قومى يا امه شدى حيلك
واغسلى وشك بميه نيلك
اضحكى وزهزهى
وانشرى الحلو ف غسيلك
اطمنى مسيره حقك يجيلك
صحصحى خواتى يا امى
يكفى جمع واضرابات
اقفى يا امه لجل ما نشفى غليلك
لجل ما يطيب عليلك
لملمى عيالك تحت باطك
لجل ما ترجع شموسك
والنجوم تبان فى ليلك
حقك هتخديه يا امى
من حراميكى عويلك
قومى وابنى وعدلى
واى مايل اعدلى
طريق الخير يا امى هيكون سبيلك
من جوه قلبى يا امه بدعيلك
يحفظك ربنا ويديلك
ويجرى على لسانى
من تانى واغنيلك
يكفى حكاوى الالم
نفسى يامه احط راسى على صدرك
وانا اللى احكيلك
واقول غناوى الحب والاخلاص
واغنى لك مواويلك
وهتحمل عشان خاطرك
واكون اسدك واكون فيلك