عارفة يا طيف
أعتقد إن فيه أجيال قبلينا كتير ناقشت موضوع الحب
و أعتقد كمان إن كان فيه حملات كتير عن الحب و كان فيه آراء كتيرة جدا
عموما أنا حأرغي كتير بقي في الموضوع دا
الحب مشاعر نبيلة و طاهرة و بريئة
يعني الانسان يحب حد تاني بدافع الحب و بس
مش لأي سبب تاني أو أي اغراض تانية خالص
ربنـــا كرم الانسان بحاجات كتيرة جدا و للأسف الانسان هوا اللي بيسئ استخدامها
و منها الحب .. علي قد الحب ما كان مشاعر نبيلة شوفي بقي الحب بقي ايه دلوقتي
أعتقد إن ربنا محرمش الحب الطاهر البرئ الخالي من الشهوات
الحب هنــا مش مجرد إن الواحد يقول ( بحبك )
و يفضل علي التليفون بالساعات و يتمشوا علي الكورنيش كدا
و يجروا بقي ورا بعض بين الشجر زي ما بنشوف في الأفلام و الهجايص دي كلها
لأ الحب مشاعر رقيقة .. حلوة .. عذبة و جميلة
الحب دا كرم من عند ربنا .. بس لو حبينا صح
:: طيب حد يقدر يقولي يعني ايه حب ؟!!!! ::
متقوليش بقي سهر و اغاني عبد الحليم و هدايا و دباديب و كل الكرم دا
أنا حأتجاوز السؤال دا دلوقتي فكروا فيه و ردوا عليا
أهو نكبر المناقشة بشكل أوسع بقي
:: طيب حد يعرف المـــوضــة دلوقتي ؟!! ::
أنا مش قصدي موضة البنطلونات و الكلام دا .. لأ موضة الحب
تلاقي الولد أو البنت كاتبين كلام غريب كدا و أكبر من سنهم
تلاقي إن كل الشباب و البنات مجروحين و يندموا علي وقتهم اللي ضاع
و تكتر العبارات و و تتوه المعاني و المفاهيم .. بقت مجرد موضة
كل واحد عايز يعرف واحدة أو واحد عشان يعيش الدور حبتين
فاكرلي نفسه عبدو في فيلم ( حبيبي فوق الشجرة بيتنطط )
-- عبدو دا عبد الحليم --
محدش بقي فاهم حاجة و عارف يعني ايه حب
تلاقي البنات في ( السنترالات ) بيتكلموا مع ( حبيبهم )
و في مكان بعيد عشان محدش يشوفهم
طيب ازاي ؟!!!
حب ايه دا بقي ؟!! ولا مشاعر ايه دي ؟!!
تيجي تسأل اي واحدة ليه بتعمل كدا .. حتقولك بابا و ماما حيعارضوا الحب دا
فاكرة نفسها جوليت و هو روميو .. و تلاقيه ولا روميو و حتي حصل اسماعيل يس
ممكن يكون كلامي هجوم شوية علي الحب
بس بالعكس انا من مؤيدي الحب
أنا نفسي الدنيا كلها تحب .. بس تحب صح
الحب لازم يكون دافع للأمام و دايما يوصلك للأمام مش لوراء
لازم الواحد يتعود يفكر بعقله و بقلبه
لأن مش كل قرارات القلب صحيحة و لا كل قرارات العقل صحيحة
ربنا خلقلنا عقل نفكر بيه و قلب نحب بيه
ممكن الانسان يحب .. دا مش غلط و لا كان حرام
بس الحب الطاهر البرئ
حب براحتك .. عيش في جنه من السعادة .. طير بجناحين من نور في سماء الحب
بس الواحد لازم يعرف إن بنات الناس مش لعبــــة
لأن اللي بيحب بجد .. استحالة ينسي الحب دا مهما مر عليه من وقت
نفرض إن (س) حب (ص) .. و صرح ليها بالحب و هي بادلته الحب
دا يبقي دافع ليهم إنهم يبصوا قدام ..يبقوا ( حــاجة ) عشان يرتبطوا مع بعض
ممكن حبة رومانسية في النص بس مش أوي يعني
و برضه لازم يعرفوا الأهالي بالحب دا .. حتي لو كانوا صغيرين
بس مش معني انهم يحبوا بعض .. يسوئوا فيها بقي
خروجات و تليفونات و مقابلات و الكلام دا
حب في حدود الاصول
ما الناس زمان كانت بتحب
بس الحب زمان اختلف عن دلوقتي زي كل حاجة تانية
لازم كل واحد يشيل الأوهام و الحاجات الغريبة اللي في مخه
و يراعي ضميره في حبه اي كان بشرط يكون طاهر و برئ
أحب بس أختم بجملة
خلود الانسان يتعلق بحب الناس ليه و انهم يفضلوا فاكرينه
مش مجرد انه يفضل عايش 50 سنة و لا 100 و حتي 1000 سنة
لأنه لو توفي من غير ما حد حبه .. حيتمسح من الذاكرة
يعني 1000 سنة عايش و في ثانية اتنسي
الحب = الخلـود
شكرا يا طيف علي المناقشة و آسف إن طولت أكتر من اللازم
عموما الموضوع شيق و كبير جدا و يا ريت نوصل لأي استنتاج أو حل
و شكرا لكل اللي شارك برأيه