قهوتنا على الانترنت
ابحث عن :  
النتائج 1 إلى 3 من 3
  1. #1
    تاريخ التسجيل
    9 - 11 - 2007
    ساكن في
    ღ♥ღ الأسكندرية ღ♥ღ
    العمر
    33
    المشاركات
    2,459
    النوع : ذكر Egypt

    افتراضي الحياة سنة 2085 (موضوع عايز الحرق)

    بما انكم غاويين رومانسية وعجبكم موضوع قيس وليلى فى سنة2007 ... ايه رأيكم بقى بدل ما نجيب شخصيات من الماضى فى زماننا اننا نروح احنا للمستقبل ونحاول نتخيله ؟
    ياترى بكرة هايكون عامل ازاى فى ظل الظروف اللى احنا فيها دلوقت؟
    انا وصل لى ايميل من مدة كبيرة ساعدنى على تصور الموضوع واجابة الاسئلة دى وحبيت اشارككم فيه واعرف رأيكم هل فعلا ممكن نغير الصورة اللى هانشوفها بعد شوية ؟
    تعالوا نشوف:
    المكان :أحد أحياء القاهرة
    الزمان :يوم من أيام صيف عام 2085
    المشهد :حفيدة في سن المراهقة (12 سنة) تجلس مع جدتها(70 سنة)ويدور بينهما هذا الحوار
    الحفيدة :تيته ميرو إزيك..بقى لي زمان ماقعدتش معاكي
    الجدة :وهو أنا عارفة أتلم عليكي خالص.. ده أنا قاعدة زهقانة قوي ومش لاقية حاجة تسليني
    الحفيدة :ومابتفتحيش الدش ليه يا تيته
    الجدة :التليفزيون بقى ممل خالص مافيهوش غير سبعتلاف وخمسميت محطة بس!.وأنا كمان مابعرفش أغير المحطات
    الحفيدة :وإيه الحلاوة دي؟ حلو البادي اللي انتي لابساه ده..بس ده موضة قديمة قوي ياتيته
    الجدة :يا بنتي أنا ست دقة قديمة وبالبس زي ما جيلنا الصاعد اتعود وحسب التقاليد القديمة بتاعتنا
    الحفيدة :أيوه بس مش حاسة إنك مخنوقة وانتي لابساه؟
    الجدة :أبداً ده هو ده اللبس المحتشم اللي مفروض الكل يلبسه ويحافظ عليه..فين أيام زمان لما كنا نلبس البادي اللي مبين البطن والظهر بس، مع البنطلون السترتش الجلد…كانت حاجة آخر روشنة
    الحفيدة : ياه يا تيته.. ده انتوا كان ليكم تقاليد غريبة خالص
    الجدة : وهو انتي فاكرة إن أيامكم دي أيام؟ يا بنتي أيامكم دي ما يعلم بيها إلا ربنا .. فين أيام سنة 2007 هي الواحدة فينا كانت تستجري تشرب سيجارة البانجو ولا تسحب لها سطر بودرة قدام أبوها؟ طب ده الدنيا كانت تتقلب ساعتها وما تتعدلش ..أمال إيه .. كان فيه حاجة اسمها أخلاق
    الحفيدة : معقول يا تيته؟ للدرجة الفظيعة دي!!؟
    الجدة : أمال انتي فاكرة إيه .. وبعدين كانت الست من دول ما تلبسش اللبس الخليع بتاع اليومين دول..يعني الجيبة كان ما يقلش طولها عن شبر وربع .. وكانوا الستات يلبسوا فوقيها بلوزة باستمرار ..مش زي دلوقتي! حسبي الله ونعم الوكيل
    الحفيدة : يا خبر .. وإيه كمان ياتيته
    الجدة : حأقول لك إيه ولا إيه يعني خدي عندك مثلاً زمان كنا نسمع الطرب الأصيل لمطربين حقيقيين :مصطفى قمر وعمرو دياب وطبعاً كانت سيدة الغناء شاكيرا، وكانت الأغنية مدتها أكثر من دقيقتين متواصلين من الطرب الأصيل والموسيقى الهادية الراسية اللي تعمر النافوخ بصحيح كانوا مطربين روشين وآخر طحن، حسبي الله ونعم الوكيل
    الحفيدة : وبعدين ياتيته؟
    الجدة : وبعدين كنا نسمع على حاجة اسمها اسطوانات ليزر،ودي صحيح انقرضت، بس كان ليها طعم عن دلوقتي، يا سلام لما كنا نحطها في الووكمان ونعلقها في حزام البنطلون كده ونمشي في الشارع كده، كانت أيام جميلة.حسبي الله ونعم الوكيل
    الحفيدة : حكاويكى ممتعة قوي يا تيته .. ثانية واحدة بس لما أصحي سمسم صاحبي فى المدرسة لأنه بايت معايا في الأودة من امبارح ..أصل الإنسان الآلي بتاع الصحيان بايظ ولازم نصلحه النهاردة
    الجدة : طيب ياحبيبتي روحي
    (بعد عدة دقائق)
    الحفيدة : هااا يا تيته.. وبعدين؟
    الجدة : أحلى أيام بقى كانت أيام الدراسة، الفصل كان على أيامنا رايق وعدد التلاميذ فيه ما يزيدش عن ستين سبعين تلميذة، وكنا ساعتها بنعرف نفهم الدرس كويس مش زى دلوقتي وكانت الشوارع أيامها فاضية يعني كانت إشارة المرور تقعد ساعة إلا ربع بس لأن مصر كلها كان تعدادها 70 مليون مش أكثر، تخيلي بقى الروقان اللي كنا فيه؟ حسبي الله ونعم الوكيل
    الحفيدة : 70 مليون بس؟
    الجدة : أمال إيه .. عشان كده كانت كل حاجة رخيصة ، يعني مثلاً كيلو اللحمة يوم ما يضربه الدم كان يبقى بخمسة وعشرين جنيه أو بتلاتين جنيه، وكان أتخن جوز جزمة بـ 250 جنيه، وكان الواحد يقدر يشتري شقة تمليك بـ150 ألف جنيه بس..وكان الدولار بخمسة جنيه بس.. تخيلي بقى؟
    الحفيدة : ما هو علشان كده الجواز على أيامكم كان سهل خالص، إحنا بقى خلصنا من العُقد دي
    الجدة : أُمال إيه .. ده احنا الواحدة مننا كانت بمجرد ما توصل سن 17 سنة تبتدي تفكر في الجواز العرفى على طول، وما كانش عندنا الأفكار الغريبة اللي بتعملوها دلوقتي، أنا شخصياً شايفة إن ده أوفر شوية، ده احنا يا بنتي على أيامنا كان لا يمكن البنت تتأخر بره البيت عن الساعة أربعة الصبح، طب ده باباها كان ممكن ساعتها يخاصمها
    الحفيدة : ياي! ده انتوا كنتوا متزمتين خالص ياتيته
    الجدة : يا بنتي إحنا اتربينا على الأخلاق والفضيلة والعادات والتقاليد . يعنى كان أهل الفن محتشمين جداً وكانوا دايماً يطلعوا بالمايوهات البيكيني، والمذيعات كانوا يقعدوا جنب الضيف مش على ركبته زي دلوقتي...هيـ يـ يـ يـ ـه...الله يرحم دي أيام.. فكرتيني بالذي مضى ... حسبي الله ونعم الوكيل
    (تمسك الجدة بتليفون محمول في حجم علبة الكبريت)
    الحفيدة : ح تكلمي مين يا تيته؟
    الجدة : الحقيقة أنا كنت موصية الجزار على اتنين كيلو لحمة و اديته 600 دولار عربون وعايزة أطلبه أشوف إذا كانت اللحمة وصلت ولا لأ
    الحفيدة : (تنهض من مكانها) تشاو سي يو تيته
    الجدة : سي يو
    (وبعد مرور عدة ساعات انتابت الجدة خلالها غيبوبة بسبب الشيخوخة و في المساء دار هذا الحوار )

    الجدة : إنتي كنتي فين يا فتفت؟
    الحفيدة : أصل إحنا أخدنا الولد من الحضانة
    الجدة : ولد !! ولد إيه اللي أخدتوه من الحضانة؟
    الحفيدة : آه صحيح أنا نسيت أقول لك .. أصل أنا جبت ولد من سمسم صاحبي
    الجدة : يا بنتي مستعجلين على إيه مش لما تتجوزوا ؟ حسبي الله ونعم الوكيل
    الحفيدة : يا سلام عليكي يا تيته.. إنتي عليك تحكيمات غريبة..طيب إيه اللي يمنع نخلف من غير جواز ؟ أنا شخصياً عملتها ونفعت
    الجدة : مشكلتي إني ما باعرفش أزعل منك يا فتفت ياعكروتة ..وسميتوا المحروس إيه بقى
    الحفيدة : سميناه : دوت كوم
    الجدة : نعم .. دوت كوم؟ نظام هاي تك بقى؟ يعني لما تعوزي تنادي له تدوسي (إنتر) ولا إيه بالضبط ؟
    الحفيدة : ها ها ها ها .. إيه الخفة دي يا تيته .. والله فكرة .. لما أعوز أنده له أدوس إنتر .. ولما أحب أقول له روح أودتك أدوس ( الت + اف4 )
    الجدة : وأخدتوه من الحضانة وديتوه فين بقى؟
    الحفيدة : وديناه النادي الصهيوني بتاع الحي
    الجدة : النادي الصهيوني بتاع الحي؟
    الحفيدة: أيوه .. ده نادي جميل معمول برعاية كبار رجال الأعمال .. وتحت رعاية وزارة الزراعة وده بيعلم الأطفال حاجات ظريفة خالص ومصاريفه رخيصة جداً وبعدين الولد الكويس ممكن يبعتوه يكمل تعليمه في إسرائيل على نفقة وزارة الزراعة أصل (ميدو يوسف والي)وزير الزراعة ده راجل متفتح قوي ..هافتح لك التليفزيون يا تيته عشان تشوفي نشرة الأخبار؟

    (الحفيدة تضغط الريموت كنترول لنرى شاشة كبيرة بطول وعرض حائط الغرفة، وتظهر صورة مذيعة مصحوباً بلقطات للأنباء )
    المذيعة : هاي شلة ! إليكم عناوين الأخبار:
    -أمريكا ترصد 25 مليار دولار لرأس تامر بن محمد بن أسامة بن لادن المتهم الأول في تفجير قصر السفير الأمريكي في أفغانستان
    -واشنطن تتهم ليبيا بتفجير سفينة فضاء فوق كوكب المريخ
    -وزير الاقتصاد د. فريد يوسف بطرس غالي يصرّح إعدام الفقراء هو الحل لخروجنا من عنق الزجاجة
    -موافقة مجلس الشعب أخيرا على خصخصة معبد الكرنك

    أخبار عربية
    -زهوة ياسر عرفات تطالب بانسحاب إسرائيل حتى حدود عام 2030، وإعلان الدولة الفلسطينية في مايو المقبل
    -إسرائيل ترفض الإنسحاب من البصرة إلا بعد ضمان أمن مستوطناتها في بغداد
    -اشتباكات وتبادل لإطلاق النار على الحدود الإسرائيلية المغربية

    أخبار الفن
    -زفاف المطربة الشحروروة صباح على حفيد الفنان الراحل راغب علامة
    -رئيسة قطاع الإنتاج لم يستقر بعد على بطلة فوازير رمضان ويعقد إجتماع مع السيدة توتي محمد صفوت الشريف وزيرة الإعلام الجديدة لمناقشة هذه القضية الحساسة
    -الفنان محمد هنيدي يهاجم نجوم الكوميديا الجدد

    المذيعة :دى كل اخبارنا النهاردة ..تشاااااااااااااااااااااا ااااااااو

    الجدة : لأ بقى حسبي الله ونعم الوكيل فيكم فعلا(يغمى عليها)
    الحفيدة : تيته..تيته ..إيه دا ؟.. دي ماتت ..بلا نيله
    ودلوقت بعد مادوت كوم راح النادى الصهيونى (ربنا يكرمه ونشوفه فى جماعة تل ابيب) وتيتا ميرو ماتت (ربنا يرحمها ويفجر اللغم اللى تحت راسها) تفتكروا طبقا للأوضاع اللى شايفينها حوالينا الوضع فى المستقبل هايتغير كتير عن الموقف اللى شايفينه قدامنا؟؟
    وبالشفااااااا
    لاتعتمد على الصديق فهو نادر
    ولاتعتمد على الحبيب فهو غادر
    ولكن
    اعتمد على الله فهو قاااااااااادر


    البحث على جميع مواضيع العضو mido3d

  2. #2

    افتراضي رد: الحياة سنة 2085 (موضوع عايز الحرق)

    ههههههههههه جميل جدا

  3. #3
    تاريخ التسجيل
    9 - 11 - 2007
    ساكن في
    ღ♥ღ الأسكندرية ღ♥ღ
    العمر
    33
    المشاركات
    2,459
    النوع : ذكر Egypt

    افتراضي رد: الحياة سنة 2085 (موضوع عايز الحرق)

    شكرا علي المرور
    لاتعتمد على الصديق فهو نادر
    ولاتعتمد على الحبيب فهو غادر
    ولكن
    اعتمد على الله فهو قاااااااااادر


    البحث على جميع مواضيع العضو mido3d

 

 

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المواضيع المتشابهه

  1. الموضوع المميز - العضو المميز - المشرف المميز
    بواسطة jewel_lowis في المنتدى اشعار وخواطر
    مشاركات: 1
    آخر مشاركة: 1 - 5 - 2009, 08:10 AM
  2. يـــــوم من أيـــام سنــــه 2085
    بواسطة cocopitt في المنتدى خمسة فرفشة
    مشاركات: 10
    آخر مشاركة: 3 - 1 - 2009, 08:52 PM
  3. حوار بين بنت وجدتها سنه 2085
    بواسطة MagMan في المنتدى خمسة فرفشة
    مشاركات: 5
    آخر مشاركة: 28 - 9 - 2008, 06:42 AM
  4. سنه2085
    بواسطة mido3d في المنتدى خمسة فرفشة
    مشاركات: 2
    آخر مشاركة: 9 - 11 - 2007, 08:06 PM

الكلمات الدلالية لهذا الموضوع

ضوابط المشاركة

  • مش هتقدر تضيف مواضيع جديده
  • مش هتقدر ترد على المواضيع
  • مش هتقدر ترفع ملفات
  • مش هتقدر تعدل مشاركاتك
  •  
جميع الحقوق محفوظة لمنتديات مصراوي كافيه 2010 ©