مصر بتنادي قصيدة بقلم إكرام مجاور تهمني أراؤكم
هذه القصيدة رساله من الأم الغاليه مصر إلى إبنها المهاجر ردا مني على قصيدة الشاعر رضا محمود بعنوان رساله من الطير المهاجر إلى مصر أتمنى أن تنال إعجابكم
مصر بتنادي
صحيح واللهي يا ولدي
إن عدلي مال
وبعد الحب والعزوه
ما عاد لي مال
لا حب لقيته ف ولادي
وزمن عمَّال
بيحدف فيا بالجامد
وحملي مال
انا يا ابني حملي تقل
ومانيش في حمل احمال
لا عاد لي ضهر احتمل
ولا فيا شيئ حمَّال
ولا عاد لي فيهم جمل
يا ابني ولا جمَّال
ولا عاد في حبي هوى
م السلب والإهمال
*****
طب يا ابني لو بنساك
ليه انت ما تعديش
وتقول دي امي مريضه
ليه يا ابني ما تزورنيش
ولما اكون محتاجالك
ليه انت ما تديش
تجمع فلوسك ف يدّك
وتقول انا ما بيديش
زماننا فعلا وحِش
ياخد وما بيديش
ولما اقولك ارجع
تقولي ما بديش
وانا اللي عايزاك عفي
جاي وعامل درويش
*****
انا اللي عضمي كبر
محتاجه منكم شد
محتاجه ليك ضمني
محتاجه ليكو بجد
محتاجه ايدك عفيه
فيها يدوم الود
محتاجه قلب يحب
مافيش لزيه حد
محتاجه سيف بتار
له الف حد وحد
مش عايزه انبح صوتي
ولا القى فيكم حد
مش عايزه ييجي اليوم
القى ف عنيكو الصد
ولما ييجي اليوم
وإن كان وصل ولابد
سيبوني غرقانه
واديكو فوق الخد
انا ليه الوم فيكم
اخطائي فوق الحد
ومهما اعدلكوا
العد فوق العد
لكني برضه امك
فيا الأمل والغد
فيا الهوا ساكن
فيا الأجل يتمد
فيا الهوا ليكم
مالكوش ف قلبي ند
لما الإدين تبقى
ماليها بينا الود
هتلاقي جيل يبني
ومافيش قالب يتهد
