... ماليش فى السياسه ... !
بسم الله الرحمن الرحيم
السلام عليكم و رحمة الله و بركاته
شعر سياسى عجبنى جدا
حبيت أعرضه عليكم
الشعر بعنوان
... ماليش فى السياسه ... !
ماليش في السياسة ... مانيش بحبها
إزاي أحب حاجة .... مش جايبة همَّها
مش ناقصة حرق دم
مش طالبة هي هم
مش هي دي الأهم
فى الدنيا كُلها
وجع دماغ يا عم
طريق كئيب وغم
طريق فيه 100 لغم
ومافوهشي منتهي
هـ تقول أيمن جبان
طيب شكراً يا مان
مش أحسن م اللُّمان
والحبسة وذُللها
هـ تقول أيمن جبان
طب قول جبان كمان
مادام أنا في الأمان
مش هـ ازعل منَّها
أُنظر حولك وشوف
قايمات سودة وكشوف
والمعتقلين ... أُلوف
بتعاني فـ أسرها
آدي عين مليانة خوف
وآدي عِلَّة فـ كل جوف
وآدي جِتَّة ولونها موف
من ساعة جَلدها
أحزاب يمين ... يسـار
ماشيين فـ 100 مسار
عامليين مولد وزار
قال عايزة حقها
رافعين دايماً شعار
الحزب الوطني عار
طب والدعم المُعار
الـ مرمي فـ عِبَّها ..؟
كبَّر مُخَّك يا خال
أنا راضي أعيش شِوال
أو اعيش زي البغال
مش طالع حِسَّها
وان خدت أنا بالنعال
قشطة .. كويس .. وعال
أنا عندي كوم عيال
بـ اجري علي أكلها
ملحوظه إسم أيمن المذكور فى الشعر = اسم مؤلف القصيده
منقوووووووووول ( مما راق لى )
تعليقى
بالرغم ان عنوان الشعر ماليش ف السياسه
إلا إنه كله سياسه فى سياسه
و تسلم ايادى المبدع صاحب الشعر
