يا ترى سعيد أنا أو تعيس ؟؟

**memoo-007** · 24 - 11 - 2008, 10:49 PM

حاسس اني مبقاش عندي اي احاسيس

عايش في الدنيا دي زي ما اكون دسيس

عايش فيها انا ولا ميت سعيد انا اوتعيس

عايز افضفض من جوايا واحس باي تنفيس

الدنيا حواليا بقت بلا صاحب او ونيس

كلها غش وخداع وحرامية في التأسيس

تعالوا نلقي نظرة ..على شعبنا البئيس

فيه ناس من الاخلاق اعلنوا التفليس

نهبوا وسرقوا كل غالي ونفيس

قلبوا عاليها واطيها و العالي لابد يكون خسيس

مبقتش تعرف مين معاك ومين دسيس

الحيط بقى ليه ودان وفيه معششة الجواسيس

ناس واكلنها ولعة .. والباقي دول ملاحيس

شغلهم اصدار اوامر ..ومالو .. ما الشعب دول قراطيس

حالة الطوارئ مددوها ..٣٠ سنة في كوابيس

طوابير العيش اتلغت .. و للمواطن رغيفين في كيس

البنزين غلي.. من اول التوك توك ولغاية الاتوبيس

معلش دي حكومة بتشجع التخسيس

كتر العوانس في البلد والكل يدور على عريس

عايزين شبابنا مايطلعو ابدا ..من حالة التهييس

كنا زمان متوحدين .. شيخ دين في ايد قسيس

جم خربوها وشعللوها ..و من عمايلهم اتشل ابليس

الشعب ارهابي ..مجرم ..و همه تقولش قديس؟؟

حاول تعترض..حاول؟؟.. صدقني تروح فطيس

كفتهم دايما هتغلب ..من الجمعة للخميس

صدق الي قال ..الشعب في خدمة البوليس

لامتة الشعب ده هيسكت و يفضل للخوف حبيس

ويتغزل بأمجاد أجداده فرعون و رمسيس

مستني جني العلبة ومارد الفوانيس

ييجو يغيرو له حكومته وينتخبو له رئيس

كفاااية ..خلي عندك دم ..خليك انسان حسيس

تفتكروا في الزمن ده ..ابقى سعيد انا او تعيس ؟؟

أتمنى الخاطرة تعجبكم

وأتمنى أكتر أعرف رأيكم فيها

**m.chezoo** · 24 - 11 - 2008, 10:59 PM

والله احنا اتعودنا على كده ... ان الدنيا فيها كل حاجة حلوة ووحشة
ومهما كانت الحااجات الوحشة فيها ... اكيد فيها حاجات حلوة وفى ناس حلوة تستحق ان الواحد يعيش عشانهم مبسوط
صح ولا ايه

**عاشقة الرومانسية** · 25 - 11 - 2008, 02:14 AM

ربنا خلق كل واحد مننا علشان يكون سعيد الظروف المصاحبة هى اللى بتخليه يتحول من انسان سعيد لتعيس اقولك على حاجة صالح ربنا وصالح نفسك وارضى ربنا وارضى نفسك واتعامل بحسن نيه وحاول تعمل حاجة مفيده علشان تحس بنفسك هتلاقى الدنيا جميله اوعى تبص وراك هاتتعب اوى واوعى تبص قدامك هاتتعب اكتر خليك فى النهاردة خليه يعدى وعيشه صح بس خليك مراعى دينك ...
هتلاقى نفسك سعيد
يارب زيح الهم والحزن يارب تسلم ايدك ويارب اكون قدرت اوصلك احساسى اللى دايما افكر فيه