ملخص المناظره بين اكرام واميره
السلام عليكم
طبعا اغلبكم عارف ان كان فى مناظره بين اكرام واميره عن مكر الستات
فى الركن الادبى
وبم انى معرفتش اسكتله
كان لازم ارد عليه
بنفس الطريقه
عن طريق الخواطر
المناظره الشعريه اهى:
دى قصيده للشاعر محمد مجاور نشرها ابنه الزميل اكرام مجاور
قصيده عن مكر النساء
يلي بلغت الشباب ونويت تحب حريم
اسألني عنهم دا أنا بيهم خبير وعليم
الآية قالت عليهم كيدهن عظيم
معناها صنف النسا خاين ملوهش أمان
الواحدة منهم تحبك تبقى تجرى وراك
وان كان سكنها الهرم في القلعة تستناك
وتقول بحبك بشده وقلبي داب في هواك
وكل يوم تشتكى م البعد والحرمان
إن غبت عنها يومين خد منها ميت تليفون
يظهر إن غرامها ليك غرام بجنون
وأحسن حكاية حداها قصة المأذون
وازاى نجيب الدبل ونفصّل الفستان
تفضل تقولك بحبك حب من قلبي
مقدرش أقولك عيزالك تكون جنبي
لو بس حبك يوازى العُشر من حبي
ماتنامش ليلك وتشوف العذاب ألوان
جوزين كلام من كلامها يدهنوا البلاص
وتقول دي دابت في حب وانتهينا خلاص
قلبك يميل بالقوى وتحبها بإخلاص
وتلاقى نفسك في دوامه وبحر ملان
عرفت بمكر ودهى ترميلك السنار
شبكت به قلبك وقادت فيه حرقه نار
وتشوفك انك بقيت مطوي مع التيار
تنسى اللي قالته وتتلوى ولا التعبان
تبدأ تسوق في الدلال والتقل صنعتهم
تمنع تقابلك و دي أفكار بتاعتهم
دي الجنة شوف وسعها ملّت مساحتهم
ازاى هتقدر عليهم انت ياغلبان
تطلبها عشان تقابلك لأ منيش فاضيه
عارفه إن سكينها صبحت ع البعيد ماضيه
فاهمه إن عدم المقابلة ضربه ليه قاضيه
بتخلي عقلك يطير وتشعلل النيران
وبعد اسبوع تقابلك ربع ساعة وبس
وتقولك وحق الغلاوه جايه دس ف دس
لو كان أخويا لمحنى ولا بيا حس
كان لمّ عيلتى عليا واتفرجوا السكان
يثبت كلامها إن البنت من عيله
ومش هتقدر تقابلك بعد دي الليلة
فضلت وراك بالمكر والخداع والحيلة
لما وقعت ف غرامها واللي كان اهو كان
وتقول دا واحد مدير شركه جاى يطلبنى
ورفضته عشانك انت وربى يحاسبني
عجّل بسرعة وتعالى لبابا واخطبنى
علشان نلم الشمل والعيشة تبقى أمان
تضطر تاخد لأبوها ناس وتتورط
وهو يقعد على الكنبة ويتشرط
ويدوس عليك بالقوى يشد ويربط
دول جوم لبنتي خمستاشر من الأعيان
الشبكة تيجى وتتدبر في باقي المهر
بعديها كتب الكتاب والدخلة نفس الشهر
وخلاص بقيت في العسل وتقول صفالى الدهر
وبعد شهر العسل كل المخبى يبان
من بعد شهر العسل يتغير الأسلوب
وتلاقى نفسك في دربكة وحال مقلوب
وان يوم لسانك غلط اهو هو دا المطلوب
تعلن لك خناقه وتبرز لك بألف لسان
تقوم م النوم لشغلك والمدام نايمه
وان قلت قومي تقول لأ منيش قايمه
عايزه تخانق وبايته للخناق هايمه
وانت تخاف م الفضيحة ولمه الجيران
تتحمل كلامها وتقول الصعب بيهون
عشان أنا لسه طالع م الجواز مديون
لحسن تزيد الحكاية وصنفهم مجنون
تاخد حاجاتها وتترك لي المكان خربان
تبقى انت ف الشغل والهانم تتفسح
عارفه ميعادك تشبع لف وتروّح
تسيب سريرها وفوق الأرض تتلقح
وتروح تقول دا جسمي م الشقا همدان
في أول الشهر تاخد منك المصروف
وتلف شيكوريل شملا مع معروف
جميع محلات فؤاد سليمان شريف بتطوف
مايهمهاش إن فوق راسك متين ديان
ترجع م الشغل تلقى البهجة محطوطة
فستان وجزمه وقميص للنوم وكام فوطه
ودا جوز شراب ليك ولكن في الحقيقة جنان
وان قلت ليه كل دا ماكانش ليه لزمه
وانتى عارفه إننا طالعين من ازمه
تثور في وشك وتضرب روحها كام جزمه
وتقعد تعيّط وتنعى بختها الندمان
رديت أنا عليه ودافعت عن الحريم وعبرت عن وجهه نظري
وقلت:
يلى انت بتحذرنا من صنف الحريم
معاك أنا إن كيدهن عظيم
لكن قولي بقى هم النسا خاينين؟
يعنى الرجاله كده أبرياء مساكين؟
طيب وإيه رأيك في المثل اللي قال
آل إيه يامئامنه يختى للرجال
مين قال كل واحده تحبك من الستات
تجرى وراك؟ ماياما جريتوا بالكيلوات
وقولتوا تعبنا والله وبقالنا زمان
مقضيينها معاكسه ومحايلات
ولما تعبتوا وجربتوا كل الحيل
زهقتوا وسألتوا ياناس إيه العمل؟
يلى انت جاى بتشتكى وتقول ظالمين
ارجع بتفكيرك كده سنين وسنين
وشوف حفيت لحد ماتنول الرضى
وكان عقلك فين؟؟
دلوقتى راجع تشتكى وتبص وراك
وتقول ياريت اللي حصل كله ماكان
وتقول ياريت يرجع بقى بيا الزمان
قولي بقى وسؤال مريح
والرد منك يبقى صريح
لو يرجع دلوقتى بيك الزمن
هتتجوز ولا تعيش حر
ياعم عشان تدوق الحلو
لازم وربى تدوق المُر
ما قولتليش........
هتغير رأيك ولا مُصِر؟
اكرام قال:
يا أميرة أعلنت التحدي
وإياك في يوم تكوني ضدي
وإن يوم رماكي الزمن قدامي
ح تكوني عبرة والسنين بتعدي
الست ست وهي لابسه قصير
والشعر لونه ازرق وما بيتغير
والكحل زى الطين وفاكره عامل منظر
مافيش وشوش والشكل كله يحير
البنت ديما تلاقيكلقوامهم عال
لكن وشوشهم عماير هدها الزلزال
لا ريحة ولا منظر ولا حتى جمال
فكرين جمالهم نجوم ولا حلاهم طال
أميره قالت:
أعلنت انت التحدي
وأنا للتحدي قابله
صدقني ماانتش قدي
لما ابتدى التحدي
متقولش عليا هبله
لانى هاخد وادّى
وهخرج يابنى رابحه
كتير من المقابلة
كل البنات بتقصّر
طيب وليه تتأثر
ولو انت ماشى دوغرى
بتقف ليه وتهدّى
وراجع تانى عندي
تقول بعلن تحدى
لما الموضوع مش هيّن
بتبص ليه لواحدة
حاطه الكحل المطيّن
والوش بهلوان
واللبس حرام كمان
مش قلنا غض بصرك
وبلاش تِجارى عصرك
واختار البنت صح
مش تمشى مع الزمان
في الوقت وفى المكان
طب اسمع يلا ردى
يابنى بلاش تحتار
وبايدك الاختيار
قدامك لو تدوّر
من البنات ألوان
اختار اللي تناسبك
تبقى أصلك ونسبك
هدعيلك بالهداية
وتحلّ عن سمايا
اكرام قال:
ياتحدى طفلة نونو
في الشعر باع صغير
أنا عقلي طار جنونو
والله شيء محير
يا ميرو كان بودي
نخلي الموقف يعدي
لكن حرام عليكي
صدقي مانتي قدي
أنا باع طويل وفارد
في الشعر قلبي قادر
يقلب حرفك عليكي
ويقول هجاء في حقك
الربح مش في شعري
ممكن يكون في غيرو
علشان عليكي بدري
الشعر اتقل خيرو
والله ماشي دوغري
والبنت بتعاكسني
أعمل إيه يا ربي
صنف الحريم فارسني
مش احل عن سماكي
مهما طال الزمان
ديما ح أكون وراكي
وقدامك كمان
انسحبي وقولي أسفه
وأنا اقبل بمرادي
لابعتلك واحده ناسفة
بعديها تقولي يا خرابي
أميره قالت:
مش هقبل الانسحاب
ولا هرضى أكون ضحية
أنا يابنى نويت أكمل
والفكرة هيا هيا
تقبل أهلا وسهلا
ترفض يبقى اختيارك
لو قادر يبقى تصبر
واهو القرار قرارك
أما البنات تعاكسك
وكلامهم يبقى فارسك
يبقى الصنف الرخيص
وبايدك تحمى نفسك
بص ياعم المفروس
ع الصنف ده تدوس
إنما في صنف تانى
لو هوصف مش هنخلص
أصلى بهدّى النفوس
بلاش بقى اشعللها
بقولك من أولها
ابعتلى الاستقالة
وأنا أوعدك هقبلها
اكرام قال:
لا هاقدم استقالة
ولا هاقبل انسحاب
دا أنا واد تقيل وجامد
وكرامتي في السحاب
بكرة تجيني دايخة
وتقولي اصلي بنت
أنا بنت لسه نونو
معقولة أبقى هنت
خلي قلبك حنين
وما تقسي ع البنات
دا أنا قلبي مش مبين
دا أنا بابكي ع اللي فات
أنا قلبي لسه اخضر
حرام عليك كفايا
ها أقدم استقالتي
وكل الحريم معايا
يا ميرو خلاص هاقبلها
أنا أصلي واد تقيل
وبلاش تعاندي جدو
أصل الكبير كبير
أميره قالت:
طيب اصبر ياشاطر
وقابلنى في الخواطر
ونشوف ساعتها مين
يقدر يسكّت مين
أنا بنت بس جدعه
مش بس كلام قهاوى
ولا حدوته ف حكاوي
ومادام ع الشر ناوى
يبقى نقول ابتدينا
يلا ياشاطر ورينا
ومادام بتقول شطّور
سمعنا قوام واشجينا
والحكم للجمهور
إيه رأيك تتحداني
واطلب منك حاجات
بس ما ترجعش تانى
تقولي انسي اللي فات
هبدأ وهقولك اكتب
عن أحلامك قصيده
والشاطر فينا يغلب
وتكون معانيه جديدة
والآخر نبقى نقعد
وندور ع الحصيده
المهم اتكلمنا عن كام موضوع كده بالشعر برضو
ولكن مازال التحدي مستمرا
أنا قلت اجمعهم لان كل حاجه فى مكان
ياريت اكون قدرت اخدلكم حقكم يابنات
