الخلاصه بقي ومن الاخر عشان الاشاعات!
اولا MRSA
"Methicillin Resistant Staphylococcus Aurus"
دا بكتريا مش فيروس، وهو بكتريا مقاومه للمضادات الحيويه، بيتواجد في المستشفيات والرعايات المركزه بالاخص، نتيجه كثره المرضي المصابين بالتهابات الجهاز التنفسي اللي بتدخل الرعايه المركزه، وهو قاتل جدا لاي مريض مناعته ضعيفه ، وهو اكبر سبب لوفيات اطباء الرعايه المركزه (بالمناسبه الدكاتره بتموت منه ، وبياخدوا 19 جنيه بدل عدوي في الشهر ، مقابل 3000 جنيه لوكيل النيابه و 4500 لموظفي البنوك)
اعراض المرسا اعراضه بتبدا زي اي دور برد، وبتقلب لحمي وفشل بالجهاز التنفسي يودي الي الوفاه
الMRSA علاجه مضاد حيوي اسمه فانكوميسين، من الادويه السخيفه اللي بتسبب فشل كلوي
الMRSA بقي ليه اخ اكبر اسمه VRSA
"Vancomycin Resistent Staph Aurus"
دا بقي بكتريا مقاومه للفانكوميسين ذات نفسه، ومن الاخر بيموت في خلال 48 ساعه مثلا.
بالنسبه لغلق الرعايات المركزه، في بروتوكول في الرعايات انه في حاله اكتشاف حاله مريض مرسا او فرسا ، بيتم قفل الرعايه المركزه لضمان ان مفيش مريض تاني يدخل الرعايه ويتعدي من المريض ده ويموت (لاحظ ان ده حمايه لباقي المرضي) لكن بالنسبه للاطباء والتمريض يولعوا بجاز عادي ‏‎unsure‎‏ رمز تعبيري ، الدول المحترمه بتدي طبيب وتمريض اي رعايه تستقبل حاله مرسا اجازه مدفوعه الاجر لمده شهرين ومضادات حيويه لضمان الحفاظ علي صحتهم ( دي الدول المحترمه ، ملناش دعوه)
اما بالنسبه لحالات الحمي المنتشره اليومين دول فهما لتلات اسباب
1-sun strokes
ضربات الشمس نتيجه التعرض للشمس لفترات طويله وتسبب حمي وجفاف وممكن تصل لاضطراب بدرجه الوعي والوفاه احيانا خاصه للاطفال وكبار السن، وطرق الوقايه منها الاستحمام بماء بارد يوميا، عدم التعرض للشمس، شرب المياه والسوائل بكثره في الجو المهبب اللي احنا فيه ده ( انا بحذركم لو اي حد اتكلم عن اشاعه ان الجيش عمل جهاز يسخن الجو في مصر عشان يزود انتاج البترول عندنا بعد عشر سنين ، هتغابي عليه)
2-heat strokes
او الضربه الحراريه، ودي زي ضربه الشمس بالضبط بس من غير التعرض للشمس، يعني لو انت قاعد في مكان جوه ناشف وحار لفتره طويله ، هيجيلك ضربه شمس من غير ما تتعرض لشمس، والوقايه منها زي الوقايه من ضربه الشمس
3- meningitis
الالتهاب السحائي، وفقا لاصدقائنا اطباء الحميات، الالتهاب السحائي بدا يرجع، ودا نتيجه البيئه الوسخه اللي احنا عايشين فيها، بس لحسن الحظ الالتهاب السحائي لا ينشط بكثره في الصيف ، يعني لو حسيت بسخونه او حمي او دوخه، انت عندك sun strok او heat strok الي ان يثبت عكس ذلك.
اتكلمنا عن الوقايه منهم، نتكلم عن العلاج في حاله ظهور اعراض ضربه الشمس:
احضن تكييف او مروحه.
ابعد عن ام الشمس اللي جايه تصيف فوق نافوخنا اليومين دول.
سوايل ساقعه بالعبيط
اقعد في البانيو ونزل الميا علي دماغك
خد اي خوافض حراره متاحه قدامك
متاخدش مضاد حيوي، انت معندكش انفلونزا،المضادات الحيويه هتزود معدل الايض في جسمك ووجسمك هيسخن اكتر.
روح مستشفي خد محاليل وريديه ساقعه


استشير دكتور باطنه او حميات او رعايه مركزه ، ملكش دعوه بالصيادله ولا الاسنان ولا ولاد النصابه اللي بيطلعوا في التليفزيون ويقولوا علي نفسهم استشاريين، لان كل اللي بيطلعوا في التلفزيون بيبقوا دافعين فلوس عشان يتشهروا ، ومعظمهم معاهم بكالريوس بتقدير مقبول شلوت، وكله تجاره ونصب في غياب الرقابه من وزازه الصحه اللي غالبا مسؤليها بيقسموا معاهم في السبوبه او مش فاضيين بيحاولوا يكبتوا الدكاتره عن المطالبه بحقوقهم عشان يحافظوا علي كراسيهم ويرضوا اسيادهم المسولين عن الموازنه العامه اللي بتسمح ب9000 جنيه ببدل عدوي وبدل منصه لوكيل النيابه والقاضي لكن مش قادره تزود بدل العدوي للدكتور 20 جنيه