تحب تهز وسطك ..ولا تلعب على الحبل ..ولا تشقلب رجلك

**Princess maya** · 23 - 11 - 2008, 01:20 PM

تحب تكون تاجر شنطة بس مش اللى فيها وزة بطه .. لا لا .. اللى فيها اللى بيعدل الدماغ وبيروق المذاج

ولا تحب تكون مسئول من بتوع (لا تعليق ) وكله تمام يا ريس

ولا تحب تكون صاحب عبارة من نوع اللى بيغرق فى شبر ميه

ولا تحب تكون رئيس مجلس شعب من ماركة ( موافقة )

ولا تحب تنضم للحزب الاخضر بتاع العبور للمستقبل ..وغنى مع شباب النيل غنى

ولا تحب تطلع فى برنامج تليفزيونى وتمسح بوخ

ولا تحب تكتب مقالات زى بتوع اسامة سرايا أو سمير رجب اللى تخلى الدمعة تنزل من العين تأثرا بدور القائد العظيم فى حفظ أمن الوطن ...

وكما قال شاعرنا الهمام على حذوقة ..أنا وطنى وطنى وبطنطن واتباها بمجدك يا وطنطن .. على كل الاوطان متسلطن

أحب أسالك بقه ..

هااااااااااا

تحب تتسلطن على أى من مراكز النفاق السابقة

اه نسيت .. شفت ازاى .. اللهم اعزيك يا شيطان

ازاى انا انسى واحد زى ده

مصاص الدماء

مش دراكولا .. لا لا يا خوانا

ده مصاص لدم الشعب

بتاع الحديد

اللى خلى الناس على الحديدة

عارفينه ولااااااااااااااااااااااا اااااااااااا

أكيد تعرفوه

مهو أى مواطن غلبان- زى حالاتى- رجليه حفيت على شقه علشان يتجوز البنت اللى عانت معاه زى ما عانت جميلة بو حريد يعرف ان الحديد طالع .. والشقق طالعة .. والانسان نازل .. نزول بلا صعود

وكله بسبب المنحوس .. احم اقصد المحروس .. بتاع الحديد .. أوعى تقولى انك لسه معرفتوش .. كده اروح أنتحر أحسن !

اه يا عينى ليل كمان على عمنا النائب اللى عامل فيها ابو الشرف

وبيمثل دور المعارضه اللى الحكومة بترسمهوله

وبصوته العالى فى المجلس إستطاع ان يتخلص من عائلة السادات اللى الحكومه مش عوزاها

ولانه ناصرى وبيحب القمع والبطش خرج ليدافع عن جرائم صدام بكل وقاحه فى اوربيت ومستريحش غير لما واحدة كويتية على التليفون كيفته بكلمتين ..

طيب هو فاكر انفسه ابو العريف وحيضحك عينا _ أصلنا غلابه - ومنعرفش حاجه ، لكن زميله الصحفيين اللى عاشوا بدايته يعرفوه كويس وعارفين تاريخة البلاك ..علشان كده احرز الصفر المتين فى ترشيحه لنقابة الصحفيين

عرفنتوه ولا لسه ..

مهو ده الراجل اللى بيختفى فى الجلسات المهمة وميطلعلوش حس

طب كان فين لما المجلس قدم طلب إحاطة لوزير الداخليه بسبب ضرب نائب على يد ضابط شرطة

مسمعناش صوته ليه !!!!

اه ....أصل كان صوته مبحوح شويه .. وشوفوا المؤامرة المجلس تخلص من كل الينسون الموجود فى الكافيتريا !!!!!!!!!!!!

أنا حاسس بيك صدقنى شكلك مدايق .. مش عاجبك تبقى زى النائب ده

خلاص يا سيدى رموز الفساد فى بلادنا على قفا من يشيل .. ايه رايك تلعب دور النائب اللى كان بينقط الرقاصه ..

اه بالضبط كده .. زى فيلم الراقصه والسياسى ..

بس بقه النائب ده ايه .. زى الفل

سيديهين تمام واخر مزاج اتروق بيهم وروق الشعب كمان معاه .. ونعم الوطنية الصادقة !!!!!!

انا قولتك وانت اختار بقه

بس خلى بالك الاختيار محدود

يا إما تهز وسطك

ويإما تلعب على الحبل

ويإما تشقلب رجلك

بس على فكره

أنا وطنى وطنى وبطنطن وأتباها بمجدك يا وطنطن