جملة بنسمعها كتير اوى .. بتعبر عن سرعة البديهة والتقاط المعنى من اقل تلميح للموضوع !! بس فى احيان كتير اوى بيكون الفهم غلط لان غالبا المعلومة بتكون مكسورة الجناح يعنى ليست دقيقة كليا وغالبا بتكون ناقصة الاركان .. يعنى بداية تحليل الموقف والاستنتاج بتكون ناقصة!!

وثقافة القفز من البدايات المنقوصة للنهايات المغلوطة متواجدة بكثرة وفى اكثر من موضوع ...وليس فقط فى مجال الثرثرة الاجتماعية على غرار حكاية زواج فلانة من فلان وان جوازهم عن حب ولا مصلحة !!

حاليا انتقلت لكل حاجة .. بقت موجودة فى مجالات الدراسة بتفوق ..منطق الفهلوة والاختراع من الهوا!!

يعنى مثلا لما دكتور يجيب لنا سؤال من خارج المنهج او داخله واحنا طلبة ماعندناش فكرة عنه.. اكيد يعنى مش هنسيب مكانه فاضى ..ده حتى يبقى عيب فى حقنا ... واساسى انه كله المواهب هتطلع .. الاختراع يظهر على اصوله واهو كله زى بعضه ... واللى عملوا النظريات دى احسن مننا يعنى ..ولا كان بيدرس لهم دكتور زى بتاعنا مثلا!!

وكمان المنطق ده بينطبق على مواقف حياتية كتيرة بنتعرض لها ...تفسيراتنا لها بتكون معتمدة على الفهلوة وانهم بيجيبوها وهى طايرة وده نابع من خبراتهم الواسعة فى الحياة!!

لثقافة الفهلوة اسباب كتير اوى على ما اظن ابسطها الاستسهال والاستعراض واعمقها الجهل والاستسلام لثقافة الخرافة والتكبر عن التعلم والكسل عن تقصى الحقائق والاسباب الاصلية .

اما عن نتائجه فهى كارثة حقيقية لانه عندما تكون البداية خاطئة .. تكون النهاية عار !!

واعتقد ان هذا مانواجهه فى حضارتنا الحالية – ان استطعنا اطلاق عليها اسم حضارة!!

لو بصينا حوالينا هنلاقى النتايج فى شكل ثقافة الجهل والخرافة .. وقضيها والناس لبعضيها والاستسلام التام للروتين والتحايل على القانون ..ده غير الافتاءات طبعا فى كل حاجة .. دين ، طب ، علم ، سياسة ، وكل اللى ما يخطر على بالك ..لان معظم اللى بيتكلموا فى كل حاجة عادة بيبقوا مش فاهمين فى اى حاجة .. ومتوقع ان اللى قدامه وبيتكلم معاه هو كمان بيبقى مش فاهم .. وعادة بيتسغلوا شخصيات اصغر منهم او اضعف عشان يفرضوا عليهم الفكرة دى.. والاصغر يتعود عليها ويتحول للاصغر .. لحد ما بقت نظام حياة وثقافة عصر متبعة من الكثير من البشر.

والعلاج لحالة زى دى .. لازم تكون بشكل منظم جدا وعقلانى جدا .. ولازم يكون بدراسة منظمة .. مش معقول يعنى هنحاول نحد من فوضى التفكير باسلوب فوضوى !!

وبما ان ده يعتبر سلوك مجتمعى وظاهرة مجتمعية تستحق الدراسة والتحليل .. وتستحق مننا وقفة جامدة جدا-احم .. مش الوقفة المصرية بتاعت اعلانات تنظيم النسل على فكرة !!-