الرجل المصرى قبل وبعد الزواج

[• JuSt MeMbEr •]

اهلا ومرحبا بأعضاء وعضوات مصراوى كافيه

ادينا بنساوى فى التحيه اهو " اعضاء وعضوات "
عشان حقوق المرأه اللى فى المنتدى بس

حبدأ موضوع كلنا بنشوفه فى الواقع
واكيد نموذج موجود بنسبة 99 % فى العائلات المصريه
والعربيه كمان

نبتدى فى موضوعنا ....

_____________________________________________

نـــــــــــو كومينــــــــت

مش حتكلم ... الصوره معبره جداااا

وهو ده السيناريو اللى بنشوفه فى حالات الجواز
اللى بقت حدث " نادر " اليومين دول

وتعالو معايا كده واحده واحده نشوف الناس دى بتعمل ايه

دايما الشاب اللذيذ الامور الرومانسى

وطبعا بيكون متاح فى فترة الخطوبه فقط ....

مهتم بخطيبته الى ابعد الحدود .. 24 ساعه مكالمات

وتلاقيه مستخدم عرض احسن ناس وطوال الليل رغى

"والله تلاقى موبينيل بتضرب نفسها 100 جزمه
على الخدمه دى " لما تروح إسكندريه او اى كورنيش
ولكن اسكندريه بالاكتر الناس عندنا مقشعرين اوى

" حساسين يعنى " دايما تعرف الشاب اللى خاطب من إهتمامه
بخطيبته طبعا مع خاصية مسك الايد والتحرك جانباّ والدوران حول خطيبته بشكل دائرى لما يكون فى جروب من الشباب داخلين طبعا والتزام احتياطات الامن بكافة انواعها
حتى لا تتعرض لاى نوع من المعاكسه

والمشكله إن برضه البنت بتتعاكس
" مش فى كل الاحوال "

نرجع لموضوعنا ،، دايما الراجل فى فترة الخطوبه بيدلع خطيبته

بكافة الاشكال وتتمثل فى النقاط الاتيه ::

1- كل يوم فســــح وفى اماكن مختلفه
2- لازم يتجاب كارت شحن كل شويه

ولو فى هنا حد خاطب عارف انا بتكلم عن ايه

3- لازم الشاب يكلم خطيبته كل يوم قبل ما تنام

4- لازم يركبها تاكسى .. ويوصلها لحد اول الشارع عشان يمشى معاها الشويه دول .. ولو بيتهم على اول الشارع يخلى السواق ينزلهم قبل الشارع ما يجى ب200 متر

5- اول البنت متقف قدام محل هدوم .. لازم الشاب يرمى ننى عينه ويشوف البنت بتبص على انهى شئ معروض وفى ربع ثانيه يدخل الشاب يجيب الحاجه اللى البنت اختارتها

6- يروح الشاب موصل خطيبته قدام باب البيت
واول ما يمشى بخمس ثوانى .. وهى لسه مطلعتش ع السلم
صاحبنا يتصل ويقولها وحشتينى !!!!!!

7- ممنوع رفض اول عزومه من اهل البنت على الغدا
لو الشاب ابوه بيموت .. يروح يدفنه ويجرى يلحق العزومه

" خايف على زعل اهل البنت طبعا عشان ميقرفهوش فى الخروج "

بس كنت دايماّ بسأل نفسى هى ايه لزوم الخطوبه ؟؟؟

حد فيكم يا جماعه يعرف ايه هى فايدة الخطوبه ؟؟

ايوه صح .. براافو .. عشان يتعرفو على بعض

يا سلام يا سلام ع النباهه .. هى دى فعلا فايدة الخطوبه

بس حسألكم كمان سؤال معلش هو فى شاب بيتصرف بطبيعته فى الخطوبه ؟؟؟ انا من رأيى شايف ان طباع الرجل والست بتبان
بعد الجواز ... طبعا بيبقى كل واحد اتدبس خلاص




الراجل المصرى بشكل خاص او العربى بشكل عام بعد الجواز

يا فرحتى بيه وبحلاوته .. تغير 360 درجه

حنعكس كل الكلام فى مميزات الخطوبه وهى كالتالى ::

1- كل يوم قعده فى البيت والست مش لاقيه حاجه تعملها

2- مبيصرفش جنيه عليها غير بالقطاره

3- كل يوم سريييخ لو الاكل معجبوش .. ويا سلام لو جه ولقى كل حاجه مظبوطه ..

يقوم الرجل الاصيل بنظره عميقه الى مائدة الطعام
فيبص راجلنا على الاكل يلاقيه زى الفل

يتجنن ازاى ميزعقش ...
يستغل فرصة ان الزوجه مش موجوده ويبص على " الملاحه" بالاسكندرانى يعنى الشئ اللى فيه الملح ويقعد يحط على اى حاجه محطوطه قدامه ويملى الاكل ملح .. ويصرخ بعلو صوته
ونبتدى الاتهامات

4- لو خارج الراجل مع مراته للاسف فى مشوار اضطرارى
ووقفت الست قدام محل الهدوم .. يبص صاحبنا عليها
يلاقيها مركزه اوى على شئ معين ....

فى ربع ثانيه يروح مشغل نغمة الموبايل ويعمل نفسه التليفون بيرن ويقعد يتكلم " ايوه ايوه معلش انا اتأخرت عليك جاى كمان شويه .. خلاص بقا جاى والله مش حتأخر "

يقفل صاحبنا المكالمه المتفبركه .. برضه لسه الست مركزه وعينيها طالعه بره 10 سم

فيقولها يلا ... فتبدأ تتكلم هى لأ ... يلا فين
مش حنشوف الطقم ده شيك اوى ...

صاحبنا فهم إن مفيش فايده
فطبعاّ يتصرف علطول و يشغل نغمة الموبايل تانى

" الووو ... الوو مش سامع ايه صوت العياط والصويت ده ؟؟
ايه ؟؟ خالى مات "

(( مع العلم انه معندوش خال اساسا ))

وصاحبتنا لسه برضه .. مهى فهماه بقا

يتحرك بسرعه ويقولها :: هو فى حاجه ؟؟ ..
انا عايز اعرف يعنى واقفه هنا ليه ؟؟

تقوله الطقم ده عاوزه اجيبه

فيرد بسرعه .. لا ده رجالى يا ماما مفيش هنا حريمى

ده رجالى اطفالى بس .........

5- يجو بقا يروحو .. طبعا هى مستنيه انه يوقف تاكسى بقا زى زمان .. يروح موقف مشروع يعنى " ميكروباص " زى ما بتقولو يعنى

ويركب هو جمب السواق ويقولها :: روحى هناك الكنبه اللى ورا خالص فاضيه وبالمره انا معييش فكه ابقى ادفعى وابقى احسابك فى البيت

ينزلهم السواق على اول الشارع ...

هو ماشى قدام لوحده وسابقها ب200 متر

6- تقول الست لجوزها ماما جايلنا ..

يرد صاحبنا فى سره طبعا .. ال يعنى ماما مش بتيجى
دول زيارتهم خراب عليا وعلى اهلى

اكل وشرب وبرطعه فى الشقه .. حسبى الله ونعم الوكيل
ربنا ياخدك وياخد اهلك واحد واحد .....

____________________________

وبرضه فى نهاية الموضوع بسأل نفسى هو ليه الراجل بيتغير
بعد الجواز ؟؟؟

هل الانسانه دى عشان بقت تحت امرك تبهدلها كده وكنت الاول بتتمنى انها ترضى وتبص فى وشك ؟؟؟

على العموم برضه مش كل الرجاله ...
فى رجاله مقشعرين كتير

واكيـــــــــــــد البنات مش حنســــــــاهم
وحيكون ليهم نصيـــــب الاســــد فى الموضوع

انتظرونى الموضوع الجاى مع الست قبل الجواز وبعده

اتمنى ان الموضوع يكون عجبكم فعلاّ

عاوز اعرف رأيكم ...
اى نقطه حابب اننا نتناقش فيها ...

لازم اعرف تعليقاتكم ع الموضوع ده

[~DREAM~]

هههههههههههههههههههه
بعيدا ان الموضوع فكاهى بحت وده طبعا من احد سماته
الا انه بيناقش فكرة موجودة عند اغلب المصريين
وانا مش عارفه ليه فى تركيز جامد على الاسكندرانين
رغم ان دى مشكلة شعب كله
بل مشكلة آمه كاملة
لكن الموضوع فعلا رائع والاروع كاتبه
تحياتى
DREAM

[• JuSt MeMbEr •]

هههههههههههههههههههه
بعيدا ان الموضوع فكاهى بحت وده طبعا من احد سماته
الا انه بيناقش فكرة موجودة عند اغلب المصريين
وانا مش عارفه ليه فى تركيز جامد على الاسكندرانين
رغم ان دى مشكلة شعب كله
بل مشكلة آمه كاملة
لكن الموضوع فعلا رائع والاروع كاتبه
تحياتى
DREAM

نورتى الموضوع بمرورك العطر

بس مفيش تركيز على الاسكندرانيين ولا حاجه
بس دى مجرد نماذج وده فعلا موجود فى جميع الدول العربيه
وليس فى مصر فقط

نورتى مره تانيه

مشكوره ع المرور الرائع

[brokenheart]

بس حسألكم كمان سؤال معلش هو فى شاب بيتصرف بطبيعته فى الخطوبه ؟؟؟ انا من رأيى شايف ان طباع الرجل والست بتبان
بعد الجواز ... طبعا بيبقى كل واحد اتدبس خلاص

يعني افهم من كلامك نلغي الخطوبة و نمشيها عرفي عشان تبقي كل حاجة ع الطبيعة بقي ؟

وبرضه فى نهاية الموضوع بسأل نفسى هو ليه الراجل بيتغير
بعد الجواز ؟؟؟

هل الانسانه دى عشان بقت تحت امرك تبهدلها كده وكنت الاول بتتمنى انها ترضى وتبص فى وشك ؟؟؟

على العموم برضه مش كل الرجاله ...
فى رجاله مقشعرين كتير

اعتقد لان فترة الخطوبة هي بتهون عليه مشاكله

انما بعد الجواز بتبقي هي اصلا المشكلة

واكيـــــــــــــد البنات مش حنســــــــاهم
وحيكون ليهم نصيـــــب الاســــد فى الموضوع

انا مستني الاسد ده اما نشوف عايزك تفاجئني بقي



تسلم يا زيكو ع الموضوع

وااااصل

تحياتي لكـــــ

[• JuSt MeMbEr •]

شـــــــــكراّ عــــ المرور الكـــــريم ونــــــــــورت الموضوع .. ده اولاّ

ثانيــــاّ بالنسبه لموضوع العرفى انا بس كنت بتكلم فى نقطه معينه
إن 90 % من التصرفات الناتجه من الطرفين مش بيكون من طباعهم الخاصه

ده رأيـــــى الخاص .... ونـــــــورت الموضوع مره تانيه حبيب قلبى