يبقاش عندك استعداد تسمع الرأي الآخر، و ممكن يكون في الرأي ده جزء من الصح علي الأقل.
طيب السؤال الأهم: هوا التعصب ده طبيعي بتاع الإنسان ولا مكتسب؟
بعد الفحص و التمحيص، اكتشفنا إن التعصب حالة طبيعية عند الإنسان. فتلقي الإنسان بيطلع متعصب بالفطرة لأهله، متخيل إن هم الصح المطلق في الدنيا بكل أفكارهم و معتقداتهم، و لما يكبر شوية تلاقيه متعصب لتفكيره و متخيل إن هو بس اللي بيفهم. و يكبر كمان يبقي عنده تعصب لبلده (حتي لو بيحصل فيها بلاوي) خلي بالكوا من التعصب و الانتماء.
طب سؤال كمان مهم: إيه أنواع التعصب؟
يوووووووه كتييييير أوي، ركز معايا بقي
أولا التعصب الديني
و ده يعتبر من أسوأ الأنواع لأنه أكتر سبب لحدوث الفتن. و ده بيكون لما نلاقي الشخص (أو النظام) اللي قدامنا مش قابل لفكرة معارضة للدين، يعني مثلا طالب أزهري عنده اعتراضات علي شويه حاجات في الدين، ليه الأزهر ميكتفيش إنه يحرمه من شرف الانتساب للجامعة بس؟ إيه الفكرة إن الموضوع يتطور لأمن الدولة؟ يعني بدل ما يبقي فيه مناقشة و حوار، يبقي فيه قمع لأ فكر مضاد.
الغريب فعلا لان لو رجعنا بالزمن لورا لأيام الدولة العباسية مثلا، حنلاقي إنه كان بيحصل مناظرات كتير من المسلمين و أصحاب الديانات الأخرى، و الأغرب بقي لما تلاقي إن الناس دي كانت بتشترط علي المسلمين عدم استشهادهم بالقاآن أو السنة (لأنهم أصلا مش معترفين بيهم) و الاكتفاء بقيام المناظرة علي المنطق و مع ذلك كانوا بيوافقوا.!!!!
التعصب التاني
دا بقي أكتر واحد منتشر في بلادنا، طبعا أكيد هوا التعصب الكروي .. يا عيني علي الناس الحلوة دي و الله .. تلاقي الواحد منهم فاكر إن فريقه دا جامد و بقية الأندية دي أعداء مثلا .. ناسيين إن إحنا يعتبر معنداش كورة أصلا، و أنا من النقطة دي أحب إني احيي السلطة اللي استطاعت إنها تلهينا عن هموم البلد بالهموم الكروية العظيمة.
و طبعا عندك التعصب القومي، و عندك التعصب الطبقي، و أكيد التعصب الفكري، و عندك، و عندك ...... يا راجل لدرجة إننا وصلنا لدرجة التعصب في المواصلات.!!!
برضه سؤال مهم: هو التعصب ده حاجة وحشة؟ و ليه؟
طبعا التعصب حاجة وحشة، و قلتلي ليه بقي .. عشان التعصب ده بيخلي الإنسان يبقي منغلق علي نفسه، و معندوش أي تقبل لفكرة الاختلاف، و بالتالي مش هيقبل أي حد مختلف عنه، و بما إن إحنا مختلفين فبالتالي ده حيعمل حدوث فتن و صراعات، لأن كل واحد بيحاول يثبت إن تفكيره و رأيه هو الصح ....!!
المهم بعد ما خلصت الموضوع اكتشفت
( إثباتا لأن الحالة الطبيعية للإنسان هو التعصب )
.
.
.
و أنا كمان متعصب ... متعصب ضد التعصب
