عايزه اتجوز

[jewel_lowis]

النهارده بقى جيبالكم

مغامرات بنوته عسوله مع ال..............

ولا بلاش احرق الاحداث


بطلتنا اسمها غاده

وقبل ماتحكى حكايتها قالت

شوفوا بقه ..الموضوع ده أنا عاملاه عشان أفضفض فيه بدل ما أكلم نفسي ..لأني

من ساعة ما اتخرجت و بدأ يجيلي عرسان ..و بما إني ماليش أصحاب كتير أتكلم معاهم ..

لقيت نفسي ساعات كتيره باتكلم مع نفسي ..أتناااقش و أتخااانق في الأول جوه أودتي

و بعدين لقيت العملية وسعت مني و بدأت أكلم نفسي في المواصلات كمان ..

فقلت بدل ما العملية تستفحل معايا و يدخلوني السراية و يلبسوني القميص أعملي بلوج أتكلم فيه مع نفسي و معاكم ..

على الأقل ما فيش حد هييجي يشحنني ع الخانكة

تمام؟..فهمتوا ..يعني أنا مش عاملاه عشان أشتكي لحد حالي ..لأن الشكوى لغير الله مذلة ..

و مهما أشتكيت لطوب الأرض ..فالمستقبل بيد الله و اللي عايزة ربنا هايكون..

و أنا ما أقدرش أشتكي لأن ده فيه شبهة إعتراض على إرادة الله ..ربنا يحفظنا

الموضوع ان انا ماليش حد أحكيله فهاحكيلكوا و اطلع الكلام اللي جوايا

ياللا نبتدي

سموا كده و خليكوا معايا واحدة واحدة...خلينا نتفق الأول ان موضوع الجواز و العرسان و تأخر الجواز ده موضوع حساس جدا..وصعب جدا انكوا تلاقوا حد بيتكلم فيه بصراحة..خصوصا بالنسبة للبنات....لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش ..يا إما على انها مسروعة ع الجواز ..يا إما على انها بارت و مش لاقيه حد يتجوزها..عشان كده تلاقوا بنات كتير بتقول ..جواز ايه بلا نيلة ..يعني هم اللي اتجوزوا كانوا خدوا ايه...انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش..أنا ما بافكرش في الجواز دلوقتي لما أبني مستقبلي ..و الجملة المستهلكة في كل الأفلام العربية .."لما أحقق ذاتي ""...مش عارفه ايه ذاتها دي و تحققها ازاي يعني

يمكن فيه بنات كتير ليهم طموح في دراستهم و في شغلهم ..لكن أتحدي ان أي واحدة فيهم مايكونش طموحها الأول انها تبقى زوجه ..على الأقل لأن دي الطريقة الوحيده اللي تخليها تبقى أم

نتفق بقه على أسس تانية مهمة ....عدد البنات في مصر أكبر من عدد الرجاله
دي نقطة أساسية مش عايزة أي حد يناقشني فيها ( البلوج ده مش ديمقراطي على فكرة) ..و سيبوكوا بقه من إحصائيات الحكومة اللي بتقولك عدد الإتنين زي بعض ..لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45 ..و هما لا يمكن يزودوها عن 38..أنا ليا واحد صاحب بابا قاللي ممنوع يزيعوا ان الحرارة فوق ال42
عشان السياحة ماتنضربش و السياح مايهربوش

موضوع نسبة الإناث للذكور برده فيها لعب بالطريقة دي..ليه بقه النسبة أكبر؟ أقولكم

موضوع الستات اللي بيقعدوا يخلفوا عشان يجيبوا الولد..يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...و تفضل الست تخلف تخلف عشان البأف جوزها يجيله الواد..يجيبوا يعمل بيه ايه؟ ماتعرفش ..و بيجي في الآخر خايب و نايب و يقعدوا يدلعوا فيه لما يطلع فسدان و يضيعهلم اللي وراهم و اللي قدامهم و اللي جنبهم كمان...ما علينا ده موضوع تاني..بس أي حد بيدرس أو درس في أي كلية في جامعات مصر هيلاحظ ان عدد البنات في أي كلية أكبر من عدد الولاد ..في كليتي مثلا كانوا تلتين العدد بنات و التلت ولاد ..يعني الضعف

نقطة تانية ..الرجالة بقوا حاسين بنفسهم و بيتكبروا على خلق الله من البنات ( يقعدلهم في عينهم و عافيتهم يا رب ) و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم ..الله يخرب بيوتكم طب بص لنفسك يا خويا في المرايه الأول ..طب بلاش بيقولوا الراجل مايعيبوش الا جيبه ..طب شبرقنا كده و ادخل في ايدك انشالله علبة ملبس ..ألا لأ البعيد هو و امه يروحوا يشوفوا العروسة الغلبانه اللي أهلها صارفين عليها الشئ الفلاني و مكلفين قعدة التعارف دي شئ و شويات ..رايحين إيد ورا و إيد قدام ..و البت مافيهاش أي عيب و يقولولكم ..لأ أصلها مش شبه نيللي كريم قوي ..دي قالبه شوية على نجلاء فتحي و انا مابحبش النوع ده ..تقولش حسين فهمي رايح يتقدم للبت

لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية ..يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس..دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم...طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟...أنا مش طارق يا طنط و أنا متهيألي كده حضرتك مش خالتي ...صحيح؟ معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا

طبعا الواد يا إما بيطلع يجري ..يا إما حد من صحابه بياخد باله م الكمين اللي وقع فيه ويجي ينقذه على أساس في حد عايزة و كده

طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات ..و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو..و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات

الكلام ده كله على فكرة مش المفروض تضحكوا عليه..و الله البنات دول غلابة ..زمان ما كانش مطلوب من أي بنت غير انها تحترم نفسها و تقعد في بيت أبوها و تستنا العدل اللي بيكون في الغالب من إختيار أهلها
دلوقتي الكورة بقت في ملعب البنات ..يعني لازم تخرج و تشتغل و تروح أفراح و تزور أصحابها لأن مسؤلية إحضار عريس بقت ملقاه على عاتقها بالكامل ..أنا أعرف حالات كتيرة أهل البنات بيتخانقوا معاهم خناقات لرب السما عشان يخرجوا و يشتغلوا يا إما عمرهم ما هيتجوزوا .. و م الجهة التانية المجتمع في حالات كتير و خصوصا خارج القاهرة و الأسكندرية مابيرحمش أي بنت تخرج مع راجل عشان تتعرف عليه و يمكن يبقى فيه نصيب ..ده غير ان الراجل نفسه في الغالب ما بيرضاش بيها و يقولك عايز واحدة خام لا خرجت و لا اتكلمت مع حد غيري

طب بذمتكوا البنات يعملوا ايه...ده غير العداد اللي بيعد من أول ماتتخرج من الجامعه ...يعني البنت تعتبر بدأت تعنس من أول ما يعدي عليها سنتين أو تلاتة متخرجه و لسه ماتخطبتش
أنا شخصيا بدأت أحس اني هاعنس من أول ما كملت 23 سنة..طب نعمل ايه

بصراحة المجتمع المنيل اللي احنا عايشين فيه و اللي بيقيم البنت بجوازتها واللي تتجوز بسرعة تبقة شاطرة واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها و يتقال عليه مفتح و مدقدق..و يبقى معدي الأربعين و من حقه يتجوز في أي وقت انشالله واحده عندها 18 سنة

المجتمع ده ظااالم و مفتري ..و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها

خليكوا معايا بقه ..م المرة الجايه كل بوست هاحكيلكم على بلوة م البلاوي اللي اتقدمولي ..عشان تعرفوا احنا بنستحمل أد إيه

سلام

يتبع

[-love-]

موضوع جميل
تسلم الايادى

[وليد الاسلام]

موضوع ججميل بس بختلف معاكى فى نقطة ومش عارف بتقوليها بهزار او تهكم او جد هيا ان مطلبوب من البنت تخرج للافراح والحفلات علشان تلاقى عريس مش للدرجة دى البنات مش لاقيين عرسان

[jewel_lowis]

موضوع جميل
تسلم الايادى


شكرا يالوف على المرور

[jewel_lowis]

موضوع جميل بس بختلف معاكى فى نقطة ومش عارف بتقوليها بهزار او تهكم او جد هيا ان مطلبوب من البنت تخرج للافراح والحفلات علشان تلاقى عريس مش للدرجة دى البنات مش لاقيين عرسان

اولا:
شكرا ياوليد على مرورك
ثانيا:
ايون
البنات للدرجه دى مش لاقين عرسان ولو واحده انكرت يبقى بدارى وبس
وايون
البنات مش مطلوب منهم هما اصلا بقوا خلاص بيخرجو يرحو الافراح يدورو على عرسان منهم لنفسهم
وبيحصل وبشوفه

وتابعنا فى باقى الحلقات

ده انت هاتشوف وتسمع حاجات

عجب

[حبيبة]

اه والله يا انجى عندك حق وللدرجاتى وأكتر يا زيد وفعلا اسمع اسمع اللي هتكمله انجى بجد عجب زى ماهي ما بتقول
ده انا هتم العشرين أهو ومرعووووووبة
خلاص انا في سنة تالتة ادعي كده ربنا يرزقنى بعريس كويس اتخطب له قبل ما اتخرج ونجوز بعد ماتخرج عشان محسش بالعنوسة
بس علي فكرة السبب مش في الشباب لان الشباب مالهاش دعوة
المشكلة تكمن في قلة الماديات والبطالة اللي بيعانى منها الشباب حتى لو اشتغلوا هيخدوا كام يعنى
يالا ربنا يستر ويوفق الجميع
وميرسي يا انجى عالتوبيك الهايل ده

[وليد الاسلام]

وليه متكونشى المشكلة فى البنات ومواصفاتهم واحلامهم الوردية زيادةى الى مبتتحققشى غير فى المنام وكذلك بعض الشباب ممكن يكون مقتدر ومع ذلك يقلك مبفكرشى طيب مستنى ايه قال النبى صلى الله عليه وسلم في الصحيحين وغيرهما عن ابن مسعود رضي الله عنه قال قال رسول الله صلى الله عليه وسلم { يا معشر الشباب من استطاع منكم الباءة فليتزوج فإنه أغض للبصر وأحصن للفرج , ومن لم يستطع فعليه بالصوم فإنه له وجاء } ده كلام النبى مستنى ايه يا مقتدر عف دينك وطبق سنة الله ورسوله وعف بنت تكون سبب سعادتها وهى سبب سعادتك وراحتك وجعل بينكم مودة ورحمة

[MagMan]

الموضوع تمام ...

انتي جريئه جدا جدا ... لان اول واحده في حياتي اشوفها بتتكلم بصفه عامعه وبصفه خاصه عن الحاجات دي ...

وغير كده انتي طريقتك في الكتابه والحوار جميله جدا ...

ثالثا يا ستي انا موجود ممكن اتجوزك بس علي شروط ...
تجبيلي عربيه وفيلا ومليون دولار .... هههههههه ... وعروسه ..... هههههه

اما بقي بالنسبه لللمشكله ...

فالبنت بتبص لغيرها من حولها من البنات ... مش عارفين ان كل ده ... نصيب ومكتوب عن الله ...

مش عارفين ان اكبر نسبه فشل في الجواز بسب ان البنت بتستعجل في اختيار عريسها لانها طبعا بتقول ده عريس والسلام ...

وطبعا بتكون مستعجله علي الجواز ... متعرفيش ليه ( علشان هي بتحب الجواز زاته ... ولا علشان الناس متقولشي دي عنسه ... ولا لانها بقت فاضيه ومش لاقيه حاجه تشغل بالها فيها ...)

وطبعا لو البنت هتتجوز جواز تقليدي يبقي تتشرط بقي هي واهلاها ...

اهلها يشتغلو خطبه ويقعدو يقولو بنت فلان جالها مش عارف اد ايه دهب وعدد كام حجره ومش عارف عمل الفرح فين ... وجاب مين في الفرح ...

اجنا بقي عوزين كل اللي البنت بنت فلان جالها وزياده عليهم الضعف ...

ويا حبت عيني بكون العريس اللي متقدملها يدوبك شغال بقاله سنتسن تلاته ومرتبه ميعديش 200 جنيه ...

اكيد ده حرام طبعا ...

امها تيجي ترد عليك تقوك بنتي متعشي في مستوي اقل من المستوي اللي هيا فيه ... واساسا تلاقي الطبقين اللي هما بياكل فيهم العريس شحتينهم من عند اي عروسه متجوزه جمبيهم ...

اكيد البنات دلوقتي عوزين يضربوني ...

وطبع الراجل اللي بيدور علي عروسه ...

اول حاجه بيدور عليه بنت كده ايه من الجنه مواصفتها كلاتي ....

الجمال ... زيها زي أنجلينا جولي .. او زيها زي الصور بتاعه مريومه في توقيعاتها ...

تكون كامله الاونوثه ....

ابوها يكون راجل مليونير علشان يخف عليا من المصاريف ...

عمرها معرفت شاب قبلي ...

تعليمها عالي علشان تكون مثقفه ... بغض النظر اساسا هو خريج ايه ..

اخر حاجه بيضور عليه هي محترمه ولا متدينه ولا ايه ...

ويدخل البيت منهنا يقلوهم انا محلتيش حاجه لا هجيب اوض ولا دهب ولا هعمل فرح ...

فالمشكله يا جماعه والله لا في البنت ولا في الولد المشكله في الاهل والعادات والتقاليد الغريبه ...

طولت عليكم ...

كل سنه وانتم طيبون ...

ومتابعين معاكي انوجججج

[jewel_lowis]

بس علي فكرة السبب مش في الشباب لان الشباب مالهاش دعوة
المشكلة تكمن في قلة الماديات والبطالة اللي بيعانى منها الشباب حتى لو اشتغلوا هيخدوا كام يعنى
يالا ربنا يستر ويوفق الجميع
وميرسي يا انجى عالتوبيك الهايل ده


عندك حق ياحبيبه
وشكرا للتعليق والمرور
وتابعينا

[jewel_lowis]

وليه متكونشى المشكلة فى البنات ومواصفاتهم واحلامهم الوردية زيادةى الى مبتتحققشى غير فى المنام وكذلك بعض الشباب ممكن يكون مقتدر ومع ذلك يقلك مبفكرشى طيب مستنى ايه

بص ياوليد صوابعك مش زى بعضها
وعاوزه اقولك حاجه
ورحمه الغاليين
لو انت كنت بنت كنت هاتحس بالمعاناه بجد
انا عندى اصحاب
هايموتو
هايموتو
عارف يعنى ايه
ومش معيوبين على فكره

اما بالنسبه للشباب المقتدر
ده معظمه بيقول انا اتمتع بحياتى الاول من غير خنقه
لان قليل اوى من الشباب يقدر يجيب شقه ويفرشها
والشبكه ومصاريف الزواج
مبالغ طائله
وطبعا انت عندك حق
المفروض الى جاهز يجوز وينقذ مايمكن انقاذه من البنات يجوز بسرعه والله ماحد معترض


شكرا للمشاركه

وتابعنا