هزيان مجروح
الدمعة فى عيوننا
نزلة ومشروخة
والصورة مقلوبة
نعدلها بصعوبة
والتوهة مطلوبة
عن دنيا مغلوبة
نيأس ونستسلم
وبجراحنا نتألم
ولحزننا نسلم
ما الفرحة مهدودة
نصرخ ونتوجع
ولا حد يسمعنا
وفين مايوجعنا
يدونا بالطوبة
خوفنا بيبعدنا
عن أغلى حبايبنا
وعلى نفسنا صعبنا
ما هى حسبة محسوبة
ماشيين فى سكتنا
بنمد خطوتنا
أحلامنا سبقتنا
ونشوفها قدامنا
ونلاقى فى الاخر
السكة مسدودة
نسأل قوام روحنا
هو إحنا ليه بوحنا
لناس بتدبحنا
وما همها جراحنا
وقلوبها معطوبة
الدايرة محبوكة
والدمعة فى عيوننا
نزلة ومشروخة
والصورة مقلوبة
نعدلها بصعوبة
والتوهة مطلوبة
عن دنيا مغلوبة
