يوميات شاب مصري

**لؤلؤة** · 30 - 8 - 2008, 12:54 PM

بتصحى من النوم... مش قبل الساعة واحدة طبعاً وقبل اى حاجة.. تمسك الموبايل بتاعك وتبدأ تشوف المسجات اللى جاتلك وانت نايم .. ومتحمل اوى تلاقى ماسج مكتوب فيها ( صباح جامد يا باشا.. انا والشلة مستنييك فى الكافيه اللى جنب الكلية.. وخصوصاً أنا...! تعالى بسرعة بقى).

بتقوم ... وتدخل الحمام...قصدى الباس روم... وتاخد الشاور بتاعك...وأول ما تخرج وقبل ما تحط لقمة فى بقك.... تمسك علبة السجاير وتولعلك سيجارة... تفتح الدولاب بتاعك.. وتبدأ تختار الطقم الجامد اللى هاتنزل بيه... كووووول جداً.. مش ناقص غير الجيل الجامد....اضرب شعرك يا معلم وامسك كشكول محاضراتك( لزوم التمثيل) فاهمنى طبعاً..!اجرى على الكلية...قصدى الكافيه اللى جنب الكلية...بتوصل والشلة بترحب بيك وهيه وهااا.... وصباح الفل يا مان...

شوف بقى يا معلم اليوم بيتقضى ازاى..؟

أولا تطلب فنجان النسكافيه ودا طبعاً الطلب المعتاد ...شربت طلبك يا معلم.. ابدأ بقى اقلع النضارة الجامدة ...

بتبص على الترابيزة اللى انت قاعد عليها تلاقى الجروب بيلعب لعبة الإعترافات بإزازة حاجة ساقعة... بتخش معاهم.. اللعبة طولت اوى زهقتوا..

مش كدا.. ممكن تغيروا اللعبة بأى حوار فكسان... او تلعبوا جوكر.. طبعاً طول الوقت دا الطلبات نازلة ترف على الترابيزة وادفع يا معلم ...أخ...

الساعة بقت 6... وكدا المحاضرات خلصت ولازم تروح عشان تغير هدومك وتنزل الكورس بتاع الساعة 7.. اللى انت مارحتوش ولا مرة وبتقضية فى سيبر النت اللى انت بتحبه.. واديك طول السنه على الحالة دى..

وطبعاً الإمتحانات قربت.. وأنا خايف يوم الإمتحان والورقة قدامك.. ما تعرفش تحل ولا حاجة وساعتها هتقول...

ايه النحس ده.. هو أنا السنه دى.. اصطبحت بوش ميين؟؟؟

**همسة ولاء** · 30 - 8 - 2008, 01:14 PM

ايه النحس ده.. هو أنا السنه دى.. اصطبحت بوش ميين؟؟؟

طبعا بوشه مهو الصبح بيشوف وشه في المراية

بلاش يتبلى على حد

تسلم الايادي

**ساندرا** · 30 - 8 - 2008, 03:16 PM

جزاكى الله خيرا حلو كتير الموضوع تسلم ايديكى

**لؤلؤة** · 30 - 8 - 2008, 05:50 PM

مرسي ليكم......

**Serag Magdy** · 30 - 8 - 2008, 06:27 PM

جامدة اخر حاجة والله يا لؤلؤة والله
بس مش كله كدة برده
في ناس بتفطر قبل ما تشرب السيجارة
تسلمي يا جميل ع اليوميات دي
ومستنين المزيد

**لؤلؤة** · 30 - 8 - 2008, 06:31 PM

ماشي يا عم سراج.. من عنيا

هو انتو لسة شفتوا حاجة!!

**طيف عابر** · 30 - 8 - 2008, 06:35 PM

تسلمي لؤلؤة على اليوميات الطريفة
حلوة كتير
تم نقله لقسم فرفشة

**لؤلؤة** · 30 - 8 - 2008, 07:12 PM

ماشي يا جمييل

**abdo389** · 2 - 9 - 2008, 12:41 PM

ايه الجمال ده بس انا كنت بحب اشرب شاى مش لازم نسكافيه

تسلمى على الموضوع الجامد ده

**لؤلؤة** · 2 - 9 - 2008, 04:06 PM

العفو يا قمر

الموضوع: يوميات شاب مصري

أدوات الموضوع

يوميات شاب مصري

معلومات الموضوع

الأعضاء الذين يشاهدون هذا الموضوع

الكلمات الدلالية لهذا الموضوع

ضوابط المشاركة