حكاية أحمد وضحى

[نمنمة المسلمة]

جميله جدا
متابعه معاكى لسه
متتاخريش

وادي حلقة جديدة ياقمر

[ROSE WHISPER]

يسلموا كتير حكايه حلوه ومتابعه معك

[حبيبة]

جميلة أوى يا نمنمة انا مستنياكى

[نمنمة المسلمة]

يسلموا كتير حكايه حلوه ومتابعه معك

تسلمي داليا ومنورة

[نمنمة المسلمة]

جميلة أوى يا نمنمة انا مستنياكى

مشكورة حبيبة وانا بكمل اهو منورة ياقمر

[jewel_lowis]

تسلمى ياقمر على الحلقه
متابعه معاكى

[نمنمة المسلمة]

تسلمى ياقمر على الحلقه
متابعه معاكى

مشكورة إنجي للمتابعة منورة حبيبتي

[نمنمة المسلمة]

الحلقة الحادية عشرة







وراح أحمد اتقدم لوالد ضحى وضحى كانت كتيييير مطمناه عن والدها وانه مش هيقف قصادهم ان شاء الله ولما راح أحمد اتكلم عن نفسه بصراحة مع والد ضحى وحكاله انه لوحده ومفيش حد من أهله هيساعده وقاله كل حاجة عن شغله بصراحة وقله كمان انه مش يملك شقة ولا أي مقومات دلوقت بس هو طالب الموافقة وهو إن شاء الله هيعمل حاجة كويسة

والد ضحى احترم أحمد جدا لأنه اتكلم معاه بكل صراحة وقال لضحى:

-بصي يابنتي انا مش رافضه هو واضح انه انسان كويس جدا كفاية انه اتكلم معايا بصراحة لكن انا معترض على ظروفه لأنها متنفعش تفتح بيت دلوقت

ضحى: بابا انا هقف جمبه لغاية ما يعمل حاجة ونفتح بيت سوا مش لازم يجيلي عريس جاهز عشان اوافق فورا ويبقا فرصة ماهو العريس الجاهز كان موجود قدامي وانا اللي سبته وبرضه كنتوا بتقولولي ده فرصه يابابا انا اللي هعيش معاه وانا اللي هستحمله في حلوه ومره محدش هيشاركني أي شيء ومينفعش اني اتجوز واحد لمجرد انه فرصة مش أكتر أرجوك يابابا سبني أدخل التجربة



والد ضحى مكانش مقتنع نهائي بالكلام ده وكان رافض الموضوع وضحى كلمت أحمد وسألته هو كده خلاص هيسبها ومش هيفكر يتقدم تاني قلها لا طبعا عمري ما هسيبك وهتقدم مرة واتنين وتلاتة وعشرة

واتكلمت ضحى مع والدتها وقالتلها انها مرتحااله وعايزة تكمل معاه بقية حياتها هي عارفة ان ظروفه صعبه بس مفيش حاجة بتفضل على حالها وطلبت منها تقف جمبها

ومن الناحية التانية أحمد فكر يعمل ايه عشان والد ضحى يوافق عليه ماهو لازم يلاقي حل ويلاقي حد يقف جمبهم هو وضحى

ففكر يروح لزميلة والدة ضحى في الشغل خصوصا إنها تعرفه كويس اوي وبتعزه كمان وراح فعلا وطلب منها تقف جمبه هو وضحى وبالفعل كلمت والد ضحى وراحت مع أحمد لوالد ضحى عشان يتفقوا على كل حاجة

وبعد فترة من الخوف والحزن عاشتهم ضحى وافق والدها مبدأيا على الإرتباط بس اشترط على أحمد شرط صعب أوي قاله طوال فترة الخطوبة مفيش دخول وطلوع كل شوية ومفيش انك تيجي البيت كمان معنديش الكلام ده

وأحمد مع إنه عارف ان فترة الخطوبة ممكن تطول سنين وسنين وافق وكان هيتحمل عشان خاطر ضحى أي شيء واتفقوا مبدأيا لكنه قال لأحمد :

بص ياأحمد يابني انا استقبلتلك لوحدك وسمعت منك كل ظروفك لأن ده العادي انك تيجي الأول لوحدك لكن مفيش خطوبة ولا أي حاجة من دي وهعتبر الكلام ده كأن لم يكن لو أهلك مجوش هنا عشان يخطبوها معاك رسمي

-أحمد طمن عمه وقاله متقلقش هجبهم طبعا منا عارف الأصول برضه بس حضرتك انا حكيتلك على كل ظروفي وقلتلك إن والدي ووالدتي منفصلين فأنا هجيب والدي ومراته الأول وبعدين في مرة تانية هجيب والدتي معايا واجي

واتفقوا على الكلام ده وكل حاجة أصبحت واضحة لكن في عقبة دلوقت قدام أحمد وهي ازاي هيقول لأهله وهو عارف انهم مش موافقين على الخطوة دي دلوقت وشايفين انها لسة بدري عليها شوية وكمان مرات أبوه ده مش بترتاح لضحى طب هيعمل ايه ؟؟؟

راح أحمد لوالده وحكاله وسمعتهم مرات أبوه بالصدفة واتفجأت بالكلام ده وطبعا ثارت ثورتها عليه وو...

-إنت ازاي يااحمد تروح تعلم التصرف ده من دماغك كده ازاي؟؟؟؟ ازاي تروح تتقدم دلوقت وانت عارف انك لسة متثبتش في شغلك حتى ولسة قداااامك كتييييير اوي على ما تعمل حاجة طب خلاص مدام عملت الموقف ده يبقا انت تتصرف لوحدك وتعمل بقا كل حاجة لنفسك متطلبش مننا اننا نساعدك

أحمد : أنا اصلا كنت عارف من الاول انكو مش هتساعدوني في شيء انا بطلب منكو دلوقت انكو تيجو معايا لوالد ضحى عشان تخطبوهالي رسمي ولا ده كمان مش هتعملوه

والد أحمد :لا يابني انت ازاي تقول كده طبعا جايين



وراحوا لوالد ضحى فعلا ووضحوا كل حاجة لوالدها واتفقوا على كل شيء وحددوا معاد الخطوبة بس طبعا غصبن عن مرات أبوه ...........الود ودها لو كانت الجوازة اتفركشت أًصلها مش مصدقة إن كلامها طلع غلط ما علينا تعالوا نشوف أحمد وضحى عملوا إيه عشان الخطوبة

فضل أحمد كل ما يقبض يدي مبلغ كبير شوية من القبض لضحى عشان تحوشه معاها عشان يشتروا الدبل بتاعتهم وسعادتهم ببعض كانت فوق الوصف وكل اللي حواليهم كانوا فرحانين بيهم وفي نفس الوقت مش مصدقين إن قصة حبهم نجحت برغم كل الصعوبات وكانوا بيدعولهم ربنا يوفقهم

وضحى قالت لأحمد انها مش عاوزة شبكة ولا كلام من ده هي كل اللي عوزاه دبلة صغيرة تقول للدنيا كلها إن ده خطيبي وحبيبي يعني مش هنجيب أكترمن دبلتين ياأحمد متفقين

أحمد : اللي تشوفيه ياضحى والله العظيم انا نفسي اجبلك الدنيا بحالها وأسعدك وافرحك بس انتي عارفة الظروف بس اوعدك قدام هجبلك كل اللي نفسك فيه ان شاء الله

ضحى: انا مش بتمنى من الدنيا دي كلها غيرك إنت ياأحمد انا بجد دلوقت بندم على كل لحظة من عمري فاتت وانت مكنتش معايا فيها

أحمد : ربنا يخليكي ليا ياضحى وتفضلي جمبي طوووول العمر



وكملوا مبلغ كويس كده وراحوا اشتروا دبلتين حلوين وأحمد جاب لضحى محبس صغير ورقيق كده أي نعم هما في عين الناس مش كتير طبعا لكن كانوا في عين ضحى بالدنيا وما فيها وكانوا فرحانين جدا جدا

وجه معاد الخطوبة وكان أجمل يوم في حياتهم كلها لقوا الدنيا كلها كانت فرحانة معاهم وعملوا خطوبة صغيرة كده في البيت وخرجوا اتفسحوا وبقوا طول الوقت مش مصدقين اللي حصل ده كله وانهم دلوقت اتخطبوا وبسرعة الحمد لله وإنهم مع بعض دلوقت بس اللي كان مأزمهم شويةانهم برضه مش هيقدروا يخرجوا كده قدام الكل ولا حتى أحمد هيجي البيت لكن كانوا واثقين في ربنا جداااا جدااا وانه هيديهم على أد نيتهم ولأن نيتهم كانت خير من البداية ربنا وفقهم وووو....



توتة توتة مخلصتش الحدوتة ونكمل المرة الجاية

[نمنمة المسلمة]

الحلقة الثانية عشر









تاني يوم والد ضحى قالهم انه سمع عن شقق المحافظة وقالهم روحوا قدموا فيها بسرعة جايز ربنا يكرمكم بس خلوا بالكوا لازم تكونوا متجوزين عشان تقدموا فيها يعني لازم كتب كتاب

ضحى وأحمد سمعوا الكلام ده من هنا وطاااااروا من الفرحة ياترى حلمهم هيتحقق بالسرعة دي مش ممكن

المهم راح أحمد سأل عن الشقق وعرف الشروط وابتدوا يفكروا هيعملوا ايه وهينفذوا ازاي الكلام ده وازاي ممكن يكتبوا كتابهم دلوقت وكمان ازاي والد ضحى هيقتنع انهم يكتبوا الكتاب دلوقتي

وراح أحمد لوالد ضحى عشان يتناقشوا في الحكاية دي وقاله على شروط شقق المحافظة فوالد ضحى قله خلاص يابني عايز تكتب الكتاب يبقا لازم تمضي ايصال أمانة بمبلغ يعادل قيمة القايمة بتاعة العفش

فأحمد قاله فوراً وبدون تردد انا موافق ياعمي على أي حاجة تطلبها مني وهمضي على اللي حضرتك تؤمر بيه

ومضى أحمد على الوصل وبدأوا يجهزوا لكتب الكتاب فوراً وتخيلوا أحمد وضحى اتكتب كتابهم بعد ما اتخطبوا بشهر واحد حاجة مش معقولة فعلا بعد ما كانوا بيقولوا يارب بس دبلتين بقا كتب كتاب يااااااااه ربنا ده كرييييييييييم اوي اوي اوي فوق تخيل البشر كمان

بس بعد كتب الكتاب خدوا القسيمة وراحوا عشان يحجزوا الشقة طبعا وكالعادة بتاعة الحكومة بتاعتنا وقفولهم الموضوع عشان ناقص كلمة على الورقة يااااااااااادي الغلب بتاع الشباب

ضحي واحمد جالهم احباط شوية لكن سرعان ما زال كفاية انهم مع بعض دلوقت وضحى اقترحت على أحمد اقتراح انهم يسكنوا في شقة ايجار جديد وواحدة واحدة يبدأوا يفكروا يعملوا حاجة طبعا أحمد رفض في الأول عشان مش عاوز يبهدل ضحى معاه لكن بعد التدوير على أكتر من حل لقى ان مفيش غير الحل ده وابتدوا يحوشوا سوا وجاب أحمد وضحى عفشهم وأجروا شقة لذيذة أوي ودمها خفيف وعلى أدهم وبدأوا حياتهم مع بعض بعد سنة ونص من الخطوبة كانوا متجوزين وفرحهم كان تحفةةةةةةةة حكوا عنه كل اصحابهم وقرايبهم وعاشوا أجمل حياة مع بعض وأحمد كان بيحاول يعمل كل حاجة عشان يخلي ضحى دايما فرحانة وميشوفش مرة واحدة دمعة في عينيها وضحى برضه كانت بتعمل كل اللي في ايديها عشان تسعد أحمد ربنا يهنيهم ويباركلهم

لسة دي مش النهاية كده

لو عجبتكوا القصة ممكن يكون ليها حلقات تانية بس هتبقا حلقات يوميات أحمد وضحى بعد الزواج برضه من تأليفي تابعونا على مصراوي كافيه مش هتقدروا تغيروا المنتدى

[حبيبة]

أوكى احنا معاكى ومستنيين الباقي
تسلمى يا نمنمة يارب