فين العقل يا مسلمين

[misterattia]

كُنُّا نشوف أسلاميين

نور بالخير واضح ومُبين
طاقات للخير

وعزم متين
وبركه وعدل فى كل حين
لكن دلوقت
شايفين ناس متأسلمين
مبقوش عارفين
مبقوش شايفين
لرقاب الناس
دايما قاطعين
من غير شفقه
من غير رحمه
من غير دين
فين العقل يا مسلمين

ليه بنكرَه فينا النَّاس
حُسن الموعظه
من حُسن الدين
معدتش الرحمه
ولاعادش الشفقه
كل معانى الخير
ف قلوبهم منسييِّن
يمكن حلم
ودول نايمين
ولا كابوس معدوم الدين
أنا بستغرب
أزاى عاقل يوم بأيديه
يقتل أخوه ويمثل بيه
وف وضع مُشين
ازاى عاقل ويَّا سلاحه
ويا عناده ومُجتمعين
يقولوا هنقتل
وكمان هنفجر ف المساكين
حتى شعارهم أعلام سُوده
وزى الطين
وأصابع يد ومش كاملين
ناس بتسميهم أخوان
وكمان داعش
وجند محمد
وبيت المقدس
ورسول الله منهم متبرى
وهيبقى خصيمهم يوم الدين
بقه فيه عاقل
يقتل أخوه
بقتل عمُّه
ويشرب دمُّه
ويقتل أبوه
والله مش فاهم
ودماغى بتُّوه
علشان كُرسى
يفجَّر نفسه
والدم الطاهر أباحوه
زى المجانين
دا ربنا
ولا يوم يحب الظالمين
يا خلق الله
الدِّين والرحمه
ومش عارفين
الكون ليه رب
يقدر يلم ف شملنا
يقدر يكيد للكائدين
بطَّلوا قتل
وبطَّلوا أكل
ف لحم أخواتكم
ومش سامعين
كانوا زمان
صحابه بجد
بصحيح الدين
على طول ماشيين
اما اصحاب اليوم فاشلين
كل الكذب ويَّا الزيف
وقلوب سوده
ولا يوم هتلاقى قلب نضيف
على كل خراب
الدُّنيا ومُجتمعين
بس أنا بستغرب
وأنا بسأل نفسى
لصالح مين؟
طاب يرضى مين
يا مسلمين
يا موحدين
أصل أنا مجنون
وهُمَّه العاقلين
كانت أُمَّه واسلام واحد
كل الناس منهم خايفين
لكن دلوقت
جماعات هشَّه
زى القشَّه
والناس ضالين
عايزين سُلطه ويَّا فلوس
وجواز نسوان
بدل الواحده
اتنين وتلاته
ومش فارقين
بيفصلوا دين
وف كُل ملذاتهم غارقين
أفلام ممنوعه
وتجاره ف ناس
وهدوم بحرير
وساعات من ماس
لو تجادلهم
تبغى تعدِّلهم
من غير أحساس
هتلاقى شتايم
ولا تخطر يوم
على بال كافرين
ارجعوا تانى
ياكل الناس
العمر خلاص
وأحنا مسافرين
بوسوا تراب الوطن الغالى
وقولوا اسفين
واتجمعوا
وف وسط اخواتكم
الدين شىء واحد
مش نُصِّين
وكفايه الفُرقه
ومش ناقصين
لجل مايعرف
كل أخواتنا
ف الدُّنيا بحالها
صحيح الدين
اصحوا يا نايمين
يارب يكون
أنا فاهم حاجه
ومعايه الباقى كمان فاهمين
يارب يا قادر انته مُعين
اجمع بينَّا
قولوا أمين
=============
مستر/عطيه الخضرى