قهوتنا على الانترنت
ابحث عن :  
النتائج 1 إلى 5 من 5

الموضوع: سر فول المطاعم

  1. #1
    تاريخ التسجيل
    4 - 8 - 2009
    ساكن في
    البحر الاحمر
    المشاركات
    33
    النوع : انثيEgypt

    افتراضي سر فول المطاعم

    سر فول المطاعم عندى وبس وتحدى !!1 هديتى ليكم بمناسبة رمضان !!!





    شوفوا بأه والله العظيم وبلا مبالغة
    علشان بحبكم
    وعلشان كلنا ناس بسطاء والحمد لله
    فأنا مع مبدأ ::
    اللى تقدر تعمل حاجة ف بيتها وتكون نضيفة وتقدر توفر بيها لبيتها وتساعد جوزها او حتى باباها وتخفف عنو
    يبأه لااااااااااااااازم تعملها
    مش كدا ولا ايه ؟؟؟؟؟؟؟؟؟


    سمعاكم كلكم بتقولو : عليكى نور يا قمر ,, كلام جميل اوى
    وباقولكم : والله انتو اجمل يا حبايبى

    ندخل بأه ف الموضوع
    بإختصار ماما واختى كانو بيحكوا وبيتحاكوا بفول مطعم جمبهم
    قولتلهم : ليه دا كلو ... ما كل الناس بيعرفوا يدمسوا الفول ف البيت

    قالولى بأه ع السر
    اللى اختى عرفتو من الراجل صاحب المطعم بعد إلحااااااااااااااااااااح فظيع
    اصل اختى دى لحووووووووووووووووووووووو وووووووحة اوى
    وانا اول مرة احب اللح .. علشان جه بفايدة المرة دى
    ههههههههههه

    المهم بإختصار
    ماما قالتلى هى واختى :

    1_ انتى بتجيبى الفول ( حوالى نص كيلو فول تدميس من العطار ) تنقيه وتغسليه وتنقعيه من ساعة لـ 3 او 4 ساعات

    ( علشان يستوى بسرعة وتوفرى ف الغاز )





    ودى صورتو بعد النقع
    2_ بعد كدا بتحطيه فى الدماسة ( الفوالة ... او ذى ما بيقولوا عنها قِدرة الفول بتاعتك ولو معندكيس دماسة ممكن برضو تعمليه فى حلة بس ياريت تكون حلة ضيقة مش واسعة )
    وعليه مية وترفعيه على النار

    واول ما يغلى ,,, وطى النار عليه ( ممكن ف المرحلة دى تضيفى ع الفول جزرة مقطعة قطع علشان تتهرى مع الفول وتديلو لون طبيعى جميل
    بدل من اللون الكيميائى اللى بيضيفوه بعض المطاعم ع الفول علشان يدوله لون جميل والجزرة هتخلى لون الفول روووووووووووووووعة دا غير القيمة الغذائية )
    ومتغطيش الدماسة بغطاها ( اوعى ى ى ى ى ) علشان هتقعد تغلى وتشرشر عليها من برا وع البوتاجاز وهتبهدلك الدنيا
    حطى فوق الدماسة وهى ع النار ابريق او لبانة ( بتاعة اللبن دى ) المونيوم او استانلس يكون فيها مية
    علشان كل ما الفول يشرب المية بتاعتو وقبل ما ينشف تزوديه منها من وقت للتانى
    هتفضلى تعملى كدا لحد ما الفول يستوى على نار هادية

    3_ اول ما الفول يدخل على سِوا ( نقى معلقة رز ومعلقة عدس اصفر ( معلقتين مش مغرفتين ) واغسليهم وصفيهم كويس وضيفيهم ع الفول )
    وليكى حرية الإختيار ياتحطى رز وعدس يا إما تحطى الجزرة اللى اتكلمنا عنها ف البداية

    علشان الهدف من اى حاجة فيهم هو الحصول ع اللون الطوبى الجميييييل للفول
    وانا عن نفسى بافضل الرز والعدس ( علشان هما يشبهوا البقول ف الطعم )

    وارجووووووووووووووووووكم بلاش افتكاسات وواحدة تحط ع الفول وهو بيستوى طمطماية ولا بصلاية ولا لمونة
    طيب ما لما يستوى
    فى طرق كتييييييييييييرة ممكن تعمليه بيها

    4_خلاص بعد ربع ساعة او تلت ساعة لقيتى الرز والعدس امتزجوا مع الفول واستووا خاااااااااااالص والحمد لله

    جينا بأه لسر الأسرار بتاع المطاعم
    5_ هنا بأه هنحط اهم حاجة ودى اللى هتخلي الفول بتاعك ميفرقش اى حاجة عن فول المطعم بل هيكون احسن منو والله
    هاتى
    <<<< معلقتين دقيق >>>>

    اه والله معلقتين دقيق ( مش مغرفتين ركزى )
    انخلى الدقيق بمنخل ناعم او حتى بمصفاة سلك ( لحسن يكون فيه سوسة ولا هاموشة ولا شعراية طايرة من راس واحدة منكوشة .. هههههه )

    6_ دوبى معلقتين الدقيق بعد كدا فى نص كوباية ميه ( من كوبايات المية الإزاز اللى بتقدميهم مع الشاى فهمانى ؟؟؟ )
    لحد ما يمتزجوا كويس اوى ومايكونش فيهم حتت مكلكعة


    ركزى اوى معايا فى اللمسة الأخيرة دى ( علشان دى مهمة اوى )



    7_الكوباية اللى دوبتى فيها الدقيق تمسكيها بإيدك الشمال والمعلقة الخشب فى ايدك اليمين
    صبى مزيج الدقيق والمية واحدة واحدة ( تدريجياً ) على الفول و افضلى قلبى بالراحة بالمعلقة الخشب

    لحد ما يمتزج الخليط كله بالفول
    بس كدا
    سيبى الفول ياخد غلوتين تانى بس
    يعنى حسبة 3 دقايق وهيكون عندك احلى واطعم وانضف فول مدمس فى العالم





    وبالهنا والشفا



  2. #2
    تاريخ التسجيل
    7 - 3 - 2011
    ساكن في
    فى قلب اللى يحبنى
    المشاركات
    346
    النوع : انثيEgypt

  3. #3
    تاريخ التسجيل
    29 - 8 - 2010
    ساكن في
    بين الامل والرجاء
    المشاركات
    7,293
    مقالات المدونة
    1
    النوع : انثيEgypt الفريق المفضل  : الاهلي

    افتراضي

    سر خطير اول مره بسمع بيه

    تسلم ايدك ياقمر
    وسلامى لاختك اللحوحه اللى جابت لنا السر

    رب انى مسنى الضر وانت ارحم الراحمين

    البحث على جميع مواضيع العضو حرف مشتعل

  4. افتراضي

    ياااااااااااسلااااااااااا ام شهيتيييييييييييني عالفووووووووووول تسلم ايدك

  5. افتراضي

    شكرااااااااااا يا جميل

 

 

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

الكلمات الدلالية لهذا الموضوع

ضوابط المشاركة

  • مش هتقدر تضيف مواضيع جديده
  • مش هتقدر ترد على المواضيع
  • مش هتقدر ترفع ملفات
  • مش هتقدر تعدل مشاركاتك
  •  
جميع الحقوق محفوظة لمنتديات مصراوي كافيه 2010 ©