الـبـنـات فـى بـلادى عـيـب

[آية الرحمن]

عيب تشاور
عيب تحاور
عيب تحب
و عيب تثور

البنات فى بلادى تقدر تبقى جنّة
تبقى نور
البنات فى بلادى تهتف
بس من جوّه الشاشات
البنات فى بلادى مادة
للحكاوى فى الحارات
البنات فى بلادى جدعة
و تلاقيها بـ 1000 راجل
البنات فى بلادى حاسّة
فى كل لحظة بـ اللى حاصل
أيوا محبوسة بـ أوامر
بس حرّة فى المشاعِر
رغم عند أوان معُيّن
كل دا بيكون سراب
غصب عنهم ..
البنات فى بلادى عايشة
جوّه شبورة ضباب
البنات فى بلادى حلوة
البنات فى بلادى غنوة
البنات فى بلادى طاقة
بس مأسورة و حزينة
البنات فى بلادى زيــنَة
بس مكسورة الجِناح
البنات فى بلادى حتى
صعب تشكى م الجِراح ...
البنات فى بلادى حـُرّة
بس من جوّاها بس
البنات فى بلادى صعب
حتى تنطق .. لو تحِس
البنات فى بلادى ضحكة
و الحنان لازم خُطاها
البنات فى بلادى فرحة
و الأمل ساكِن غُناها
البنات فى بلادى تحلم
بس تحلم من بعيد
أيوا مش كل البنات
بس دا الحال مِن سُكات ..
....
أيوا حال الأغلبية ..
جوّه فى بلاد الصعيد

لـِ مــــروة جـــمال الـــدين

[Doaa Hegazy]

روعة بكل ماتحمل الكلمات من معنى