:: صحيح القرد في عين أمه غزال ::
كل يوم بيمر عليا بتأكد من صحة المقولة الشعبية الأثيرة دي القرد في عين امه غزال
هو صحيح انا مش قرد اوي بس برده مش غزال ...اكتشفت ان ماما بالرغم اني عايشه
معاها 13 سنه لسه لحد دلوقتي مش عرافاني كويس و شيفاني غزال بالرغم من جميع حركاتي القرداتيه لإقناعها بغير كدا إلا انها مصممه..
حبيبتي يا مامتي دايما رافعة معنوياتي بس المره دي وسعت منها يلا بقى قلب الأم .
بعد حدث مش ظريف كدا حصلي مؤخرا تاني يوم الصبح من حصوله لقيت مامتي حبيبتي و صديقة عمري كاتبالي الكلام دا, كل الي قدرت اعمله اني اعيط , معقول يا ماما انتي شايفاني كدا !!! عارفه ان كل حد شايف و لاده احسن حد في الدنيا بس بجد انا بستمتع بالشعور دا اني عارفه ماما بتحبني قدايه و عارفه انا بمثل ايه في حياتي ... ربنا مايحرمنيش منك يا حبيبتي .
و برغم محاولاتي المستميته اني اخليها ترجع في كلامها اوانها تقول دا كلام مجامله لرفع روحي المعدنية المدمرة فقرقرت الاستسلام و قلت خلاص ماشيها يا بنتي غزال غزال ,, الصيت و لا الغنى برده *
من اليوم دا و انا قرقرت اني اعوض شحنة الحب و العواطف الي جوايا فيها ,هيا اولى برده
أصل سألت نفسي هو احنا ليه مش بنعبر للناس الي بنحبهم عن الجوانا بكلمة بحبك على طول زي ما بيحصل مع الخطيب او الزوج او الحبيب هي الناس دي برده مش ناس بنحبها و تحبنا و يمكن بتحبنا اكتر كمان و ليه دايما ما بنبذلش مجهود لتوضيح دا زي ما بيحصل في علاقات الحب التانية , هل عشان دي امور مسلم بيها و الأم معروف انها بتحب بنتها و العكس , و مش محتاجين نعمل الحاجات الصغيره دي عشان نقول بحبك بكل الطرق ؟؟
مش عارفه بس زمان كنت بحس انها تقيله قوي بالرغم اني كنت هموت و قول لماما بحبك او اروح و احضنها بس مش عارفه ليه دايما كنت بتكسف اعمل كدا مع ان مافيش حدود بيني و بينها ( قدام الناس يعني ) و كنت دايما بأجل دا اقول مره تانيه , ماهي اكيد عارفه اني بحبها
بس قررت بعد الحدث الي حصلي في حياتي انها احق واحده بكلمة بحبك دي كل شوية
ماما بحبــــــــــــــــــــــ ك
