من داخل الميكروباص!

[Rosy magic]

اوك (من وحي ما يحدث داخل ميكروباصات مصر

أنا معرفتش فين اكتب الموضوع ... ومش هعلق عليه .. ليكم انتم التعليق

يا جماعة في يوم من الأيام كان بابا مشغول ومش فاضي يوديني الدرس ،، قلت يلا يا بت اركبيلك ميكروباص واخلصي

شوفوا اللي حصل داخل الميكروباص من الأول


... الميكروباص يغادر المحطة متجها إلى طريقه

السائق: والنبي يا إخوانا الأجرة مع بعض.. والأجرة موحدة يا أخوانا

(يبدأ الركاب الآن في تجميع الأجرة ويرسلونها واحد تلو الآخر للسائق)

السائق: لسه فيه ناس ما دفعتش.

يصيح راكب بأعلى صوت: على جنب يا أسطى الله يكرمك.

فيتدخل آخر: والناصية الجاية معاك يا ريس.

راكبة تخاطب الراكب الذي أمامها: والنبي أديله واحد يا خويا

فيتدخل آخر وهو يسلم السائق الأجرة: خليهم اتنين معاك لو سمحت

راكب من الكنبة الخلفية يرسل الأجرة: خد أتنين من الجنيه وواحد من الخمسة جنيه

زميله في نفس الكنبة: أبعت ربع جنيه ورا يا أسطى

(السائق يرسل الربع جنيه للراكب)

راكب بجوار السائق: الباقي يا أسطى عشان نازل

راكب مر عليه الربع جنيه أثناء محاولة وصوله إلى صاحبه: والنبي يا أسطى الربع جنيه ده مقطوع غيٌره.

(الربع جنيه وصل إلى السائق من جديد)

السائق يتساءل: حد معاه ربعين؟

صاحب الباقي يسأل من الكنبة الخلفية: معاك ربع وتاخد ُنص؟

السائق: معايا..

(تمت الصفقة بنجاح.. تمر فترة يظن فيها الجميع أن الأجرة وصلت كاملة للسائق)

السائق: حد عايز فكة 5 - 10- 20

راكبة مسنة من الكنبة الأمامية: ثانية واحدة والنبي لما أنزل يا ابني.

(يهدئ السائق السرعة ويقف على الناصية)

السائق: أنزلي يا حاجة على مهلك. ( كان محترم في ناس تزعق اخلصي ورانا شغغغغل )

فيرد أحد الركاب: ربنا يشفي كل مريض

وتبدأ الراكبة المسنة في الدعاء للسائق: ربنا يوقف لك ولاد الحلال.. متشكرة أوي يا ابني.. ربنا يسهل لك طريقك يا ابني..

(السائق وهو ينظر للسماء مقبلا وجه وظهر يده اليمنى)

السائق: والله يا جماعة عليها أقساط .. والمخالفات ما بترحمش.

راكب في الكرسي المجاور: ربنا يفتح عليك وعلينا يا أسطى

راكب من الكنبة الوسطى: قبل الكوبري معاك يا أسطى

السائق بكل حزم وهو يعد فلوس الأجرة: قبل الكوبري ممنوع عشان فيه دورية.

(بعد لحظات صمت يكتشف السائق نقصاً في الأجرة)

السائق يصرخ في الركاب: يا جماعة اللي ما دفعش ورا

عدد من الركاب يتبرعون بالرد: كل العربية معاك يا عم.

السائق يصر: لسه فيه واحد ناقص يا جماعة.

راكبة ترد: يا خويا دا ابني وقاعد على حجري.

(السائق يهدئ وينظر خلفه للراكبة)

الراكبة وهي ترفع ابنها لأعلى: ده واد صغير.. عاوز أجرة عليه كمان

راكب يتدخل في الحوار: الناصية الجاية يا ريس.

السائق: كل ده صغير يا ست.. ده شحط في الجامعة أهو

الراكبة ساخرة من كلامه: يسمع منك ربنا يا خويا ويطلع دكتور أو باشمهندس أد الدنيا

الراكب يتدخل صارخاً: إيه يا أسطى.. مش قلت لك على جنب

السائق وهو يشوح بيديه للراكب: يا بيه معلش ما سمعتش

الراكب بقرف: أنت أطرش ولا إيه

السائق: ليه الغلط يا فندي

(الراكب وهو ينزل من الميكروباص)

الراكب: أنا أغلط زي ما أنا عاوز.. ده أنا أشتريك وأشتري عربيتك دي

السائق يخاطبه وهو يرحل بعيداً: ما دام أنت غني أوي كده أركب تاكسي يوصل لك لغاية الشقة فوق... (الميكروباص ابتعد).. يا ابن.... يا... يا... عالم ولاد...

عدد من الركاب: خلاص يا أسطى صلي ع النبي.

السائق يبرر شتائمه: ما هو اللي بيغلط يا أخوانا.. والله ما جيت جنبه

راكب مجاور: معلش يا أسطى

السائق: والله يا أفندية الواحد مش عارف يعمل إيه للزباين.

(الميكروباص يصل المحطة.. )

السائق: يالا يا إخوانا.. آخر الخط.. حمد لله ع السلامة.

احم احم ... وهي دي قصة الميكروباصات كل يوم .......

لازم فيها شتيمة أو خناقة ،،، وقصص دفع الأجرة



التعليق لكم

[RoRoO]

ايوة فعلا مفيش مره اركب عربيه الا لما القى فيها خناقه بسبب الاجره
او باى حاجه ذى كده والله
ميرسى على الموضوع يا قمر

[شيخ البلد]

ياختى احمدى ربنا انك لقيتى ميكروباص تركبية هو حد لاقى .
بس برافو عليكى ياروزا والله محاكاة رائعة ... وعلى فكرة فى ميكروبصات بتتكلم فى السياسة و ميكروبصات بتتكلم فى الكورة و اخرى فى غلاء الاسعار ودى اسواء انواع الميكروبصات عشان كلها شتايم وا خرى فى اخبار الفن و دى بتاع منتصف الليل ... بس انتى حظك جة فى الميكروباص بتاع هم الاجرة انا عرفة بردة و غالباً بيقلولى خد يا استاذ لم انتا ....
شكراً روزا باللبن وان شاء الله المرة جية تركبى ميكروباص من بتاع السياسية .

[MoOoRa]

هو انا هعلق على كام حاجة كده

اولها : انا مش هقتبس حاجة لأنها قصة روعه بجد يعني انا حسيت ان انا اللي راكب الميكروباص بصراحه ودي برافو عليكي فيها يا روزي
التانية : سبحان الله نازل بتركب وناس بتنزل وهو عارف كام واحد في العربية شغلته بقى حد يقدر يتكلم وقال ايه اكتشف ان في اجرة ناقصة ناص قوي يعني على فكرة هو قال كده على اساس انه يهز الناس اللي راكبه علشان لو حد سولت له نفسه ان يفكر ان في ناس تركب ومش هتدفع ناص يا اخي السواق ده حباية عينه ناصحه .
التالتة : ان السائق بتاع الميكروباص ده محترم بس مش قوي يعني بس ايه اللي يخليه يعمل كده الراجل اللي استنفذ صبره اكيد عرفتوه ايوه هو ده الغبي المتكبر اللي كان عاوز يشتري ميكروباص ده اصل انتوا متعرفوش ان البلد وقفت على الميكروباص اللي هيجيبه الراجل ده هو اللي هيفك الازمة بتاع السير . ما علينا
الرابعه : الشعب المصري شوف القلب الابيض خلاص يا اسطى حصل خير وحق علينا والكلام الجميل طبعا دي طبيعته
الخامسة والاخير :السواق نسي الاهانه وكل اللي حصل وقال للركاب ( السائق: يالا يا إخوانا.. آخر الخط.. حمد لله ع السلامة )

مرة تانية برافو روزي

[أحمد عمر]

اهلا روزى
رغم جمال كلامتك ومحاكتها للواقع بشكل فعلا زى ما قال مورا تحسسك انك راكب ف الميكرو باص دا ..
الا ان فعلا دا وجه واحد من الحكايه داخل الميكروباص لان الحكايات بداخله قلما تعد او تحصى .. سياسه ورياضه واجتماع و غيرها كتييييييييير ..
شكرا روزى

[Rosy magic]

ايوة فعلا مفيش مره اركب عربيه الا لما القى فيها خناقه بسبب الاجره
او باى حاجه ذى كده والله
ميرسى على الموضوع يا قمر

العفو يا سكر ... مش كلهم بيتخانقو ... فيهم ناس هادية ..

ياختى احمدى ربنا انك لقيتى ميكروباص تركبية هو حد لاقى .
بس برافو عليكى ياروزا والله محاكاة رائعة ... وعلى فكرة فى ميكروبصات بتتكلم فى السياسة و ميكروبصات بتتكلم فى الكورة و اخرى فى غلاء الاسعار ودى اسواء انواع الميكروبصات عشان كلها شتايم وا خرى فى اخبار الفن و دى بتاع منتصف الليل ... بس انتى حظك جة فى الميكروباص بتاع هم الاجرة انا عرفة بردة و غالباً بيقلولى خد يا استاذ لم انتا ....
شكراً روزا باللبن وان شاء الله المرة جية تركبى ميكروباص من بتاع السياسية .

اه لسة ربنا مكرمنيش أركب الميكروباصات التانية ..
آخر واحد ركبته كان بتاع الحمد لله أنا اشتريت عدس !!

ميرسي للمرور والتعليق الطريف ...

هو انا هعلق على كام حاجة كده

اولها : انا مش هقتبس حاجة لأنها قصة روعه بجد يعني انا حسيت ان انا اللي راكب الميكروباص بصراحه ودي برافو عليكي فيها يا روزي
التانية : سبحان الله نازل بتركب وناس بتنزل وهو عارف كام واحد في العربية شغلته بقى حد يقدر يتكلم وقال ايه اكتشف ان في اجرة ناقصة ناص قوي يعني على فكرة هو قال كده على اساس انه يهز الناس اللي راكبه علشان لو حد سولت له نفسه ان يفكر ان في ناس تركب ومش هتدفع ناص يا اخي السواق ده حباية عينه ناصحه .
التالتة : ان السائق بتاع الميكروباص ده محترم بس مش قوي يعني بس ايه اللي يخليه يعمل كده الراجل اللي استنفذ صبره اكيد عرفتوه ايوه هو ده الغبي المتكبر اللي كان عاوز يشتري ميكروباص ده اصل انتوا متعرفوش ان البلد وقفت على الميكروباص اللي هيجيبه الراجل ده هو اللي هيفك الازمة بتاع السير . ما علينا
الرابعه : الشعب المصري شوف القلب الابيض خلاص يا اسطى حصل خير وحق علينا والكلام الجميل طبعا دي طبيعته
الخامسة والاخير :السواق نسي الاهانه وكل اللي حصل وقال للركاب ( السائق: يالا يا إخوانا.. آخر الخط.. حمد لله ع السلامة )

مرة تانية برافو روزي

النقط اللي قلت عليها تلخيص جميل لمعنى الموضوع ...
تسلم يارب ..

اهلا روزى
رغم جمال كلامتك ومحاكتها للواقع بشكل فعلا زى ما قال مورا تحسسك انك راكب ف الميكرو باص دا ..
الا ان فعلا دا وجه واحد من الحكايه داخل الميكروباص لان الحكايات بداخله قلما تعد او تحصى .. سياسه ورياضه واجتماع و غيرها كتييييييييير ..
شكرا روزى

أجملهم ميكروباصات اللي السواق يكون رغاي ، يخرج من موضوع يدخل في غيره مش بموضوع محدد

أريجارتو للتعليق ...

[همسة ولاء]

معك حق مورا وانا كمان حسيت اني راكبة معها الميكروباص
تسلمي احلى روزي على الطرح الدقيق