مع اول يوم ف العام الجاى
قوللى هتقضى اليوم ازاى؟
معرفش ولسة مفكرتش
تقريبا لسة مقررتش
ياهروح لكافية واشرب ف الشاى
مع اول يوم ف العام الجاى
قول عايز ايه وانا ماشى معاك
لو يوم ضليت انا ناوى هداك
لو مش عارف ومفيش خطه
اسكت ومتتكلمش انت
غير لما تشوف هحتفل ازاى
مع اول يوم ف العام الجاى
وهعاكس بنت معدية
حلوه واموره وشقية
لو ضحكت ليا مايضرش
مش هقعد افوت واطنش
غير لما اجيب رجليها ازاى
مع اول يوم ف العام الجاى
طب اهلك بقى اخبارهم ايه؟
لسه بعيد عنهم برضة يابيه؟
مش سائل عنهم ومطنش
ويرنوا علىك ومابتردش
عامل نفسك قال ايه نسّاى
مع اول يوم ف العام الجاى
هخرج بكره مع اصحابى
اول مايخبطوا على بابى
ظابط ع الوقت وبالثانية
هتفسح وههد الدنيا
ولو امى اتصلت انا مش جاى
مع اول يوم ف العام الجاى
وصلاتك حاضر فى الجامع؟
ليه سايبها وعامل مش سامع؟
عملك هو الى هيبقالك
ولو الاخرة مجاتش ف بالك
هتقابل ربنا قوللى ازاى
مع اول يوم ف العام الجاى
هنفرتك فى ازايز البيرة
وهنعمل احلاها تعميرة
هنجيب ف بنات اشكال والوان
هنعلق ضحى ومنار وحنان
امال هنقضى السهره ازاى؟
مع اول يوم ف العام الجاى
طب قدر ان الموت جالك
لو عاصى وعامل مابدالك
مش خايف ابدا من ربك
جرب طاعته وهو يحبك
والدنيا هتحلى معاك ازاى
مع اول يوم ف العام الجاى
فكرت وربى يقوينى
ازاى ياشيطانى تعصينى؟
مش خارج بكرة مع الشلة
وبدال ماهنسهر نتسلى
انا هعمل خير طب مين قال جاى؟
مع اول يوم ف العام الجاى
راح ازور قرايبنا اللى ماشافونيش
وهساعد فقرا يلاقوا العيش
اول ماسمع صوت كل ادان
هتوضى واصلى للرحمن
يغفرلى زنوبى م العام الجاى
مع اول يوم ف العام الجاى
مع اهلى هضحك وههزر
وهقرب لهم اكتر واكتر
واحضن امى وابوس ايد ابويا
وهطبطب على اختى واخويا
اه فاكرهم اهو انا مش نسّاى
مع اول يوم ف العام الجاى
انا مبسوط قوى فعلا منك
قربت اخيرا من ربك
وحياتك بكرة تكون احسن
والجنه مكانك فاتطمن
وغلبت شيطان كان فعلا جاى
من اول يوم ف العام الجاى