كيف تعيش فى مصر ب 1000 جنيه

[Princess maya]

" كرامة المصرين انهارت يا سيادة النظيف ،،، ولا


أقولك عندك حق هو الى زى حضرتك هيحس بالناس المطحونه ازاى " !!!!

لو شاطر ... تعرف تعيش فى مصر بـ 1000 جنيه ! ! !


عيش بلدي 1 ج يوميا 30 شهريا
بس لازم تلحق دورك فى طابور الفرن وتلحق شغلك فى نفس الوقت ربنا معاك

حليب 4 يوميا 120شهريا
عدد واحد لتر يومياً ويارب ميطلعش بودرة سيراميك ويكفى العيال

فول 8 اسبوعيا 32 شهريا
كيلو فول اسبوعيا يعنى 125 جرام يوميا رضا والحمد لله

جبنة بيضاء 20 اسبوعيا 80 شهريا
كيلو في الأسبوع 125 جرام يوميا انت عايش

بيض 20 شهريا
عبارة عن 10 بيضات فى الاسبوع يعنى لو اربع افراد يبقى بيضه ونص يوميا للاربعة

خضار10 يوميا 40 شهريا
عبارة عن صنف واحد بس + كيلو طماطم + لمونه وحزمة جرجير اسبوعيا

فواكه 5 اسبوعيا 20 شهريا
عبارة عن كيلو برتقال أو قشر موز مرة اسبوعيا علشان العيال تفتكر اسمة

شاى10 شهريا
لزوم الكيف اللى بيذل والضيوف الرزلين

سكر 4 اسبوعيا 16 شهريا
عدد واحد كيلو اسبوعيا مش بقولكم الكييف يذل وسلملى على الحكومه

ارز 4 اسبوعيا 16 شهريا
عدد واحد كيلو اسبوعيا للعائلة كلها يعنى 125جرام يوميا متوسط الفرد 40 جرام

زيت 10 اسبوعيا 40 شهريا
لتر اسبوعيا علشان تشرب بق على الريق يزيت معدتك 000 يستعمل كبديل للخضروات

مكرونه 8 اسبوعيا 32 شهريا
عبارة عن عدد 4 كيس 400 جرام اسبوعيا 0000 خلى العيال تنبسط

دجاج 20 اسبوعيا 80 شهريا
عدد واحد دجاجة اسبوعيا للعائله 000000 اظن معقول

لحم 30 اسبوعيا 120 شهريا
عدد واحد كيلو لحم اسبوعيا لزوم صنف الخضار واللمونه وحزمة الجرجير 000 مع ان الكيلو اغلى بس مش مشكلة هنفاصل مع الراجل

بقوليات 10 شهريا
عبارة عن كيلو واحد بس شهريا ونقى اللى بتحبه براحتك ( عدس - لوبيا - فاصوليا )

توابل 10 شهريا
عبارة عن دقيق + ملح + كمون + فلفل + كسبرة + وممكن تديها خل براحتك

صابون 15 شهريا
عبارة عن صابونه واحدة للحمام + صابون مواعين + مسحوق للملابس ( النظافة عموما )

مواصلات 2 ج يوميا 60 شهريا
بعد طابور الفرن تركب أتوبيس الهيئة ذهاب وعودة وبهدله وفرهده لفرد واحد يوميا

حلاق 10 شهريا
عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )

مدرسة 10 اسبوعيا 40 شهريا
عبارة عن مصروفات المدرسة + مصروف العيال اليومى + كراسات واقلام وجلاد 00ألخ

دكتور 30 شهريا
نمرض بالدور طبعا عدد اربع افراد مرة واحدة للفرد كل 4 اشهر وربنا يستر

ادوية 50 شهريا
أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه

تليفون 10 شهريا
اشتراك الهيئة هنرد بس ومش هنتكلم معدش ينفع كلام

مياة 10 شهريا
للاسف لازم نشرب مياة ملوسة بالمجارى

غاز 5 شهريا
الحمد لله غاز طبيعى الله فى عون اللى عنده انابيب ( 10 جنيه للانبوبه ) وممكن تطلع فاضية

نور 20 شهريا
لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع

قمامة 10 شهريا
اجبارى طبعا ومن الواضح ان العشة دى مفيهاش اكل اساس يبقى القمامة هتيجى منين

بواب 15 شهريا
مهو من حقه يعيش هو كمان لو عشر شقق يبقى 150 جنية شهريا

صيانة 30 شهريا
لاصلاح الاجهزة بالدور غساله - سخان - بوتجاز - مروحه - تلاجة - سباكة - لمبات انارة الخ


ملابس 100 شهريا
عبارة عن الصيفى والشتوى داخلى وخارجى واحذية وشرابات وكلونات واتصرف بقى


الاجمالى 1081


اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض .


ايجار الشقة طبعا قانون جديد وللاسف ملهوش قانون كل واحد وبخته ومش هنحسبها كل واحد يقعد عند امه وبالمناسبة ملكشى دعوه بشوية المصريف الى احنا هنقولها دى :


عيد الام
ربنا يخليها ويديها الصحه
كل سنة وهى طيبة
( 0 )

عيد الكحك
مضر وملهوش لزمة
كل سنة وانتم طيبين
( 0 )

عيد اللحمة
مضر وملهوش لزمة
كل سنة وانتم طيبين
( 0 )

حلاوة المولد
السكر مضر وملهوش لزمة
كل سنة وانتم طيبين
( 0 )

أخ خ نسيت احسب زكاة الفطر بس مش عارف هتدفع ولا هتأخد ؟

عموما نقول على قائمة الممنوعات والمحظورات 000 متقربوش منها علشان تعرفو تكملو الشهر.

ممنوع عنك الحلاوة والمربى والعسل والزبدة وكافة انواع الجبن عدا ماذكر فى التعيين (الجبنه البيضا) فقط .

المعلبات تونه بلوبيف لانشون سالمون فول وطبعا البسطرمة والزيتون والمخللات ممنوووووووووووع .

اوعى قلبك يحن لعيل من العيال وتجيبله شيبسى ولا ببسى أو كراتيه أونايتى أو عسلية أو بسكوت أو شيكولاته اياك ومنتجات العيال الصغيرين حتى لو حليب بالفواكهه او لبانه وجيلى كولا وهوهوز حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل كمان .... وربنا معاك .

احظر اللحوم بانواعها البفتيك والاستيك والرقبة والموزة واللوزة كله كلام فاضى خليك فى تعيينك الاسبوعى .

ومتنساش ان البانية والفليه من الممنوعات ومتقربش ومتمشيش فى الشارع جنبك كنتاكى وهاردييز وهاربيز ومؤمن وكوك دور واياك من السندوتشات عموما زى الطعمية والبطاطس والبذنجان الحجات الحلوة دى مش مطلوبه تعملك حموضه وهتحتاج فوار واحنا منعناه مع الدوا وطبعا مش محتاج اقولك وافكرك انك ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ وتفكر تجيبه .

خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بانواعها بالعربى انت زى العصفورة تاكل عيش ودنيبة رز وتشرب ميه عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع فاهم يعنى ايه ممنوع .

اهم حاجة مترحش لدكتور متجبش مدرس ولا ادوية واياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم .

طبيعى انك مش هتقرب من الفواكهة خالص البرقوق المنجو البطيخ الفراوله الكيوى الخوخ العنب التفاح حتى الكاكا والحرنكش والنبأ والقصب والدوم والتوت ممنوع سيادتك .

وطبعا معجون الاسنان والحلاقة والشامبو والبلسم كلها رفهيات ملكش فيها زى البصل والتوم والبطاطس كلها اساسيات ملكش فيها برضه ومتنساش تبلغ الناس اللى تعرفهم هما اكيد زيك محتاجين شوية نظام مش اكتر هما غلابة وفكرهم يقولو لعيالهم لو شافو مسلسل فى التليفزيون مليان بهرجه ان دى قصص خياليه كانت فى العصور القديمة فترة من الزمن و ان الواقع زى ماهما شايفيين حتى الاعلانات حاولو تفهموهم انها مجرد الوان مبهرة وتكنولوجيا فى علم التصوير وتخيلات ممكن تحصل بعدين زى ماحصل فى امريكا وكندا وفرنسا والمانيا واوربا كلها وان الحجات دى علشان لما الناس دى يجو عندنا يلاقو منها ويعرفو يعيشو هى مش لينا دى ليهم هما اصحاب البلد ولازم ينبسطوا .

عموما لو على الكلام مش هيخلص روح الحق طابوووووور العيش تبقى مصيبة لو الفرن شطب .


تفتكروا 1000 جنية ... تكفى ؟

طب أيه رأيك فى الى بياخد 200 جنيه !!

تتوقع إنسان ذى ده ممكن يعيش إذاى ؟؟؟؟

أعرفكوا خبر حصرى !!!!!

المواطن المصرى على وشك الإنتهاء ....

تحياتى لكل المطحونيين يعنى لكل شعب مصر

[القبطان]

مش عارف اقول اية انا مش ىعارف اكتب حاجة
كتابتك خلتنى اضحك بس مش سعادة ممكن علشان مش عارف اعمل حاجة تانية
موضوع مأسوى وواقعى
مش قادر اقول غير ربنا يستر

[zezo1]

لا حول ولا قوة إلا بالله