حوار بين شاب وفتاه ليلة رأس السنه

**boba_H** · 10 - 1 - 2009, 11:35 PM

8:30 ميدان طلعت حرب قدام مكتبه مدبولي "ليله راس السنه"

مسعد: سوري يا حبيبتي اتاخرت عليكي كنت باقفل الشيفت
شيماء: يعني ملحقتش تجيبلي هديه السنه الجديده ؟
مسعد: انا مستني هديتك انتي الاول
شيماء: ممعييش فلوس ماشفره
مسعد: "يهرش في شعره ثم يشم رائحه صوابعه" مش كل الهدايا بتشتري بالفلوس يا عسل
ومش كل القلوب تتدوب في الكئوس وهنيالك يا فاعل الخير والثواب
شيماء: منا بقول كده بردو ايه بقي؟
مسعد: شفتي الفيلم اللي كان علي(mbc 2)
اللي كان اسمه قبله الكريسماس
شيماء: لا اصل ابويا لغي الوصله عشان اخويا الصغير بيتفرج علي ميلودي تريكس
مسعد: طيب شفتي فيلم بابا نويل والفراش الدافئ
شيماء: ايوه شفته لما جيه زمان علي نادي السينما لما كانو مش لاقيين شجره يعلقو عليها الزينه وكان تلج نازل من السما وكده
مسعد: طيب شفتي ايه اللي حصل لما النور انطفي
شيماء: ماهو النور انطفي هاشوف ايه يعني؟
مسعد : لما البطل استخبي هوا والبطله في القبو
شيماء: مخدتش بالي والله يا مسعد انا جعانه اوي مش هنجيب حاجه تتاكل
مسعد: تتاكل

cut

9:43 في مطعم بابا عبده للمكرونه بالكبده او السجق علي حسب رغبه الزبون
مسعد: شبعتي يا روحي
شيماء: اه الحمدلله يعني انت مجبتش ليه مكرونه من ام 3 جنيه ؟
مسعد: اصلك يا حبيبتي بتاكلي كتير اوي امال بعد الجواز هنعمل ايه ؟
شيماء: متسيبني يا عم استمتع بحياتي
مسعد: طيب منتي ممكن تستمتعي بحجات تانيه كتير "يغمز بعينيه" ولا ايه هه واخده بالك؟
شيماء: طيب قولي حاجه واحده قبل ما تيجي الساعه 12 عشان نلحق نتصرف قصدق ايه ؟
مسعد: يعني النهارده راس السنه وليله مشتركه والناس باذن الله فرحانه
شيماء:خليك صريح معايا ...خش في الموضوع عاييز ايه
مسعد:كل خير يا شيماء انا من يوم ما عرفتك وانتي مش سيبالي غير ايدك ابوسها
شيماء:ايه ده ايه ده لألألألأ انت هتتجنن ولا ايه يا مسعد "بمياصه" انا مش بتاعت كده خالص
مسعد: امال انتي ازاي طيب
شيماء:اسطبر لما امسح بقي مطرح الصلصه
مسعد:يابت ده كده عزوو
شيماء: طيب مش قدام الناس...لما نطلع بره
مسعد: حبكها ...حبكها اوي طلبه مقصوصه كماله يا ريس

cut

10:22 شارع شامبليون المظلم الهادئ الساكن هه واخدين بالكو اسيبكو تكملو
مسعد:ما تقربي يا بت شويه انتي ماشيه مع اخصائي اجتماعي
شيماء: منا مانكشاك اهوه
مسعد: حبيبتي يا شوشو عسل يا بت دي ريحه التوم ديه جايه منين يا بت ؟
شيماء: ده الاشارب يا حبيبي
مسعد:افتكرته من بقك يعني
شيماء:ازاي بقي؟ ده انا ضاربه اربعه لبان سماره عشان الريحه.. ده الاشارب الاشارب
مسعد: ما تجيبي بوسه اجنبي بقي
شيماء: لالا استني في راجل جاي من بعيد
مسعد: وماله "باستهبال"محنا كمان جايين من بعيد
شيماء: ايوه بس ااا
مسعد: مش وقت بسبسه الساعه داخله علي 11
شيماء:لما تيجي 12 عشان نبقي مظبوطين
مسعد: ومن هنا لحد 12 هنعمل ايه هنلعب الدوده علي الموبايل ؟
شيماء: اصل الشارع ده اصلا كله صنايعيه وخيفه يكون ابويا بيصلح التاكسي هنا اصله كان بيقول ان الردياتير بينقط
مسعد: "مقاطعا" يا اختي ملعون ابو الريدياتير لابو التاكسي لابوكي في ساعه واحده احنا ف ايه والا ف ايه ؟
شيماء: ياعم الشارع ده شكله ...."اتنبهت فجئه" ايه ده انت بتشتم التاكسي يا مسعد وديني لاروح
مسعد: روحي يا اختي انتي هتذليني
شيماء: شكلك بتلكك تلاقيك مبتعرفش اصلا ومصدقت اني هروح
مسعد: ما بعرفش ؟
شيماء:تبوس يعني
مسعد: طيب تعالي تحت الكوبري وانا اوريكي
شيماء: بجد هتوريني يا مسعد " في سعاده بالغه "

cut

12:00 تحت كوبري 6 اكتوبر عند طالعه مدينه نصر والظلام الدامس يعم المكان
ظلام ....
صوت شيماء : تسلم يا سي مسعد
صوت غريب: انا مش مسعد

Alby♥Wa♥Ro7y♥Wa♥3omry

منقوووول للضحك بس اللي مش هيضحك براحته

**هيام الشافعي** · 11 - 1 - 2009, 12:01 AM

ههههههههههههههههههههههههه ههههههههههههههههه

رهيبه بجد دي جوعتنا الست شيماء ربنا يكون في عونك يا مسعد

ههههههههههههههههههههههه

مشكوره بوب كتير

**القبطان** · 11 - 1 - 2009, 11:12 AM

مش مسعد طيب مين هههههههههههههههه
بجد جامد جدا

**xXx SHaDY xXx** · 11 - 1 - 2009, 11:25 AM

اشطه عليك يامان
جامده بجد

بس انت كده خليتني جوعت

ياريت بقي تروح تجبلي مكرونه بشاميل علشان انا بحبها
او ممكن تجبلي كبده او فراخ محمره ع الفحم

ونايس توبك وتسلم الايادي ياغالي