للى بيفكر يبقى ريس

**misterattia** · 22 - 6 - 2011, 11:33 AM

للى بيفكر يكون ريس
لازم ف البدايه جوه قلبه يكون كويس
يحط ف دماغه انها شركه
والقرار بالمشاركه
اياه يفكر
ان مصر هتبقى بركه
او يفكر مالها سايب
ميراث وتركه
اوعاه يفكر ف القصور وفى المزارع
اوعاه يفكر هيحط صورته ف كل شارع
اوعاه يفكر اننا ف يوم اغبيا ء وهو اللى بارع
لازم يكون رئيس مصارع
يعرف يصارع
للانجازات دايما يسارع
ئلازم يكون هيبه طويل وفارع
لازم يكون مذاكر
تمللى فاكر
اللى فات واللى جاى والمضارع
مش عايزينه يكون متيس
للى بيفكر يكون ريس
لازم ف البدايه جوه قلبه يكون كويس
مش عايزين هرم
90 سنه وكمان سنه ييجى له جلطه
عايزينه شباب يبدا بالمصارحه
مش بالمغالطه
كلنا راح نمسك على غلطه
عايزين افعال مش كلام
زى اللى راح يدن ف مالطه
مش عايزينه عربجى ولا بلطجى
وف ايده بالطه
اوعاه يفكر ان مصر لقمه سهله
ياخدها زلطه
معدش تانى هينزلط
غير الزلط
معدش سكوت لو فيه غلط
عايزين امور واضحه
مش خيال وبينخلط
بطين مليس
للى بيفكر يكون ريس
لازم ف البدايه جوه قلبه يكون كويس
عايزين رئيس ينزل لنا
يعمل لنا
قبل ما ييجى يقول لنا
نحطه جوه قلبنا
يبقى ابننا
يبقى ابونا
وزوجته تبقى امنا
مش زى حسنى اللى كان
بياكل لحمنا
ويشرب دمنا
مش زى حسنى اللى كان بيسرق عمرنا
عايزين رئيس لكل خير يشدنا
وفى كل ضيق ينظر لنا
عايزين رئيس صادق
مش زى حسنى اللى كان بيخمنا
ملعونه حسنى اللى كان ريس
للى بيفكر يكون ريس
لازم ف البدايه جوه قلبه يكون كويس
عايزين رئيس بيعرف ربنا
عايزين رئيس يبقى زينا
عايش ف قلب همنا
يحلم لنا يعمل لنا
رئيس يحافظ على ارضنا
على عرضنا
يقعد لنا
يسمع لنا
طول السنه
لو يعوز يقول لنا
لو نعوز اوعاه ف مره يذلنا
ولا يحاور ولا يميس
للى بيفكر يكون ريس
لازم ف البدايه جوه قلبه يكون كويس
عايزين رئيس يكون خبير فى السياسه
رئيس زكى مليان فراسه
مش زعيم عصابه فى سوق نخاسه
عايزين رئيس يخلى مصر
زمرده –ياقوته – ماسه
عايزين رئيس يأدى مهمته ويمشى
مش يخليها جوه عيلته بالوراثه
ومراته تبقى مهذبه ف غايه الحساسه
واسره رئيس تقدر
يعنى ايه حمل الرياسه
مش عصابه تمشى ونكتشف
ان الحكايه مطينه
متلونه
والعصابه قودين
وشغلهم كان فى النجاسه
واللى مش قادر بلاها
بلاش بقى يجرى وراها
ياللى تحكم مصر
انته داخل ف المتاهه
مش وجاهه
الشعب مش هيعدى شىء
كفايه مره وعداهه
واللى بيفكر يحاول
يبقى ندهت له نداهه
مفوم ياللى عايز تبقى ريس
للى بيفكر يكون ريس
لازم ف البدايه جوه قلبه يكون كويس

==============

عطيه الخضرى
قلين / كفر الشيخ

**حرف مشتعل** · 22 - 6 - 2011, 11:47 AM

ورائعه اخرى
من روائعك
مستر عطيه
سلمت واليمين
ودى واكيد وردى

**محسن البدراوى** · 22 - 6 - 2011, 01:52 PM

بجد جميله جداً جداً
اعجبتنى بكل معنى ومضمون
تهت فى بديع الفكره
وجميل احساسك
دائماً ناقوس تدق على ابواب الامانى
دائماً ترى المستقبل بشكل تانى
فكره جميله وابداع رائع
كل الشكر والتقدير
لك منى اطيب الامنيات
وبالتوفيق