الضريبة في الميت حــــــــــــــــــــــــ رام

[باتعه]

مبدأيا الكلام دة مش في مصر و لا عن مصر و لا يمت لمصر بأي صلة
و خصوصاً ان الكلام ماعليهوش جمرك لحد دلوقتي

خير اللهم اجعله خير
شوفت كابوس شنيع فظيع


قال ايه قاعدة انا و شوية بشر وواحد اسمه غوغائي و الباشا بنتكلم و انا بقولهم :
قال ايه حيزودوا الطينة بلّة

البشر : ازاي تقولي كدة على الناس الكبيرة دي ،معقول احنا يعني كشعب جاهل مش مكمل تعليمه حنفهم اكتر من الناس دي اللي خلصت كل شهادات الدنيا و ما فضلش غير شهادة واحدة عمرهم ما حينولوها

انا مش بقول
دة هو اللي بيقول

البشر : بيقول ايه يا شابة

قال بيقول خير اللهم اجعله خير حيفرض ضريبة عقارية سنوية مقدارها 14% من ثمن الوحدة السكنية

رد غوغائي و قاله
يا باشا مجلس الشِعب لسة مناقش القانون و مش حيوافق طبعا
انت عارف اغلب اعضاء البرلمان عندهم شقق في بورتو منشية ناصر و بورتو الدويقة السخنة و مدينة السلامارينا ( مش بتوع مصر )

الباشا : لو مِجلس الشعب موافقش حطبق القانون بقرار اداري و حخليه 46% من سعر الوحدة السكنية و اعلى ما في خيلكم اركبوه


، هو مقالش اعلى ما في خيلكم اركبوه بس انا بتبلى عليه (دة لو عرف ان عندنا خيل في الاسطبل بتاعنا كان فرض عليها ضريبة خيلية و بعدين دبحها و اكلهلنا )

يا ليلة زرقا
ليه يا باشا بس

اهو كدة غلاسة و خلاص – انت يا غوغائي انت حتفهم اكتر مني

رجعنا كدة بالذاكرة احنا و الاستاذ غوغائي دة لكام يوم ورا


كان فيه اضراب من موظفين الضرايب العقارية بتوع الحلم طبعاً
و طلع الباشا قال جملته الشهيرة التي ستسجل في التاريخ بكتابة من نار جهنم ( انا ما يتلويش دراعي ، بتحبوا الشارع خليكم في الشارع )

بس بعدها بقا الراجل قدح زناد فكرة و اطلق الطلقة الكبرى اللي انفجرت في وش الغلابة
اللي طفحوا الكوتة ( معرفش يعني ايه كوتة مبدأياً) و شربوا من كيعانهم عشان يجيبوا حتة شقة تمليك تلمهم هما و عيالهم .

الفكرة اجمالا عبارة عن فرض ضريبة عقارية على العقارات ايا كانت مدة بنائها و ايا كان الغرض من استخدامها ،- فاضية او مشغولة بحضرتك لأنك ساكن فيها انت و العيال و امهم و ابوهم و ابوك و ابوها و الكل كليلة


مقامه على الارض ( دي مفهومة طبعا )


او تحتها
تحتها ازاي
اقولك ازاي
التُرب دي مبنية تحت الارض و كلنا بنقول ان الميتين في الدار الآخرة يعني دي اول مراتب الدار الآخرة
و معروف علمياً ان كلمة دار هي المرادف لكلمة بيت و بالتبعية هي مرادف لكلمة عقار يبقى تدفع و انت ميت
قصدي و انت ساكت

و كمان لو مقامة على الماء
يعني اليخت بتاعك حتدفع عليه
و عم برعي المراكبي حيدفع عن اليخت بتاعه بردو منتهى المساواة
بس احتمال عم برعي يدفع و حضرتك متدفعش لانك حتكون من الشريحة المستثناة
تجيب مثلا شهادة ان اليخت بتاعك خرموا سيدنا الخضر فمن ثم لا يجوز فرض عليه ضريبة لانه ملك للناس و ما انت الا امين عليه و بتحفظه من العامة و الغوغاء امثالنا احنا و عم برعي المراكبي

و عشان ما نتذمرش و نقول الضريبة دي ليه
يرد علينا رد مقنع جداً يفحمنا بصراحة

ان الضريبة دي ستوجه للانفاق على الخدمات المتلتلة يا جحده و تطوير الجهاز الاداري و سد بوق الموظفين بتوع الضرايب العقارية

اومال يعني الراجل حيسحب من حسابة في سويسرا و يصرف عليهم و الا ايه
دول مثيري شغب

و قال ان الضريبة المحصلة دلوقتي حوالي 450 مليون جنية و الاجور لوحدها 435 مليون جنية
يعني فاضل 15 مليون جنية و دول طبعاً ميجبوش سيمون فيمية و لا سندوتشات كوردون بلو للاولاد يروحوا بيها الجُنينة

طب يا باشا زمان كان فيه ناس بانية عمارات تحفة في الزمالك و حتت كدة حلوة و الشقة فعليا تمنها عدى المليون جنية بفضل النيران الصديقة اللي عايشين في عزها و خيرها و الناس دي مأجرة الشقق بكلام فارغ
يمكن العمارة كلها بيطلع منها 35 جنية في الشهر



يرد الباشا و يفزعني و يقول اللي بنى البيت دة هو اللي حيدفع
مش عمل فيها مصلح اجتماعي و بانيلي عمارة مسكن فيها الغوغائيين
يبقا يدفع و رجله فوق مناخيره


طب يا باشا في استثناء للقانون دة

يرد يقولك طبعا طبعا بطريقة كاظم الساهر في قصيدة بغداد

مين يا باشا
الابنية المملوكة للمشروعات الخيرية ( يعني شقق بورتو الدويقة و مدينة السلامارينا و منشية ناصر ...)

و دي خيرية ازاي يا باشا

ايوة خيرية طبعا
الناس بتروح تريح اعصابها فيها بعد عناء و تعب الشغل و تنسى خلقتك يا غوغائي تبقى خيرية و الا لا

و كمان العقارات اللي ايجارها السنوي لا يقل عن 600 جنية
بس يا باشا 600 جنية في السنة يعني صاحب العمارة بيلم 50 جنية في الشهر
و حتى لو حضرتك خليتهم حتى 1000 جنية في السنة يبقى صاحب العمارة المسكين بيلم في الشهر 83 جنية
يعني يجيبوا على الاقل ب 30 جنية عيش ( بجنية في اليوم من ابو طابور )+ 20 جنية كليو جبنة + و شوية خضار طول الشهر ب 30 جنية رغم يعني ان القوطة ب 4 جنية و البطاطس ب 4 جنية و البصل ب 3 جنية و التوم بجنية و نص

اخرس يا غوغائي انت حتفهم اكتر مني

و كمان حستثني مراكز الشباب قال يعني كان فيها عقارات

و كمان يا جحدة ابنية الحكومة اللي مشغالاكوا و العقارات المملوكة للجهات الاجنبية بشرط المعاملة بالمثل

يا حلاوة يا باشا
يعني حيبقى لينا سُلطة في بلاد برة

اخرس يا غوغائي

و كمان الابنية الدينية و بكدة يبقى عداني العيب و أزح

أزح مين يا فندم

ازحك من على وش الدنيا يا غوغائي

طب يا باشا افرض ان الناس دي معرفتش تدفع الضريبة لان اغلبهم شحاتين او فقرا او مشغولين في طوابير العيش حتودوا الناس دي كلها فين



بص يا غوغائي
الناس دي معاها فلوس كتير اوي بدليل انها واقفة في طوابير العيش يعني معاها فلوس و بتشتري
و لو دماغهم فكرت الفكرة دي فحفرض ضريبة عقارية على السجون و يا انا يا هما


طب يا باشا احنا بندفع ضرايب مبيعات و دخل و ضرايب كسب و ضرايب عقارية و دمغة بناخد ايه قصاد دة كله



بتاخدوا على دماغكم يا غوغائي



مع تحياتي
باتعة
حقوق النقل و الاقتباس محفوظة

[abdo389]

يسلام عليك وعلى كلامك واضح ان الكلام فعلا لا يبت باى صله عن مصر
ايه ياعم هى مصر فيه حاجه من الحاجات ياعم دى مصر
مصر بلد الامن والامان

[باتعه]

ايه ايه عبده انت مصري عايش معانا في البلد ولا ايه

يالهوي بلد الامن والامان

يابني شويه شويه حندفع ضريبه علي عمرنا اللي يعيش سنه يدفع ضريبه

ال بلد الامن والامان ال

يالا منوره يا جميل
ومتحرمش من مرورك المميز

[طيف عابر]

تسلمى يا باتعه على موضوعك الناقد من اجل التغيير للافضل
مشكورة واتمنى لو اقدر اعلق كما يجب على الموضوع
لكن هو فعلا حال كل دولنا العربيه للاسف ومش مقتصر على بلد بحد ذاته

حبيت بس اشكرك واتمنى ان نقرأ لك المزيد
منورة

[Serag Magdy]

موضوع فوق الممتاز والله يا باتعة
واجمل حاجة فيه الاسلوب
بس الموضوع مش موضوع ضرايب عقارية وبس دي بقت مشكلة والله
اي خطوة بتعملها دلوقتي بقت بمقابل
يعني لو حبيت تعمل اي ورقة من اي مصلحة حكومية بقي ليها مقابل
مع انها مش بتصرف اي حاجة
او يكون اللي بتدفعه مش بيمثل قيمة اللي الورقة دي صرفته
بس هو العيب مش فيهم
العيب في الناس نفسهم
موضوع فوق المميز
تسلم الايادي يا جميل

[abdo389]

انا مش عارف ليه الناس فاهمانى غلط ايوه يابنتى هى فعلا بلد الامن والامان
هو انت مشفتيش اللى حصل فى اضراب 6 ابريل من الحكومه (امن امن يعنى) ولا اللى بيحصل فى اى قسم
ودايما الواحد مطمن على نفسه طول ما هو قاعد فيها عارف انه هايقوم هايلاقى عيش مش قدام باب بيته لا قدام باب اودته
والطالب مطمن انه بعد ما يتخرج هايشتغل
واللى شغال مطمن انه هايلاقى شقه يتجوز فيها بس هو مشكلته فى العروسه
واللى........................
يبقى امن وامان ولا لأ