رجال حول الرئيسْ (مع الإعتذار للمفكر الإسلامي / خالد محمد خالد)

[رضا محمود]

مش عشان رأيك وفكرك..وانتمائك للجماعةْ
أو عشان حبّة جرايد..كُل يوم تُنشر إشاعةْ
ولاّ أصحاب المصالح..في البرامج والإذاعةْ
مش عشان..كارهين سيادتكْ
أو عشان..رافضين سياستكْ
ولاّ من باب التطاول.. والخلاعةْ
إحنا لمّا وقفنا ضِدّكْ..
كان هدفنا الخوف عليكْ
من إيدين وقفت تساندَكْ
بس بتكتّف.. إيديكْ
رغم إنّك شخص طيّبْ
عاش ظروفنا وحَسّ بينا
ليه ساعات نلقاك تِكَدّبْ
حلم راسمينُه بإيدينا ؟؟
بعض أنصارك يا ريّسْ
نُص أفكارهم..قديمةْ
القلوب فيها اللّي فيها
والنوايا..مش سليمةْ
إنتّ بتعَلّي فـ مقامهُمْ
وبكلامهُم..يهدموكْ
رغم إنّك كُنت مِنهُمْ
بس عاجزين يفهموكْ
اللّي قاصدين بالمناورة
يخدعونا..ويحرجوكْ
الظلام والحقد عَشّشْ
فـ الضماير..والعقولْ
والقرارات العقيمةْ
مُستحيل تطرح حُلولْ
اللّي بيحارب جنابكْ
مش مُبارك..والفلولْ
اللّي بيحاربك ياريّسْ
كدّابين الزَفّة..دوولْ
مين ياريّس كان يقولْ
إنّ بعد الثورة والدّم اللّي سالْ
اللّي يحكُمنا الدراهم..والعِقالْ !!
أو نبيع الحلم في سوق السياسة
للّي يدفع بالريالْ..
والقروض أُمّ الفوايد
تبقى فـ الآخر..حلالْ
لأ ياريّــسْ...
مصر مش عزبة أبُوهمْ
واحنا..مش حَبّة عيالْ
مصر فيها الخير زكايبْ
مـ الضرايب...والمصانعْ
والمزارع...والقنااااالْ
مصر...
ثروتها الرجالْ
مصر...
ستّ الحُسن في عيون الجمالْ
واللّي حيدلّك عليها...
حُسني....والشاااطر جمالْ
إحنا سلّمناك رايتنا
واحنا عارفينك أمينْ
بس لو ضاعت هيبتنا
مُستحيل هنقول آآمينْ
اللّي قام بالثورة قادرْ
إنّه يشعلها فـ يومينْ
إنتّ آخر حلم فاضِلْ
للغلابة..المطحونينْ
واحنا عارفينك مُناضِلْ
طول حياتك من سنينْ
بس لو تنسى الأفاضِلْ
اللّي حواليك مزروعينْ
لو تكون في الحُكم عادِلْ
إحنا هنكـون مُخلصِينْ


(رضــــا محمود)

[Young DeviL]

بجد رووووووووووعه تعبر عن حالنا فعلا
نفسي بجد اساله ليه كده يا ريس ؟؟؟!

لو ده من تاليف حضرتك ياريت تعرفني انقله قسم الابداعات

[رضا محمود]

السلام عليكم ورحمة الله وبركاته.....أخي الحبيب طبعا القصيدة من تأليفي..ونشرت على عدة منتديات وعلى صفحة الشاعر رضا محمود على الفيس بوك...ولكنني نشرتها بالخطأ على هذا الباب..فأرجو منك التكرم بنقلها للمكان الصحيح...دُمت بكل الخير...تحياتي

[Young DeviL]

تم النقل
في انتظار المزيد من الابداع

[رضا محمود]

تم النقل
في انتظار المزيد من الابداع

شكراً أخي الحبيب تقبل تحياتي

[العاشقة المجروحة]

حقاً لا أجد رداً يوفيك
فخير ما كتبت شاعرنا الجليل
لقد صدقت الاحساس ..فأجدت الكلمات واحسنت التعبير
لك منى كل التحية والتقدير

[اميره بلا وطن]

شاعر بجد وكلمته زى السيوف
رافض يجامل حد او يرجع بخوف
شايف حالتنا وحزننا وعايش ظروف
بتهد فينا كلنا
ومرخصالنا دمنا
وجاى راسمهالنا بمهارة قلمه وجمال الحروف
أصل الكلام والشعر منه حاد جدا كالسيوف


شاعرنا الكبيــــــــــــــر دائما
دمت بكل الود
وبكل هذا الجمال النابض من قلمك العظيم