انا رايحه بيت ابويا مش رجعالك , الحله علوابور عشي عيالك
هركليز اليوم
http://photos1.blogger.com/x/blogger...1/hercules.jpg
ألف مبروك .. أخيرا وقفت المرأة المصرية موقف رائع و مشرف ...
وقفت فى وجه الرجل الطاغية المفترس .. فى شمم و إباء وعزة نفس .. قائلة :
الحلة عالوابور عشى عيالك .. أنا رايحه بيت أبويا مش راجعالك
هنيئا لك أختاه .. فقد كتبتى أول سطر فى وثيقة حريتك بحروف من ذهب
أيام زمان كان ميثاق الزواج الغير مكتوب : أغلِبِيه بالعيال .. يغلبك بالمال أما دلوقتى الكلام ده مش مظبوط :
الحقيقة ان الراجل هو اللى بيربط الست بالعيال – يبقى بعد الدخله لو اتأخرت الست فى الخلفة ست شهور مش طايقها و مش طايق الدنيا كلها – عايز بطنها تقب و لامؤاخذه - و ياخدها يتمشى معاها افرنجى على كوبرى عباس و كأنه هيكليز اللى بهيظ الفهايص (عباره يطلقها الشاب الروش افتخارا بنفسه ومعناها : انا اللى جعلت الجميع يغيب عن الوعى) و بعد الوضع و مجابهة الحياة الأسرية الجديدة و افتقار هيركليز الى حتة ناشفة فى البيت كله يستكنيص فيها يبدأ فى العط الخارجى هروبا من قلبة المخ .. تتخيل المسكينة انها : زينه و انها يجب أن تبدأ خطة انتقامية مضادة لجلب زوجها تارة أخرى للعشة و تستمع بمنتهى البلاهة لنصائح مامتها و خالاتها و تسرع بمخاوية الواد عشان مايطلعش وحيد و تكون بهذه الفعلة الشنعاء كمن يطفئ النار بالبنزين .
غالبا بقى العيل التالت بييجى نتيجة غلطة حسابات أو حمل عالشريط – دايما بيقولوا كده- و الحياة تبدأ تأتم (لفظ يعنى الغلاسه والرخامه واللون القاتم للحياة)
المهم ماطولش عليكوا – قولوا طوّلى – هيركليز يبتدى يعمل مقدمات ثم يبلغ فرار و يدور بقى على طموحاته الحياتيه المختلفة المناحى خارج الاطار الأسرى :
عايز يبتدى حياته العملية من أول و جديد بس عدم الأستقرار اللى فى البيت موتره
أو عايز يتعرف بأوكشة يفهمها و تفهمه لأن زينة خلاص اتهطلت من قلة النوم و العيال طيروا البرج اللى ناقص فى نافوخها-
ممكن كمان يحاول يجرب حياته برة البلد دى لأن البلد دى مابتقدرش الأفذاذ اللى زيه و يقدم على هجرة و ده طبعا يا كبدى كله شقا عشان العيال و أمهم اللى تحولوا الى مستهلكين و موارد الدولة كلها مش مكفياهم– باختصار ذرائع الحاج هيركيليز مابتخلصش و قدرته على اعطاء المبررات تبهرك – بل و تجعلك تطلع آخر اتنين جنيه شايلهم للمواصلات فى جيبك و تدسهم فى ايده عن رضا و اقتناع و انت عينيك تفيض بالدموع .
و يبدأ هيركليز فى الحلاقة للماضى (لفظ لا يعنى الذهاب الى الحلاق لقص الشعر ولكنه يفيد تجاهل الماضى بمفرداته و كأنه لا يستحق)
أما العيال فى هذه المرحلة فلن يمثلوا عبئا أو حجر عثرة فى طريق انطلاقاته : فهو ممكن يسافر و يبعتلهم كل شهر اللى فيه القسمة و هو مطمئن تمام الأطمئنان ان زينة شايلاهم فى عنيها بل وممتنة غاية الأمتنان للراجل الشقيان عشان خاطرهم – و هو فى الحقيقة يبدأ حياته من أول و جديد على ميه بيضا ( لفظ قهاوى يفيد ان الشاى معمول أمام عينيك منذ أول مراحله-على نضافة) كأى شاب بِكر سوبر فريش- و غالبا ماتدفعه الوحدة القاسية أو رغبته فى أخذ الجنسية الى قرار سياسى .. ياحرام بياخده و هو مضطر: انه لازم يتجوز – هيعمل ايه؟ مرغم ياحبة عين أمه.
ابّان هذه الحقبة تصل زينة الى أقصى درجات التعب النفسى و ينتابها شعور حاد بأن الحياة فى الأمبلايز (مصطلح بمعنى أن الموضوع الذى سعت من أجله لم يتم ، او تعبت علي الفاضى ، وتقال " الحياة في الامبلايز " اى ان الحياة خربانة وفاشلة) لا عارفة ترمى الحمل على حد و لو طلبت الطلاق مين اللى هيتجوزها و يشيل هم ولادها ؟ حتى الخروجة أو المصيف بيتحولوا لمسلسل شقاء و شيل و حط .. تعمل ايه زينة الحزينة .. تروح فين و تيجى منين؟
الحل هو : الحلة عالوابور عشى عيالك – لازم يرجع يشيل مسئولية عياله – و ان مارجعش روحوا له – فهيركليز يشعر ان مسئولياته تجاه أولاده تنحصر فى شيئين : أولهما : المساعدة المهولة فى تكوين الجنين فى بطن الأم – و الله يشكر و كتر خيره و الثانية : مبلغ مساعدة شهرى يمثل جزء يسير من دخله أما باقى مفردات التربية فهى مسئولية زينة الحزينة – يا زينة كفاياكى تضحية و فوقى – بيت أبوكى يساعك أما أنت ياهيركليز فياريت تغسل المواعين بعد ماتعشى العيال
.
رد: انا رايحه بيت ابويا مش رجعالك , الحله علوابور عشي عيالك
معلش يا ساره الكلام دهـ غلط ..
لان انا كنت اسمع مشاكل زى كدهـ فكانت الناس الكبيره ترد وتقول ايه لزينه ..
الناس الكبيره اللى هى امها وابوها العاقلين اللى وخدين خبره من الدنيا ..
كانوا بيقولولها يا بنتى الوليه ملهاش الا بيت جوزها ..
والست اللى بقيا علي نفسها وعلى جوزها تقف جمبوا .. بس متكونش الحياه بنهم امبلايز
لان غير كدهـ ما تبقاش حياه ..
ومش عارف اقولكـ ايه تانى ..
بس انا مختصر كلامى انى مش معاكى فى ان الحله على الوابور والعيال عندكـ ربيهم ..
لا لا خالص كمان ..
رد: انا رايحه بيت ابويا مش رجعالك , الحله علوابور عشي عيالك
اقتباس:
المشاركة الأصلية كتبت بواسطة عصام نت
معلش يا ساره الكلام دهـ غلط ..
لان انا كنت اسمع مشاكل زى كدهـ فكانت الناس الكبيره ترد وتقول ايه لزينه ..
الناس الكبيره اللى هى امها وابوها العاقلين اللى وخدين خبره من الدنيا ..
كانوا بيقولولها يا بنتى الوليه ملهاش الا بيت جوزها ..
والست اللى بقيا علي نفسها وعلى جوزها تقف جمبوا .. بس متكونش الحياه بنهم امبلايز
لان غير كدهـ ما تبقاش حياه ..
ومش عارف اقولكـ ايه تانى ..
بس انا مختصر كلامى انى مش معاكى فى ان الحله على الوابور والعيال عندكـ ربيهم ..
لا لا خالص كمان ..
انا اساسا يا عصوم دا مش رائي انا سمعت الاغنيه من واحده صحبتي والناس عماله تغنيها في الاخر لقيت ان دا وصف النهارده لحال الازواج وعدم الثقه زي ما تقول من زينه ان زوجها فعلا بيعمل الحاجات دي عشانها هيا وولادها
وكمان لو عايز اكمل الاغنيه انا ممكن اكملها دي حلوه اوي:)):)):)):)):))
رد: انا رايحه بيت ابويا مش رجعالك , الحله علوابور عشي عيالك
ايه يابنتى ده ربنا يهديكى الكلام الغريب ده بتاع السوقين والناس الى مش بتفهم وديه مش اغانى تتسمع اصلا ولا تتقايل او تاخدى منها النصايح
بلاش ياشيطانة الاغانى ديه تسمعيها او تعلقى عليها اصلا
رد: انا رايحه بيت ابويا مش رجعالك , الحله علوابور عشي عيالك
ههههههههههههههههههه
اسمعهالك يا ساره
انا نفسي اعرف هو لسه في بابور دلوقتي؟:))
رد: انا رايحه بيت ابويا مش رجعالك , الحله علوابور عشي عيالك
انا افتكرتكـ بتتكلمى بجد والله ..
ماشى يا ساره خليكى ورا السواقين ..
رد: انا رايحه بيت ابويا مش رجعالك , الحله علوابور عشي عيالك
والله انا كنت هتشل لما سمعتها والاكتر ان في فعلا ستات بقو بيعملو كدا طلما هو مش بيهتم باولاده مش بتفكر انه تعبان في شغله
المفروض يعقلو ومهما كان يفكرو في اولادهم ويفكرو في حياتهم مش تقوله مع السلامه عشان تفكيرها دا
فعلا ناقصات عقل بقي ههههههه
اول مره بقول ان فعلا الرجاله مظلومين والله
تسلم يا عصوم
بس الاغنيه حلوه ههههههه:-P
