ياما صادفت اصحاب وماصاحبتهمش
وكاسات خمور وشراب وماشربتهمش
اندم على الفرص اللى انا سبتهم
ولا على الفرص اللى ماسبتهمش
عجبى؟!!
قالها كده عمنا صلاح جاهين الاصحاب فرصه فى حياتنا ممكن يبقوا طوق نجاه وممكن يبقوا خمره تضيعك..
وكل واحد فينا المفروض بيختار صاحبه على الكلام اللى اتربينا عليه وسمعناه واتعلمناه من اهالينا وفى المدرسه
وحتى من الشارع زى(صديك من صدقك_اختر الصديق قبل الطريق_الصديق مراه صديقه)
كل دول واكتر اسس لازم تختار عليها صاحبك اصلك بتقعد مع صاحبك فى المدرسه او فى الجامعه او فى الشغل
اكتر ما بتقعد مع اهلك بتحكي له اسرار ومواقف من المستحيل انك تقولها لحد غيره..
حتى لما كلمة صاحب بتتقال بتفتكر حاجات ممكن تضحكك وممكن تزعلك وممكن تفرحك وممكن كمان
تخليك تفكر تفكر فى صاحبك هو صحيح صاحبك؟
هو صاحبك ده فعلا صاحبك؟ يعنى بيرشدك للخير وبيقف جنبك فى اوقات شدتك قبل فرحك
دايما صريح معاك ودايما بيتمنى لك الخير من قلبه لأ وكمان بيساعدك على نوال الخير فى حياتك ومستقبلك..
وانت كمان بتساعده وبتقف جنبه وبتعمل معاه زى ما هو بيعمل ويمكن اكتر وعلى قد ما تقدر بتقوله الصدق
وبتدله على الخير بتشده لو هيقع فى خطر وممكن كمان تفديه بنفسك؟
بجد لو انت وصاحبك بتعملو كده مع بعض يبقى مبروك عليكم نفسكم..
لكن الغريب ان كلمة صاحب دلوقتى اصبح ليها شكل تانى خالص يعنى فى ناس
بقت بتقيس درجة القرب من بعض....بالشتيمه وكل ما كانت الشتيمه اعنف واقوى يبقوا اقرب لبعض!!
يعنى لما تشوف اتنين بيشتموا بعض بامهاتهم ومرسوم على وشوشهم ابتسامه
متقلقش دول ممكن يكونوا اصحاب!!:-/
نفسى اعرف ازاى يبقى فيه صحاب مفيش بنهم لا احترام ولا وفاء ولا اخلاص ولا اى شىء غير قعده
فى كافيه ولا فى اى حته وضحك على تفاهة الحياه....أكيد دول مش اصحاب!!
الاصحاب زى سيدنا محمد_صلى الله عليه وسلم_وسيدنا ابو بكر_رضى الله عنه_
الاصحاب زى الرئيس الراحل جمال عبد الناصر والرئيس الراحل انور السادات
الاصحاب زى اتنين قابلوا بعض واحترموا بعض وكانوا بجد خير اصدقاء فى الحياه
ولو رجع بيهم الزمن مره تانيه مش هيختاروا ولا هيبقوا عايزين اصحاب غير بعض.:)
