إحنا .. معندناش نـــــمــــل !!!

[Hooba]

النمل جيوش مدربة .. ذكية وتتعلم .. لدرجة أنها بتحمى مخلوقات تانية! .. ومنهم النوع البلطجى الذى يطلب الإتاوة والدفع له مقابل خدماته .. يعنى باختصار عالم تانى وعالم محترم جدا .. وهو نعمة لصالح بلاد ونقمة فى بلاد! ففى الصين النمل الأحمر يفيدهم فى تقليب التربة الزراعية وتهويتها .. أما فى أمريكا فهو نقمة لأنه يأكل كل شئ حتى كابلات الكهرباء ( يستاهلوا )


الوقاية خير من العلاج .. لو أن البيت نظيف ولا يحتوى على فتات الطعام ففرصة انتشار النمل أقل .. ولكن للأسف النمل برضه لو البيت كان فل الفل لا يرحم.

نظريات كتير خرجت لمكافحة النمل والقضاء عليه .. ولم نستطع سوى قتل القليل من النمل! .. وهنا استعراض سريع لبعض النظريات:

نظرية الشريط اللاصق:

بتثبيت شريط لاصق على الشقوق فى المنزل وحول الأبواب .. ولكن النمل الذكى كان يأخذ الطين ويضعه على اللاصق مما يعطل عمله!



نظرية سيب وأنا أسيب:

أساس النظرية أنك تعطى النمل حقه وهو يسيبك فى حالك ..جيب كل يوم شوية أكل وحطه أمام البيت فياكل بره البيت ويسيب البيت فاضى .. نوع من التكافل والتوازن البيئى ..


نظرية أديله بالشبشب

لحد ما يبان له صحاب: أفشل نظرية .. أيه الغباء ده هو الشبشب هيضرب مين ولا مين .. وبعدين جحر النمل هيفضل يطلع نمل!


نظرية طنش تعش:

ودى للناس الكسلانين .. سيب النمل يعيش معاك فى البيت ولا تعمل له حاجة بس الخوف إنه فى يوم يطردك من الشقة (:


نظرية الرشة الجريئة:

عن طريق رش المبيدات (خصوصا الباف باف فيليت الذى يستمر ويستمر ويتوغل وينتشر ويقتل - بس بيقتلك أنت وكما قلنا أنه الآثار الجانبية للحاجات دى أخطر من النمل بمراحل!


نظرية اسمها حط له السم فى الأكل:

آه خياااانة .. أنك تشترى المنتجات السامة دى على شكل حبوب .. مشكلتها لو عيل صغير طفس أكلها .. تخسر عيل صغير علشان نملة؟ بلاش أحسن


نظرية المكنسة الكهربائية:

نظريه فاشلة لأنك لن تقضى على المصدر!


نظرية لاقينى ولا تغدينى:

ودى دليل على اليأس .. الفكرة أنك تخطف نملتين من وسط كل 10 نملات .. تقتل نملة وتضرب نملة .. وترجع النملة المعتقلة دى للجيش تانى علشان تروح وتحكى لملكة النمل عن وحشية البنى آدم اللى رايحين ياكلوا أكله .. بس المشكله أنه النمل ممكن يضحى ولا يهمه.


نظرية إياكشي تولع

( وفى رواية أخري اسمها: عليا وعلى أعدائى ):

ودى مصيبه لأنها فاشلة جدا .. إنك تجرى ورى النمل بالبلطه أو المنجنيق أى حاجة كبيرة كده علشان تكسر جحورهم .. بس النتيجة البيت يا إما هيتهد أو أنت تكسره كله .. وبرضه النمل هيعيش!


طيب والحل ..


الحل أيه عقدتنا فى عيشيتنا ؟؟



أيه طرق مكافحة النمل؟؟ ما هو العلاج؟

ببساطة شديدة وبعد عدة تجارب .. كالعادة، فالمكافحة البيولوجية



هى أساس الحل الجذرى للمواضيع المتعثرة ..




وهذه صورة العلاج:

اسمه آكل النمل Anteater ويتغذى على أكثر من 200 ألف نملة فى اليوم .. حظ سعيد وألف مبروك عليكم إقتناؤه

ويا ريت الجيران يشتركوا معك فى الحل لأنه لو مأكلش النمل ده كله

هيزعل أوى وباين من الصورة أن زعله وحش.

[Rosy magic]

نظرية سيب وأنا أسيب:

أساس النظرية أنك تعطى النمل حقه وهو يسيبك فى حالك ..جيب كل يوم شوية أكل وحطه أمام البيت فياكل بره البيت ويسيب البيت فاضى .. نوع من التكافل والتوازن البيئى ..

ههههههه ،، ونجيب الفيل اللي في الآخر دة منين
ربنا يستر ،، ثانكس

[ساندرا]

شكرا كتير اخى والنمل مشكلة بالبيت عن جد
جزاك الله خيرا على البسمة
هو نعمة لصالح بلاد ونقمة فى بلاد! ففى الصين النمل الأحمر يفيدهم فى تقليب التربة الزراعية وتهويتها .. أما فى أمريكا فهو نقمة لأنه يأكل كل شئ حتى كابلات الكهرباء ( يستاهلوا

[abdo389]

والنبى لو عملت معاه ايه ده نمل يابا مش بياكل معاه الكلام ده كله

[Hooba]

ههههههههههههههههه علي رايك .... يا راجل سيبك ..... نمل إيه ده اللي هنعمل عقلنا بعقله

[نور الحياه]

أنا طبعا بسجل اعجابى بكل مواضيعك يا هوبا لأنى متابعاها وبشكرك جدا على ردك الدبلوماسى على استفسارى ... وطبعا انا عايزه أقول حاجه فى موضوع النمل ده وهى ان النمل مش بيظهر غير فى الصيف بس لأنه طبعا بيعمل بيات شتوى يعنى معنى كده أنه بيظهر فى الكام شهر بتاع الحاجات المسكره والعصائر .... يعنى انا رأيى ان كل ست بيت أو أى شخص مسئول عن بيت يحاول ياخد باله من الأكل أو العصير اللى ممكن يقع على الأرض أو على السفره أو الترابيزات لأن النمل مش بيجى لوحده كده , طبعا بيجى من الاهمال فى نظافه البيت يعنى يا جماعه الموضوع بسيط بس محتاج شوية اهتمام ونظافه والشهرين دول يخلصو بسرعه وترحل جيوش النمل . . . . .

[TiMo0oR]

تسلم ايدك يا مان على التوبيك

كل النظريات اللى انت قولتها دى جامده اوى

[نجمة عسولة]

اسمه آكل النمل Anteater ويتغذى على أكثر من 200 ألف نملة فى اليوم .. حظ سعيد وألف مبروك عليكم إقتناؤه

ويا ريت الجيران يشتركوا معك فى الحل لأنه لو مأكلش النمل ده كله

هيزعل أوى وباين من الصورة أن زعله وحش.

المشكلة ان مكنسة النمل دي مش ممكن نربيها في البيت دة حل فاشل حد عندة حل تانى
هو ممكن يكون المياه بس نخاف لنغرق البيت
أى اقتراح
ومي

[Treka]

نظرية لاقينى ولا تغدينى:

ودى دليل على اليأس .. الفكرة أنك تخطف نملتين من وسط كل 10 نملات .. تقتل نملة وتضرب نملة .. وترجع النملة المعتقلة دى للجيش تانى علشان تروح وتحكى لملكة النمل عن وحشية البنى آدم اللى رايحين ياكلوا أكله .. بس المشكله أنه النمل ممكن يضحى ولا يهمه.

نظرية جامدة لكن بردو مفيش فايدة ومفيش حل ياكل معاه ده يا جماعة نمل
مش اى حاجة يعنى .. فا لو عايزين تخلصوا منه امسحوا الارض كل شوية
عشان هو مش بيحب يقف على ارض ساقعة وده حلو .. بس بردو مش هينفع معاه

[احمد طنطاوي]

انت نتقول ايه يا عم Hooba .. وايه النظريات دي كلها .

الحل بسيط وهو انك تسيبله البيت وتهج .

شكرا علي النظريات الجامدة