المولد النبوي بقلم والدي رحمه الله إكرام مجاور
هذه القصيدة لوالدي رحمه الله كتبها منذ أكثر من 40 عاما وأنا الآن أضعها بين أيديكم لعلها تكون رحمة له في قبره وأسألكم الدعاء له لأمواتنا وأموات المسلمين
المولد النبوي
الليله ليلة فرح مولد نبينا الزين
والبدر نورو اكتمل قبل الميعاد بيومين
زي النهارده وكان يومها نهار اتنين
هلت بشاير على الدنيا من الرحمن
****
في ساعة الفجر اتخلق الهدى والنور
ف الأرض فرحه وف السما هنا وسرور
الجنة رقصت ملايكتها وبنات الحور
غنت بفرحه جميله اعذب الألحان
****
في يوم ميلاد النبي كان للعرب نصره
كان العجم في هزيمه وخمسميت حسره
كان يومها يوم العجب لو شوفتو فيه كسرى
تاجه وقع ع التراب واتحطم الإيوان
****
النور سطع للسما لما اتولد في الأرض
والعشب خلّى الجبل خُضره بطول وبعرض
حتى الشجر والنخيل ميّل وأدى الفرض
وغرّد الطير بألحانه على الأغصان
****
الورد فتّح وزاد نوره على غصنه
والزرع سبّح لرب العرش من حسنه
واتكلم الوحش والريح اتعدل وزنه
والطرح عمّ الشجر مشمش مع رمان
****
يومها البنفسج ببهجه عانق النرجس
زهر القرنفل بقى من فرحته يرقص
مال الريحان على النبي في المهد والتنفس
والفل عانق من الفرحه غصون البان
****
الله أكبر لحسنك يا حبيب الله
الحب اللي اتخلق بين القلوب محلاه
السبع باس الغزال من فرحتو وهنّاه
حتى صغير السمك سلّم على الحيتان
****
لو كنت اعبر أكون عاجز عن التعبير
علشان مديح النبي عايز لوصف كبير
ياللي الإله ارسلك فينا شفيع ونذير
نظرة لعاشق جمالك يا نبي ولهان
****
يا رب بالمصطفى تسعد ليالينا
وتبدد الظلم وتحقق امانينا
وتكون نهاية الصهاينه ف مقبرة سينا
ونحطم الظلم ونعيش في سلام وأمان
قصيدة / محمد محمد مجاور
