يا ناس يا هو
بقى فيه حد يعمل كدة
اعلانات عجيبة و ناس غريبة و رنات اضل سبيلا
بس المشكلة مش في الاعلان في حد ذاتة
المشكلة في فكر اغلب الناس اللي انقسموا لفئات عجيبة
اللي عاملين متدينين و فاكرين التدين هو التليفون الاسلامي اللي بيرن بالاذان او بسورة قرآنية او دعاء
طب لو محطتش الاذان و لا قرآن في تليفوني هل تليفوني يعتبر مش متدين و فاجر و يستحق الرجم
و بالتبعية انا كمان زيه




اما التانين بقا ففاكرين الترويش و الشياكة و الشباب
انهم يحطوا
رد علينا يافهمي حن علينا يا فهمي تقلان كدة ليه
طب بذمتك لو اسمك فهمي حتحط رد علينا يا فهمي
طب لو انا اسمي الحقيقي باتعة حطط عبرينا يا باتعة خنقتينا يا باتعة
لو مردتيش حنحط السيخ المحمي في صرصور ودنك يا باتعة
( هو ايه الصرصور بتاع الودن دة )
ايه الحاجات دي
طب و لو محطتهاش مش حبقى ستايل و فريش


انا كواحدة من الناس ( غيرك يا واحدة من الناس ) كل ما ارد اقول يا دي النيلة يادي السواد ازاي حقول كدة بعد القرآن و الدعاء
و هل لو حطيت الدعاء او القرآن دة حيخليني مقولش كدة و انا برد
طب ازاي و 99% من اللي بيكلموني بيتصلوا مخصوص عشان يحرقوا دمي
و دة طبعا اللي خلى الناس بتوع الفتاوي الفضائية يسئلوا الاسئلة بتاعت لو حطيت الاذان رنة يبقا حرام
طب لو حطيت نغمة مرحب شهر الصوم مرحب في رمضان يبقا رجس من عمل الشيطان
ناس تخليك تحس انهم بيرفكت و سوبر في كل حاجة القلق بس من الرنة هي اللي حتدخلهم جهنم الحمرا


اما الفئة الاخيرة و انا منهم فدول بقا اللي كبروا دماغهم ( غير اللي كبر دماغو بتاع الولد الظريف اللطيف بتاع ميلودي اللي معرفش يقلع التي شيرت )
و لا يفرق معاهم رنه و لا بتاع المهم ان التليفون شغال و بيقول الو


المهم نخلينا في موضوعنا
بصراحة يا جماعة اعلان فهمي دة بيجيبلي شلل رعاش
بالاخص ان المفروض الحاج فهمي دة هو المدير يعني رمز الحزم
لكن تحس ان فهمي بيه حيتحزم و يرقص ابتهاجا بوصول مكالمة و مش رنة
انا عن نفسي لو رحت و لقيت المدير بتاعي حاطط رنه رد علينا يا فهمي حمشي على طول
اولا لانه مسموش فهمي
ثانيا لانه يبقا من وجهة نظري شخص سطحي و عجيب و دي نوعية مينفعش تترأس حد اساسا
و خصوصا واحدة شريرة زيي
ثالثا بقا لان المدير لازم يحط رنه رزينة تخليك تبص في عينيه و تقوله يا هادى فى رنتك وراسى فى كلمتك وتقيل فى مشيتك وحشتنى كتيير حضرتك
دة مديـــــــــــــر يا ناس مش فهمي
طبعا حضرتك هنا دي رمز للاحترام



من فترة كدة اول ما نزلت التليفونات البوليفونيك و الحاجات دي
كنت اسمع صوت بيبي بيعيط
اوسوري حمار يعني بينهق
او اي حيوان تاني
و فجأة تلاقي الشخص المحترم صاحب التليفون ذو الرنة الروشة بيرد
ايوة يا بابا او ايوة يا حبيبتي
( اعذروني انا مش بكون رامية ودن هما اللي بيسمعوني غصب عني )
يا نهارك مهبب
ايه يا واد انت دة
و ايه اللي انت هببتو دة
دة انا لو اتجننت في عقلي و حطيت الرنة دي حتكسف ارد
طب بتوع علم النفس و التحليل و كدة صنفوا الناس تبع رنتهم
زي مثلا اللي حاطط نغمة من فيلم دة شخص بيحب المغامرة
و اللي حاطط اغنية دة شخص مرح و بسيط
و اللي حاطط رنة التليفون العادية شخص عملي
بس مقالوش اللي حاطط صوت كلب يبقا ايه


في اعلان كدة تاني بيقول رد يا غسان افندي
اول لما سمعت اعلان رد يا غسان افندي سمعتها انتي يا غسالة معلش العتب على النظر


في العصر الحجري سنة 1990 م قبل الموبايل ايام الكسوف يعني
كان مينفعش حد ينده لبنت باسمها في الشارع حتى لو ابوهها
معقول يعني يندة في الشارع على بنته و يخلي الحابل و النابل يندهلها
لكن بقا لما الهانم تحط رنتها باسمها في التليفون
و يسمعها الشعب كلة دة يبقا اسمه ايه
و خصوصا ان الاسماء فيها رندا و رانيا و هبة و كلة عادي يعني
طب في مجتمعنا و مع انتشار اسماء زي
خيشة و ست الدار و ما شابة
حينزلوا رنات باسمهم ازاي
و الا نسيب الناس دي تتعقد في عيشتها بعد الشر و تتنفسن
و تحس بالنقص و انهم اتحرموا من رنة متميزة
لاننا الحمد لله وصلنا لدرجة رفاهية مفرطة و مفاضلش غير ان
رنتك تبقا باسم حضرتك
و شــــــــــــــــوبش
( دي كلمة بلدي خاصة بالردح القومي سمعتها في فيلم امبارح- دة غير المسرح القومي خالص


مع تحياتي
باتعة