الفرق بين التنحي والتخلي بقلم إكرام مجاور
ضحك علينا العنيد
وقال انا اتخليت
واحنا بعقولنا الجزم
وصلتلنا اتنحيت
لكن التخلي يعني
سبتك وانا رئيسك
أما التنحي يعني
ماليش لا جاه ولا صيت
****
فاكرينو بقى م الشعب
وف شعبها مواطن
لكنه لسة رئيس
بيديرها م الباطن
واحنا فرحنا أوي
والفرحة هزتنا
ولما فوقنا بكينا
على فكرنا العاطن
****
ضحك علينا وقال
والمر شاربينه
حط المرار ف العسل
واحنا ما حاسينو
نرتع ف مرعى الثورة
ونقول شراب النصر
وهو لسه راكبنا
والشله حاميينو
****
له حق يركب كتافنا
ويقول شيه يا حمار
مادام عملنا بهايم
وسابنا جوا الدار
واحنا شربنا وطفح
السم ف بدننا
لما بقى تحتنا
السبله بالأمتار
