صلاح جاهين ...حياته واعماله ..!!

[احمد الصباغ]

عجبى
بيعجبنى جدا الفنان الكبير صلاح جاهين واحب جميع اعماله خاصة الرباعيات والليلة الكبيرة
سلمت يداك ومنتظرين المزيد

[كابوس الحرامية]

شرفت بمرور حضرتك وردك اللى اكيد نورني ونور موضوعي سوف اوفيكم بالمزيد انشالله

[jewel_lowis]

لو فيه سلام في الأرض وطمان وأمن
لو كان مفيش ولا فقر ولا خوف جبن
لو يملك الانسان مصير كل شئ
انا كنت اجيب للدنيا ميت ألف ابن
عجبي
*******
العشب طاطا للنسايم ونخ
أخضر طري مالهش في الحسن أخ
عصفور عبيط انا.. غاوي بهجه وغُنا
ح انزل هنا.. وانشالله يهبرني فخ
عجبي
*******
أوصيك يابني بالقمر والزهور
أوصيك بليل القاهرة المسحور
وإن جيت في بالك.. إشتري عقد فل
لأي سمرا.. وقبري إوعك تزور
عجبي
*******
غمض عينيك وارقص بخفة ودلع
الدنيا هي الشابة وانت الجدع
تشوف رشاقة خطوتك تعبدك
لكن انت لو بصيت لرجليك.. تقع
عجبي
*******
حاسب من الاحزان وحاسب لها
حاسب على رقابيك من حبلها
راح تنتهي ولابد راح تنتهي
مش انتهت أحزان من قبلها؟
عجبي
*******
يأسك وصبرك بين إيديك وانت حر
تيأس ما تيأس الحياة راح تمر
أنا دقت من دا.. ومن دا عجبي لقيت
الصبر مر وبرضك اليأس مر
عجبي
*******
ولدي نصحتك لما صوتي اتنبح
ما تخفش من جنّي ولا من شبح
وان هبّ فيك عفريت قتيل إسأله
ما دافعش ليه عن نفسه يوم ما اندبح
عجبي
*******
خوض معركتها زي جدك ما خاض
صالب وقالب شفتك بامتعاض
هي كده.. ما تنولش منها الأمل
غير بعض صد ورد ووجاع مخاض
عجبي
*******
كام اشتغلت يا نيل في نحت الصخور
مليون بئونه والف مليون هاتور
يانيل أنا ابن حلال ومن خلفتك
وليه صعيبه عليّا بس الأمور
عجبي
*******
ولدي إليك بدل البالون ميت بالون
انفخ وطرقع فيه على كل لون
عساك تشوف بعينك مصير الرجال
المنفوخين في السترة والبنطلون
عجبي
*******

[jewel_lowis]

دفاعـي بسيـط



حلمت الليلة دي
باني في موقف رهيب
باقول.. والكلام مني طالع نحيب
سيادي القضاة.. دفاعي بسيط
كلامي ماهوش غويط
وماهوش عبيط
بسيط
بساطة هدوم الغلابا الفقارى الحفاة
بسيط.. زي اسم صديق
على شفة صديق
بسيط زي دمعة بريء
بسيط زي وحش جعان في الفلاه
بسيط زي حفنة دقيق
*******
سيادى القضاة
ياذمم يا همم يا قمم يا عتاه
دفاعي قوي.. قوي
زي صرخة غريق
بينده لقارب نجاة
بينده بآخر قواه
للحياه دفاعي قوي
زي دقماق حديد
قوي زي نظرة وعيد
قوي زي تمثال
قوي زي بلطة رجال الحريق
فوق بيان الحريق
*******
سيادي القضاة
سيادي الكرام العظام الفخاة العلاه
دفاعي مؤيَّد
مؤيد بكل الكلام العظيم
بتورا
بانجيل
بمزامير داوود
بقرآن الكريم
دفاعي مؤيد بكل انين الكمنجات
في كل الوجود
بكل حفيف النسيم
بتهنينة الامهات
للعيال في المهود
بقولة باحبك وآه
بصوت القبل
وكل ابتسامة
بحق وحقيق
تؤيد دفاعي
وبارفع صباعي الضعيف وباقول كلمتي
*******
سيادي لقضاة
سيادي الحدادي اللي حايمة على رمتي
ح اقول كلمتي
لكن قبل ماانطق واقول كلمتي
قولولي انتو
اية تهمتي..؟؟
*******
- صـلاح جاهيـن -